Tlen kuali uan tlen amo kuali: Ta moneki tijtlapejpenis
Tlen ika timoyakanaj ipan tonemilis uelis kichiuas kuali ma tiitstokaj o amo. Jehová kimati nopa, yeka kineki ma timoyakanakaj ika tlen ya techiljuia.
Jehová kineki ma tiyolpakikaj uan kuali ma tiitstokaj.
“Na niDIOS niinmoTEKO tlen niinmechmachtia para inkimatisej tlen kuali para inkichiuasej. Uan niinmechyakanas ipan nopa ojtli tlen kinamiki inkitokilisej”. “¡Tlauel kuali tlaj tijneltokaskia notlanauatiljuaj! Kiampa tijpiaskia tlaseuilistli kej se ueyatl, uan nochipa tijchiuaskia tlen xitlauak, sanse kej kema mokojkoxonia ueyi atl” (Isaías 48:17; 48:18, TNM).
Jehová techchijchijki, yeka san ya kimati kenijkatsa kuali tiitstosej. Kineki ma tijkauakaj ma techyakana pampa kimati kiampa tiyolpakisej. Tlaj tijneltokaj itlanauatiljuaj, kuali kisas nochi tlen tijchiuasej. Nojkia kuali tijtlapejpenisej tlen tijchiuasej, tiyolpakisej uan tijpiasej tlaseuilistli.
Jehová amo techiljuia ma tijchiuakaj tlen amo tiuelij.
“Ni tlanauatili tlen ama niinmechmaka axtlauel ouij para inkichiuasej, niyon axouij para inkimachilisej” (Deuteronomio 30:11).
Tlaj tijnekij timonejnemiltisej kej Dios kipaktia, moneki tijpatlasej tlen timoiljuiaj uan tlen tijchiuaj. Jehová techiljuia ma tijchiuakaj tlen kena tiuelij. Ya techchijchijki, yeka kimati tlake tlamantli amo uelis tijchiuasej. Kema kuali tikixmatij, tikitaj “itlanauatiljuaj axouij” (1 Juan 5:3).
Jehová kiijtojtok kinpaleuis nochi katli monejnemiltiaj kej ya kipaktia.
“Na niDios uan niinmoTEKO, niinmechitskitok ipan inmomanejmak uan niinmechiljuia: ‘Amo ximajmauikaj. Nika niitstok para niinmechpaleuis’” (Isaías 41:13).
Kena uelis timonejnemiltisej kej Jehová kipaktia pampa ya techpaleuia. Ika iTlajtol techyolchikaua uan kichiua ma timotemachikaj teipa kuali tiitstosej.
Miakej maseualmej kiitstokej kema momachtiaj Biblia, kinpaleuia kuali ma itstokaj. ¿Mitspaktiskia tijmatis tlake sekinok tlamantli tlamachtia Biblia? Ueliskia peuas timomachtis pilamochtsi Nochipa xiitsto, tijpantis ipan jw.org uan amo tleno tikixtlauas. Nopaya uala ni eyi tlamachtili:
-
“¿Kenijkatsa uelis mitspaleuis Biblia?”.
-
“Biblia kiijtoua teipa tiitstosej ika pakilistli”.
-
“¿Uelis timotemachisej ipan tlen Biblia kiijtoua?”.
Kema timomachtijtias Biblia, tikitas “nochipa technextilia tlen melauak uan tlen xitlauak” (Salmo 111:8). Tlauel kuali tiitstosej tlaj tijchiuasej tlen Biblia kiijtoua. Pero Jehová amo techchiualtia ma timonejnemiltikaj kej ya kineki (Deuteronomio 30:19, 20; Josué 24:15). Sejse tlen tojuantij moneki kitlapejpenis tlaj kichiuas tlen kiijtoua o amo.
