Dan uan Margaret * tlauel yolpaktoyaj pampa ininichpoka ika ichampoyouaj kinpaxalojtoyaj. Maske ayokmo tekitiyaya, Margaret eliyaya se tlakualchijketl katli miakej kiixmatiyayaj. Kema ichampoyouaj ya yaskiaj, kinejki kikualchijchiuas macarrones ika queso, se tlakualistli katli tlauel kinpaktiyaya omej iixuiuaj.

Kema nochi moseuijtoyaj, Margaret kitlalik ipan mesa nopa olla, uan kema kitentlapok... ¡san queso kipixtoya! Nochi amo molinijkej. Margaret kiilkajki kitemilis macarrones.

Tlaj tiuejueyij o amo, o uejkajtok tijchiuaj se tlamantli, nochi timokuapolouaj. Nima tikijtojtiuetsij se tlenijki, tijchiuaj se tlamantli kema amo kinamiki, tikilkauaj tijchiuasej se tlenijki o amo tijnekij tijchiuasej. ¿Kenke timokuapolouaj? ¿Tlake uelis tijchiuasej kema techpanos nopa? ¿Tlake techpaleuis amo tlauel timokuapolosej? Tlaj tikitasej kej kinamiki kema timokuapolouaj, techpaleuis ma tijnankilikaj ni tlajtlanili.

Kema sekinok techiljuiaj kuali tijchijkej se tlenijki, tlauel tiyolpakij pampa timoiljuiaj kena kuali tijchijkej. Uan kema amo kuali kisa toteki, ¿tikijtouaj kena timokuapolojkej maske sekinok amo kiitakej o amo tijnekiyayaj timokuapolosej? Moneki amo timoueyimatisej, kiampa uelis tikijtosej kena timokuapolojkej.

Tlaj timoueyimatij uelis timoiljuisej amo kenijki tlaj timokuapolosej, tikijtosej tojuantij amo tijchijkej o tijkauilisej seyok. Tlaj kiampa tijchiuasej, uelis kichiuas ma pano tlen amo kuali, pampa uelis amo mosenkaua nopa kuesoli o sekinok kintlatsakuiltisej maske amo inijuantij mokuapolojkej. Uan maske uelis tojuantij amo tleno techpanos, moneki tikilnamikisej teipa “tijchiuasej cuentas ika toTeko Dios” (Romanos 14:12).

ToTeotsij kiita kej kinamiki kema timokuapolouaj. Pilamochtsi Salmos kiijtoua ya “tetlasojtla miak uan kipia ueyi iyolo”. Ya ‘amo techtlaijiljuia ajachika’ yon “axuejkaua kualantok”. Kuali kimati timaseualmej amo tielij tixitlauakej uan kimati kemantika timokuapolosej, pampa ya kimajtok “tojuantij san tielij tlaltejpoktli” (Salmo 103:8, 9, 14).

Uan pampa tlauel tetlasojtla, toTeotsij kineki tiikoneuaj ma tikitakaj kej kinamiki kema timokuapolouaj (Salmo 130:3). Ika iTlajtol, tlauel techtlajtolmaka uan techyakana pampa kineki ma tijchiuakaj tlen kinamiki kema tojuantij o sekinok mokuapolosej.

Miakpa, kema se akajya mokuapoloua, san kinkauilia sekinok kichijkej o san motechtia ika tlen kiijtok o kichijki. Kema ta tijyolkokos se akajya, amo xijchiua nopa, kinamiki nima tikiljuis ma mitstlapojpoljui uan xijsenkaua nopa kuesoli uan kiampa nojua kuali timouikas iuaya. O tlaj tijchiuaskia  se tlenijki tlen kichiuas amo kuali xiitsto o seyok amo kuali ma itsto, amo xikualani mouaya yon xikijto seyok itlajtlakol, xijchiua kampeka tijsenkauas nopa kuesoli. Tlaj tikijtos amo ta timokuapolok, san kichiuas nojua xikualani uan moueyilis nopa kuesoli. Kualtiaskia tikitas tlake uelis tijchiuas uan ayokmo kiampa mitspanos, tijsenkauas tlen moneki uan tikilkauas tlen panok.

Kema se akajya mokuapoloua, nimantsi tikijtouaj amo kuali tlen kichijki. Kema kiampa panos, kualtiaskia tijchiuasej kej Jesús kiijtok: “Xikinchiuilikaj sekinok, iuikal keja inkinekij sekinok ma inmechchiuilikaj” (Mateo 7:12). Kema timokuapolouaj, maske san se kentsi, tlauel tikintlaskamatiliaj sekinok kema kinextiaj tlaiknelili o kiilkauaj tlen tijchiuaj. Yeka, ¿kenke amo tijchiua kampeka nojkia tijnextis tlaiknelili kema sekinok mokuapolosej? (Efesios 4:32).

