¿Tlake techmachtiaj tlajtolpanextianij tlen toTeotsij?
Uejkajkia, toTeotsij kintekiuik tlajtolpanextianij pampa kinekiyaya kiniljuis maseualmej tlen tlauel ipati. Tlen kiijtojkej nopa tlajtolpanextianij techpaleuia ma tijmatikaj tlake moneki tijchiuasej tlaj tijnekij toTeotsij ma techteochiua. Ma tikitakaj tlake kiijtojkej eyij tlajtolpanextianij katli amo kitlauelkajkej toTeotsij.
ABRAHAM
ToTeotsij amo techikoita uan kineki kinteochiuas nochi maseualmej.
ToTeotsij kitenkauilik Abraham: “Nikinteochiuas nochi tlakamej ipan Tlaltipaktli ipan ta” (Génesis 12:3).
¿Tlake techmachtia? ToTeotsij tlauel techiknelia uan kineki kinteochiuas nochi maseualmej (tlakamej, siuamej uan konemej) katli kineltokaj.
MOISÉS
ToTeotsij tlauel tetlasojtla uan kinteochiua katli kichiuaj kampeka kiixmatisej.
ToTeotsij kimakak Moisés chikaualistli uan kiampa uelki kichiua uejueyi tlamantli. Maske Moisés ueliyaya kichiua nopa, ya nojkia kitlajtlanik toTeotsij: “Xinechiljui tlake mopakilis para nijchiuas uan keja nopa más uelis nimitsixmatis. Uan na nimitsneltokas uan noja tinechkualitstinemis” (Éxodo 33:13). ToTeotsij tlauel kipaktik tlen Moisés kitlajtlanik, yeka kimakak tlalnamikilistli uan kipaleuik ma kimati kenijkatsa eli uan kenke kichiua se tlamantli. Moisés kiitak toTeotsij tlauel tetlasojtla uan kipia ueyi iyolo (Éxodo 34:6, 7).
¿Tlake techmachtia? ToTeotsij nochi kinteochiuas (tlakamej, siuamej uan konemej) tlaj kichiuasej kampeka kuali kiixmatisej. Ipan iTlajtol techiljuia kenijkatsa kinamiki tijueyichiuasej uan nojkia techiljuia ya kineki techteochiuas.
JESÚS
Jesús tetlasojtlayaya uan kinchikajki maseualmej katli kipixtoyaj tlen ueli kokolistli.
ToTeotsij techteochiuas nochipa tlaj tijmatisej tlen Jesús kichijki uan tlen tlamachtik.
Ipan toTeotsij iTlajtol kiijtoua kenijkatsa eliyaya Jesús uan tlake tlamachtik. ToTeotsij kimakak chikaualistli uan kiampa uelki kichiua miak uejueyi tlamantli, kinchikajki katli amo tlachiayayaj, katli amo ueliyayaj tlakakij uan katli amo ueliyayaj nejnemij. Uan nojkia kinyolkuik se keskij maseualmej katli ya miktoyaj. Tlen Jesús kichijki, kinextik nochi tlen toTeotsij kichiuas teipa. Nojkia, Jesús techiljuik tlake moneki tijchiuasej tlaj tijnekij tijselisej nochi ni tlateochiualistli, ya kiijtok: “Inijuantij kipiaj yolistli yankuik para nochipa intla mitsixmatij ta tlen melauak tiDios uan axaka seyok, uan nojkia nechixmatij na niJesucristo tlen tinechtitlantok” (Juan 17:3).
Jesús tetlasojtlayaya uan teikneliyaya. Tlakamej uan siuamej kichijkej tlen kiniljuik: “Ximomachtikaj tlen na pampa na nijpia noyolo. Axnimoueyimati” (Mateo 11:29). Ya amo eliyaya kej se keskij tlakamej katli amo kinpatiitayayaj siuamej, pampa ya kinikneliyaya, kinpatiitayaya uan kintlepanitayaya.
¿Tlake techmachtia? Jesús tlauel kinikneliyaya maseualmej uan technextilik kenijkatsa moneki timoiknelisej.
JESÚS AMO ELI TOTEOTSIJ
Ipan toTeotsij iTlajtol kiijtoua “itstok setsi Dios” uan Jesús elki itlajtolpanextijka toTeotsij katli nochipa kichiuayaya tlen kiiljuiyaya (1 Corintios 8:6). Jesús kiijtok toTeotsij tlauel ueyi uan amo kej ya, uan nojkia kiijtok ya kititlanki ipan Tlaltipaktli (Juan 11:41, 42; 14:28). *
^ párr. 17 Tlaj nojua tijneki tijmatis sekinok tlamantli tlen Jesús, xikita ipan www.mt1130.com nopa pilamochtsi La fe verdadera, la puerta a una vida feliz, ipan tlaxeloli 8 uan 9.
