Miakej maseualmej kimatij onka se keski tlamantli tlen kuali uan se keski tlen amo kuali. Se neskayotl, amo kuali kiitaj kema se akajya kichiualtia seyok ma moteka iuaya, kema temiktiaj uan kema se akajya kichiualtia se konetl ma moteka iuaya. Pero kuali kiitaj kema se akajya kuali tenojnotsa, tekuamachilia uan kichiua tlen xitlauak. ¿Pero kenijkatsa kiitaj kema kitlapejpeniaj iuaya ajkia motekasej, tlaj istlakatisej o amo o kenijkatsa kiniskaltisej ininkoneuaj? Miakej moiljuiaj sejse uelis kichiuas tlen kinekis ipan ni tlamantli. Yeka miakej kichiuaj tlen inijuantij moiljuiaj kuali o tlen sekinok kiniljuiaj. ¿Pero kuali tlen kichiuaj?

Kema tijtlapejpeniaj se tlamantli, timoyakanaj ika totlalnamikilis, tlen techiljuia tlake kuali uan tlake amo (Romanos 2:14, 15). Konemej nojkia kimatij kema amo mochiua tlen xitlauak, uan kemantika hasta kinyolkokoua inintlalnamikilis. Kej timoskaltijtiauij, totlalnamikilis kiyekojtia tlen techiljuiaj tochampoyouaj, katli ininuaya timomachtiaj, katli techmachtiaj, toreligión uan tlen momajtokej kichiuaj kampa tiitstokej. Uan kema tijtlapejpeniaj se tlenijki, totlalnamikilis techiljuia tlaj eli sanse ika tlen tijyekojtokej ipan tonemilis o amo.

Totlalnamikilis uelis techpaleuis ma tikinkuamachilikaj sekinok, ma titetlaskamatikaj, ma tijchiuakaj tlen kuali uan ma titetlasojtlakaj. Nojkia uelis techpaleuis amo ma tikinyolkokokaj katli tikinikneliaj, o amo ma tijchiuakaj tlen ueliskia kichiuas ma timopinaualtikaj o ma timoyolkokokaj.

Amo nochipa techpaleuis tlaj timoyakanasej ika tlen tojuantij timoiljuiaj. Kema Garrick nojua eliyaya piltelpokatsi, pejki kichiua tlen ya kinekiyaya. Pero teipa kiitak amo kipaleuiyaya pampa iselti moyakanayaya. “Kejuak nemiyaya ipan se ojtli kampa tsintlayoua pampa momekatiyaya, kitekiuiyaya drogas, moiuintiyaya uan tlauel nimosisiniyaya”.

Nojkia, amo san timoyakanaj ika tlen tojuantij timoiljuiaj, kemantika nojkia tijchiuaj tlen sekinok techiljuiaj. Kema kiampa tijchiuaj, uelis tijyekosej tlen sekinok kichiuaj uan uelis techtlalnamiktis. Kema tijchiuaj tlen tochampoyouaj, touampoyouaj uan tlen toteixmatkauaj moiljuiaj, kichiua ma techtlepanitakaj.

Amo nochipa techpaleuis tlaj timoyakanasej ika tlen sekinok moiljuiaj. Kema Priscila eliyaya ichpokatl, monejnemiltiyaya kej iuampoyouaj; inijuantij amo kenijki kiitayayaj motekasej iuaya se akajya maske ayamo monamiktijtoyaj. Pero amo nelia yolpakiyaya maske kichiuayaya tlen sekinok moiljuiyayaj kuali. Ya kiijtoua: “Kema pejki nimonejnemiltia kej sekinok, amo kuali nijyolmatiyaya. Amo kuali nijtlapejpenik se keski tlamantli uan ueltoskia nechpanos tlen amo kuali”.

Kema tijtlapejpeniaj tlake tijchiuasej, moneki timoiljuisej tlake tijyolmatij uan tlake kiyolmatij sekinok. Pero tlaj timoiljuiaj san ipan ni ome tlamantli, amo nochipa techpaleuis. Kemantika amo timoiljuiaj tlaj tlen tijtlapejpenisej kichiuas ma timoyolkokokaj o tikinyolkokosej sekinok (Proverbios 14:12). Nojkia, maske timoiljuisej tlen tojuantij o tlen sekinok moiljuiaj eli kuali, kemantika nopa amo nelia. Uan uelis teipa mopatlas kej maseualmej kiitaj se tlamantli. Onka se keski tlamantli tlen uejkajkia amo kuali kiitayayaj uan nama kuali kiitaj. Uan onka sekinok tlamantli tlen achtouia kuali kiitayayaj uan nama ayokmo kuali kiitaj.

¿Onka se tlamantli tlen uelis ika timoyakanasej para tijmatisej tlake kuali uan tlake amo? ¿Tlake techpaleuis kuali tijtlapejpenisej tlen tijchiuasej uan kiampa amo timoyolkokosej?

Kena onka se tlamantli tlen uelis ika timoyakanasej uan tlen techpaleuis kuali ma tiitstokaj maske kampa ueli tiitstokej. Ipan seyok tlamachtili tikitasej tlake techpaleuis nochipa ma tijchiuakaj tlen kuali ipan tonemilis.