Se diccionario kiijtoua se akajya mokuapoloua pampa “amo kuali moiljuia kenijkatsa kichiuas se tlamantli, amo kimati se keski tlamantli o pampa amo kichiua tlen kinamiki”. Maske nochi techpano se tlen ni tlamantli uan yeka timokuapolouaj, tlaj tijchiuasej tlen Biblia techtlajtolmaka, techpaleuis amo tlauel ma timokuapolokaj.

Se texto tlen uelis techpaleuis eli Proverbios 18:13, nopaya kiijtoua: “Nelia se uiuiyotl uan se pinaualistli intla titlanankilis kema noja aya tijkaktok nochi tlen kichiuaj kampeka para mitsiljuisej”. Kema kuali tijkakij se keski tlamantli uan kuali timoiljuiaj kenijkatsa titlanankilisej, techpaleuis amo ma tikijtokaj yon ma tijchiuakaj se tlenijki tlen amo kinamiki. Kema kuali tijtlakakiliaj se tlenijki, kichiua kuali ma timoiljuikaj tlake tikijtosej uan amo timokuapolosej.

Seyok texto kiijtoua: “Hasta kampa inuelij, xiitstokaj ika yejyektsi ika nochi tlakamej” (Romanos 12:18). Xijchiua kampeka kuali timouikas ininuaya sekinok uan tiitstos ika tlaseuilistli ininuaya. Kema titekitis ininuaya sekinok, xikintlepanita uan xijnexti tijpia kuali moyolo ininuaya. Nojkia xijchiua kampeka xikiniljui kuali tlen kichiuaj uan xikinyolchikaua. Kema kiampa tijchiuaj, amo ouij tijmatij timotlapojpoljuisej uan nima tikilkauaj tlen techiljuiaj o techchiuiliaj. Uan nojkia techpaleuia kema pano se ueyi kuesoli, pampa kuali tijmatij kenijkatsa tijsenkauasej.

Kema timokuapolos, kuali xikita tlake uelis tijyekos. Amo san ximotechti pampa tikijtok o tijchijki se tlamantli, kualtiaskia tikitas kenijkatsa uelis nojua kuali tijnextis se kuali tlamantli. Uelis mitspoloua tijpias moyolo, tijnextis titetlasojtla, kuali timonauatia, tijnextis tieli tiyolyamanik o titlapaleuis ma onka tlaseuilistli uan tlaiknelili (Gálatas 5:22, 23). Kema timokuapolos, tijmatis tlake ayokmo kinamiki tijchiuas teipa. Maske amo kinamiki timoyolkokojtos ika tlen tijchijki, nojkia amo ximoiljui amo kenijki tlaj sampa timokuapolos. Uan tlaj ta o sekinok peuaj kualanij, san xiuetska o xikijto se tlenijki tlen tetlauetskiltis, kiampa amo aka kualanis.

Tlaj tikitaj kej kinamiki kema tojuantij o sekinok mokuapolouaj, techpaleuis kuali ma tijmatikaj tlake tijchiuasej. Kuali tijyolmatisej uan tiitstosej ika tlaseuilistli ininuaya sekinok. Tlaj ayokmo tijchiuasej nopa tlamantli tlen kichijki ma timokuapolokaj, uajka techpaleuis ma tijpiakaj tlalnamikilistli, uan sekinok kinpaktis itstosej touaya. Nojkia amo timoyolkokosej yon timoiljuisej amo tleno kuali tijchiuaj. Uan tlaj tikilnamikisej sekinok nojkia kichiuaj kampeka amo mokuapolosej, techpaleuis ma timonechkauikaj ininuaya. Uan nojkia techpaleuis ipan seyok tlamantli tlen tlauel ipati: tijchiuasej kej toTeotsij katli tlauel teiknelia uan tijnekisej titetlapojpoljuisej (Colosenses 3:13).

¿Tlake panok kema Margaret mokuapolok? ¿Kualankej ichampoyouaj? Amo. Kej Margaret, nochi san uetskakej uan kikuajkej tlen kichijchijtoya maske amo kipixtoya macarrones. Maske panok miak xiuitl, iixuiuaj kiniljuiyayaj ininkoneuaj tlen kinpanok ipan nopa tonali, uan kiilnamikiyayaj kenijkatsa moyolpakiltiyayaj ika ininueyitatauaj. Inijuantij kimajtoyaj tlen panok ipan nopa tonali amo eliyaya se ueyi kuesoli.