Maske amo kipia yon se tlaixkopinkayotl, amo kema kiixkopinkej ipan se tetl o se tlenijki, ipan miak xiuitl tlen panotok, miakej kichijchijtokej Jesús iixkopinka.

Maske kiixkopinaj, yon se tlen nopa maseuali kimati kenijkatsa eliyaya itlachialis Jesús. Sekij kiixkopinayayaj kej momajtoyaj kichiuaj ipan nopa tonali, o tlen kineltokayayaj ipan ininreligión o kiixkopinayayaj kej kiniljuiyayaj katli kikouayayaj tlaixkopinkayotl. Kej kiixkopintokej ueliskia kichiuas maseualmej ma moiljuikaj katli amo nelia tlen Jesús uan amo ma kineltokakaj tlen tlamachtiyaya.

Sekij kiixkopinkej kej se tlakatl katli kasempa nesiyaya, tsonkalueueyak, amo tlauel kipiayaya itentso o nesiyaya kej tlauel mokuesojtok. Uan sekinok kiixkopinkej ika se tlenijki tlen kiyaualojtoya ipan itsonteko o nesiyaya kej amo kitekipachoua tlen kinpano sekinok. ¿Nelia nesiyaya kej kiixkopintokej? ¿Kenijkatsa uelis tijmatisej? Moneki tikitasej tlake kiijtoua Biblia, kiampa uelis timoiljuisej kenijkatsa eliyaya itlachialis, uan nopa nojkia techpaleuis ma tikitakaj kej kinamiki.

Ni tlajtoli Jesús kiijtok kema momaijtok, uelis kema moatsonpoliuiltik (Hebreos 10:5; Mateo 3:13-17). ¿Kenijkatsa eliyaya itlakayo? Se 30 xiuitl achtoui, iluikaejketl Gabriel kiiljuijtoya María: “Nimantsi tikoneuek tielis uan teipa tijtlakatiltis se okichpil uan [...] mokone elis nelia tlatsejtseloltik, uan tlakamej kiixmatisej para iKone toTeko” (Lucas 1:31, 35). Uajka Jesús eliyaya xitlauak kej Adán eliyaya kema ayamo tlajtlakolchijtoya (Lucas 3:38; 1 Corintios 15:45). Uelis itlakayo Jesús kuali nesiyaya uan uelis kiixkuitoya inana María, katli eliyaya judía.

Jesús nojkia kipixtoya itentso, kej nochi judíos katli itstoyaj ipan nopa tonali, amo kej romaeuanij. Se akajya katli kipixtoya itentso tlauel kipatiitayayaj uan kitlepanitayayaj, yeka amo aka ueueyak yon san kej ueli kipixtoya. Jesús kuali kitekiyaya itentso, uan itsonkal amo sokiyo eltoya uan kuali moxiljuiyaya. San nazareos amo moximayayaj, kej Sansón (Números 6:5; Jueces 13:5).

Jesús eliyaya se tetik tlakatl pampa miak xiuitl tekitik kej kuaxinketl. Ipan nopa tonali nochi kimachijchiuayayaj pampa amo onkayaya tepostli tlen nama onka (Marcos 6:3). Kema kipeualtijtoya tlajtolmoyaua, amo aka kipaleuik kema kinkixtik tlen teokali “nochi [tlanamakanij] ininuaya ininborregojuaj uan ininuakaxuaj. Uan kintepeuilik inintomij nopa tomipatlanij uan kinkuamajkauilik ininkuamesas” (Juan 2:14-17). Tlaj Jesús amo tetik eltoskia, amo ueltoskia kichiuas nopa. Ya kitekiuik itlakayo tlen toTeotsij kisenkauilijtoya uan kiampa kichijki tlen kinauatijtoyaj: “Moneki nojkia nias ipan sekinok altepetinij para nikiniljuis tlakamej itlajtol toTeko [...], pampa ya nopa nechtitlantok ma nijchiua” (Lucas 4:43). Jesús kipixtoya chikaualistli pampa ikxinejnenki ipan nochi altepetl Palestina uan kiampa kimoyajki nopa kuali tlamachtili.

