NOPA Tlanauatili tlen Moisés kimakakej, kiijtouayaya Jehová kiseliyaya kej tlakajkaualistli tórtolas o palomas. Ni omej totomej nochipa sansejko moijtoua ipan nopa tlanauatili kampa kiijtouayaya tlake ueliskiaj temakasej kej tlakajkaualistli. Israeleuanij ueliskiaj temakasej se tórtola o se paloma (Lev. 1:14; 12:8; 14:30). Ni tlauel kinpaleuiyaya israeleuanij pampa amo nochipa kinasiyayaj tórtolas. Ma tikitakaj kenke.

Nopa tórtolas elij totomej katli san nentinemij, uan ipan Israel san asij kema tlatotonia. Ipan octubre (kema tlaxiuiyotepeui), nopa totomej yauij ika sur kampa amo tlaseseya uan tlakuepiliaj Israel kema ya peua tlatotonia (Cant. 2:11, 12; Jer. 8:7). Yeka, ipan nopa metstli kema tlauel tlaseseyayaya, israeleuanij ouij kinasiyayaj tórtolas tlen temakaskiaj kej tlakajkaualistli.

Nopa palomas amo yauij sejkanok, yeka ipan Israel kampa ueli itstoyaj. Nojkia, sekij itstoyaj kalijtik (nojkia xikita Juan 2:14, 16). Se amochtli kiijtoua: “Ipan nopa altepemej uan pilaltepetsitsij, maseualmej kiniskaltiyayaj palomas. Ipan sejse kali kikoyoniyayaj se kentsi tlapepecholi uan nopaya kinkauayayaj ma itstokaj” (nojkia xikita Isaías 60:8).

¿Tlake techmachtia tlen Jehová? Ya tlauel teiknelia uan techkuamachilia, yeka kinkajki israeleuanij ma kimakakaj totomej katli nochipa ueliskiaj kinasisej.