Paul: Tlauel tiyolpaktoyaj pampa ipan noviembre 1985, techtitlankej ma titlatekipanotij kej misioneros ipan altepetl Liberia tlen África Occidental. Nopa avión moketski ipan Senegal. Anne kiijtok: “Ipan se hora ya tiitstosej Liberia”. Pero teipa techiljuijkej: “Katli yauij Liberia moneki temosej, pampa miakej maseualmej kinijixnamikij tekichiuanij uan amo uelis tiasitij”. Yeka, timokajkej matlaktli tonali ininuaya se keskij misioneros ipan Senegal. Ipan noticias kiijtouayayaj ipan Liberia kinmiktiyayaj miakej maseualmej uan kintemayayaj ipan uejueyi carros. Tlaijixnamikinij kemantika amo kinkauayayaj ma kisakaj maseualmej uan katli kinitayayaj kalteno, kinmiktiyayaj.

Anne: Amo tlauel techpaktia tinemisej kampa ueli. Desde kema nieliyaya nisiuapil nochi nijmakasiyaya. Kema nikixkotona se calle, tlauel nimajmaui. Maske kiampa nechpano, timosentlalijtoyaj tiasitij kampa techtitlantoyaj.

Paul: Anne uan na titlakatkej ipan oeste tlen Inglaterra, Anne ichaj mokauayaya se 8 kilómetros iuejkaka kampa na niitstoya. Kema tikiskej secundaria, nima pejki titlatekipanouaj kej precursores. Timosentlalijtoyaj senkistok titlatekipanosej. Notatauaj uan inana Anne tlauel techpaleuijkej. Kema nijpixtoya 19 xiuitl niajki nitlatekipanoto Betel. Uan Anne nojkia pejki tlatekipanoua nopaya kema timosenkajkej, ipan 1982.

Anne: Techpaktiyaya titlatekipanosej Betel pero nojkia tijnekiyayaj titlatekipanosej kampa monekiyayaj más tlajtolmoyauanij. Ipan Betel, titekitikej ininuaya katli tlatekipanojtoyaj kej misioneros uan techpaleuijkej más ma tijnekikaj titlatekipanosej. Eyi xiuitl tlauel timomaijtojkej uan tikiljuijkej Jehová tlen tijnekiyayaj. Yeka, tlauel tiyolpajkej pampa ipan 1985 techtlanejkej ma tiakaj kampa momachtiaj ipan Galaad, clase 79. Teipa techtitlankej Liberia, ipan África Occidental.

Paul: Tiasitoj Liberia kema pejkej kinkauaj ma asikaj aviones. Nojua onkayaya kualantli uan amo kinkauayayaj ma kisakaj. Maseualmej tlauel majmauiyayaj, yeka kema se carro chikauak kakistiyaya, nochi momajmatiyayaj uan mochololtiyayaj. Tijpouayayaj se keski capítulos tlen Salmos uan nopa techpaleuiyaya amo tlauel ma timajmauikaj. Maske kiampa  panoyaya kampa tiitstoyaj, tlauel techpaktiyaya titlatekipanosej nopaya. Anne eliyaya misionera uan na nitekitiyaya Betel iuaya toikni John Charuk. a Tlauel nechpaleuik nopa toikni pampa ya kipanotoya miak tlamantli uan kuali kimatiyaya tlen kiixnamikiyayaj toikniuaj.

Anne: Tlauel techpaktik tiitstosej ipan Liberia pampa toikniuaj uan tosiuaikniuaj tlauel teikneliyayaj, kinpaktiyaya kamanaltisej uan tlauel kuali tlaneltokayayaj. Yeka, nima kuali timouikakej uan tikinitakej kej tochampoyouaj. Techpaleuijkej kuali ma titlaneltokakaj uan tlauel techpaktiyaya titlajtolmoyauasej. Maseualmej kualaniyayaj tlaj amo tiuejkauayayaj. Kinpaktiyaya kamanaltisej tlen Biblia ojtipa uan amo ouij eliyaya timokamanaljuisej ininuaya kema tikinnechkauiyayaj. Miakej kinekiyayaj momachtisej Biblia uan kemantika amo tikaxiliyayaj nochi tikinmachtisej. ¡Techpaktiyaya titlajtolmoyauasej nopaya!

Paul: San naui xiuitl kuali tiitstoyaj, pampa ipan 1989, maseualmej pejkej moteuiaj uan mopatlak miak tlamantli. Ipan julio 2, 1990, katli kinijixnamikiyayaj tekichiuanij moaxkatijkej nechka kampa eltoya kali Betel. Yeka, eyi metstli amo uelki tikisaj uan amo uelki tikinnojnotsaj tochampoyouaj yon ueyi Kali Betel. Maseualmej kinekiyayaj ininselti monauatisej, amo onkayaya tlakualistli uan pejkej kinchiualtiaj siuamej ma motekakaj ininuaya. Nopa kualantli uejkajki 14 xiuitl ipan nopa altepetl.

Anne: Maseualmej tlen se keski pilaltepetsitsij tlateuiyayaj uan kinmiktiyayaj sekinok. Tlateuianij tlachtekiyayaj, kiuikayayaj kuajkuali tepostli para temiktisej uan kej ueli moyoyontijtoyaj. Miakej kiijtouayayaj kema temiktiyayaj, eliyaya kejuak “kinmiktiyayaj piyomej”. Kintemayayaj carreterajteno katli kinmiktijtoyaj uan se keskij kintemayayaj nechka Betel. Se keskij toikniuaj kinmiktijkej uan omej eliyayaj misioneros.

Miakej toikniuaj amo majmajkej uan kintlatijkej o kiniyankej sekinok toikniuaj katli kinekiyayaj kinmiktisej. Se keskij betelitas uan misioneros nojkia kiampa kichijkej. Ipan Betel, se keskij toikniuaj kochiyayaj ipan se cuarto tlen eltoya tlatsintla uan tojuantij timokauayayaj uejkapa ininuaya sekinok. Ipan tocuarto nojkia mokauayayaj chikuasej toikniuaj.

Paul: Mojmostla tlateuianij kinekiyayaj kalakisej kampa tiitstoyaj pampa kinekiyayaj kiitasej tlaj tijtlatijtoyaj o tikiyantoyaj se akajya. Yeka tikitakej kenijkatsa ueliskia timomokuitlauisej. Tikintlalijkej nauij toikniuaj: omej tlachixtoyaj ipan ventana uan omej kimokuitlauiyayaj puerta tlen eltoya kalteno. Tlaj katli  itstoyaj ipan puerta kipiayayaj ininmax ininixpa, kiijtosnekiyaya amo tleno panoskia. Pero tlaj kitlaliyayaj ininmax ininika, kiijtosnekiyaya tlateuianij tlauel kualantoyaj uan kinekiyayaj kalakisej. Yeka, katli tlachixtoyaj ipan ventana nimantsi kintlatiyayaj toikniuaj.

Anne: Kema ya panotoya se keski semanas, toikniuaj ayokmo uelkej kintsakuiliaj nopa tlateuianij katli tlauel mosisinijtoyaj uan kalajkej Betel. Nimokaltsakuato baño iuaya se tosiuaikni kampa eltoya se ropero. Nopa ropero kipiayaya kampa nopa tosiuaikni ueliskia motlatis uan nopaya kalajki. Nopa tlateuianij yajkej uejkapa kampa niitstoya ika inintepos. Tlauel mosisinijtoyaj uan chikauak pejkej kitajtakaniaj nopa puerta. