ToTeotsij kineki mitsmokuitlauis
SAN ipan Biblia tijpantiaj kuajkuali tlamachtili tlen techpaleuia ipan tonemilis pampa eli tlen toTeotsij. Maske nopaya amo kiijtoua kenijkatsa moneki timopajtisej, kena techpaleuia ma tijmatikaj tlake tijchiuasej kema techpano tlen amo kuali, kema timoiljuiaj uan tijyolmatij tlen techyolkokoua, uan kema timokokouaj ipan totlakayo o ipan totlalnamikilis.
Biblia nojkia techmachtia se tlamantli tlen tlauel ipati: kiijtoua toTeotsij Jehová a kuali kimati tlen timoiljuiaj uan tlen tijyolmatij. Ya kineki techmokuitlauis uan itstos touaya kema tlauel timokuesosej. Ximoyoliljui ipan ni ome textos tlen uala ipan Biblia, tlauel mitsyolchikauas.
“TOTEKO itstok ininnechka tlakamej tlen mokuesouaj. Uan kinmakixtia tlen mokuesouaj ika inintlajtlakoljuaj” (SALMO 34:18).
“Na niDios uan niinmoTEKO niinmechitskitok ipan inmomanejmatl uan niinmechiljuia: ‘Amo ximajmauikaj. Nika niitstok para niinmechpaleuis’” (ISAÍAS 41:13).
Uajka, ¿kenijkatsa techpaleuia Jehová kema amo kuali tijyolmatij? Ipan sekinok tlamachtili tikitasej Jehová nelia kineki techmokuitlauis uan yeka techpaleuia ika miak tlamantli.
a Biblia kiijtoua toTeotsij itoka Jehová (Salmo 83:18, TNM).
