Ipan nochi Tlaltipaktli, tlauel miakej maseualmej moiljuiaj kema iljuichiuaj ipan Navidad kiilnamikij kema Jesucristo kiaxitia ixiui. ¿Timotlajtlanijtok tlaj ipan achtoui siglo Cristo itokilijkauaj uan iapóstoles kichiuayayaj nopa Navidad? Uan, ¿tlake kiijtoua Biblia tlen nopa iljuitl katli mochiua kema kiaxitiaj ininxiui? Kej tijnankilisej ni tlajtlanili, techpaleuis ma tijmatikaj tlaj Cristo itokilijkauaj kinamiki iljuichiuasej ipan Navidad.

Biblia amo kiijtoua tlaj monekiyaya tiiljuichiuasej kema Jesús o seyok toTeotsij itekipanojka kiaxitiskia ixiui. Maske kena kiijtoua omej maseualmej iljuichijkej kema kiaxitijkej ininxiui, inijuantij amo kitekipanouayayaj toTeotsij Jehová. Uan ipan nopa ome iljuitl tlen mochijki, panok tlen amo kuali (Génesis 40:20; Marcos 6:21). Nopa Encyclopædia Britannica kiijtoua nopa achtoui Cristo itokilijkauaj amo “iljuichiuayayaj kema kiaxitiyayaj ininxiui kej katli amo tlaneltokayayaj [ipan toTeotsij]”.

Biblia amo kiijtoua ipan tlake tonali tlakatki Jesús. Nopa Diccionario de historia de la Iglesia kiijtoua: “Amo onka yon se tlamantli tlen kinextia ipan tlake tonali yon ipan tlake metstli tlakatki Cristo”. Tlaj Jesús kinektoskia itokilijkauaj ma kiilnamikikaj kema tlakatki uan ma kiiljuichiuilikaj, uajka kiniljuijtoskia ipan tlake tonali tlakatki.

Nojkia, ipan Biblia amo kiijtoua tlaj Jesús o se tlen itokilijkauaj iljuichiuayayaj ipan Navidad. Nopa New Catholic Encyclopedia kiijtoua achtoui neski nopa tlajtoli Navidad ipan “Cronógrafo de Filócalo, se calendario tlen motekiuiyaya ipan Roma, tlen kiijtoua katli panok ipan xiuitl 336”. Ipan nopa tonali, Biblia ya motlamiijkuilojtoya uan ya panotoya tlauel miak xiuitl kema Jesús itstoya ipan Tlaltipaktli. Yeka, nopa Cyclopedia tlen kiijkuilojkej McClintock uan Strong kiijtoua toTeotsij amo tlanauatik ma mochiua Navidad yon amo uala ipan nopa Nuevo Testamento. *

Jesús eliyaya se kuali tlamachtijketl, yeka kiniljuik itokilijkauaj tlake kinekiyaya ma kichiuakaj, uan nochi tlen kinnauatik eltok ipan Biblia. Ya amo kema kiniljuik ma kichiuakaj nopa Navidad. Kej se tlamachtijketl amo kineki katli kinmachtia ma kichiuakaj o ma kiijtokaj tlen ya amo kiniljuijtok, Jesús amo kineki itokilijkauaj ma kichiuakaj tlen amo “ijkuilijtok ipan iTlajtol toTeko” (1 Corintios 4:6).

Cristo itokilijkauaj kena kichiuayayaj se tlamantli tlen tlauel ipati: kiilnamikiyayaj Cristo imikilis. Jesús kiniljuik itokilijkauaj kema uan kenijkatsa monekiyaya kichiuasej. Tlen ya tlanauatik, uan nojkia nopa tonali kema mijki, uala ipan Biblia (Lucas 22:19; 1 Corintios 11:25).

Kej tikitstokej, ipan Navidad kiilnamikij kema se akajya kiaxitia ixiui, uan nopa achtoui Cristo itokilijkauaj amo kichiuayayaj nopa iljuitl. Nojkia, Biblia amo kiijtoua tlaj Jesús o seyok maseuali kichiuayaya Navidad. Yeka, ipan nochi Tlaltipaktli, tlauel miakej Cristo itokilijkauaj mosentlalijtokej amo iljuichiuasej ipan Navidad.