Jesús kipiayaya kuali iyolo uan kuali tenojnotsayaya, yeka kema kiniljuik nopa tlajtoli, miakej katli mokuesojtoyaj kinejkej kinechkauisej (Mateo 11: 28-30). Pampa tenojnotsayaya ika miak tlaiknelili, kinextiyaya nelia kinyolchikauaskia katli kitlakakiliskiaj. Uan konemej nojkia kinekiyayaj itstosej iuaya Jesús. Biblia kiijtoua: “Kinkuanajnauajki nopa konemej, uan kitlalik ima ininpani” (Marcos 10:13-16).

Maske Jesús tlauel tlaijiyouik kema nechka kimiktiskiaj, ya amo mokuesojtoya uan tlauel yolpakiyaya. Se tonali, kema mosenkauayayaj ipan Caná, ya kichijki atl ma mokuepa se kuali vino uan kiampa maseualmej nojua ma moyolpakiltijtokaj (Juan 2:1-11). Uan ipan sekinok tonali, kinmachtik maseualmej se keski tlamantli tlen amo kema kiilkauaskiaj (Mateo 9:9-13; Juan 12:1-8).

Uan ika tlen kimoyajki, kinpaleuik maseualmej ma motemachikaj uelis itstosej nochipa (Juan 11:25, 26; 17:3). Kema 70 itokilijkauaj kiiljuijkej kenijkatsa miakej kuali kintlakakilijtoyaj, Jesús tlauel yolpajki, uan kiijtok: “Xipakikaj pampa ya ijkuilijtok inmotoka ipan iama toTeko nepa iluikak” (Lucas 10:20, 21).

Katli tlayakanayayaj kema Jesús itstoya tlauel moueyimatiyayaj uan kinekiyayaj kinextisej tlauel kipiayayaj tlanauatili (Números 15:38-40; Mateo 23:5-7). Yeka Jesús kiniljuik iapóstoles amo ma moiljuikaj san inijuantij tlauel ininpati uan sekinok amo (Lucas 22:25, 26). Uan kintlalnamiktik: “Xijpiakaj cuidado para axinkintokilisej inintlamachtil nopa tlamachtianij [...] [katli] kinpaktia nentinemisej ika ininyoyo ueueyak. Kinekij nochi tlakamej ipan tiankis ma kintlajpalokaj ika tlatlepanitakayotl” (Marcos 12:38).

Jesús amo kiampa kichiuayaya, yeka kemantika amo kiixmatiyayaj (Juan 7:10, 11). Nesiyaya sanse kej nopa 11 iapóstoles katli amo kitlauelkajtoyaj. Judas, katli kitemaktilik, kiijtojtoya kinnextiliskia “se tlaneskayotl” katli kiitskiskiaj Jesús, yeka kitsoponik uan kiampa kimatkej ajkia eliyaya (Marcos 14:44, 45).

Maske miak tlamantli amo tijmatij, Jesús itlachialis amo eliyaya kej kiixkopintokej maseualmej. Maske amo tlauel ipati tijmatisej kenijkatsa nelia nesiyaya Jesús, kena tlauel ipati tijmatisej kenijkatsa kinamiki tikitasej nama.

Jesús kiijtok ni tlajtoli ipan nopa youali kema nechka kimiktiskiaj (Juan 14:19). Temaktilik inemilis pampa kinejki kinmakixtis maseualmej (Mateo 20:28). Kema panok eyi tonali, toTeotsij kiyolkuik kej se tonaltsi uan kikajki “ma monexti” ininixpa itokilijkauaj (1 Pedro 3:18; Hechos 10:40). ¿Kenijkatsa nesiyaya kema moyolkuik? Ayokmo nesiyaya kej achtouia, yeka iuampoyouaj amo nima kiixmatkej. María Magdalena kiixkuapolok ika se xochitojketl, uan omej itokilijkauaj katli yauiyayaj Emaús moiljuijkej eliyaya se tlakatl katli euayaya seyok altepetl (Lucas 24:13-18; Juan 20:1, 14, 15).

¿Kenijkatsa eli itlachialis Jesús ipan ni tonali? Kema ya miktoya se sesenta xiuitl, apóstol Juan miakpa kiitak Jesús kejuak ipan se temiktli. Amo kiitak se tlakatl katli tlaijiyouijtoya ipan cruz, ya kiitak eliyaya se “Tlanauatijketl tlen nochi tlanauatianij” katli nechka kintsontlamiltis toTeotsij ikualankaitakauaj: maseualmej uan amo kuali ajakamej. Uan nojkia nochipa kinteochiuas maseualmej katli mokauasej ipan Tlaltipaktli (Apocalipsis [Revelación] 19:16; 21:3, 4).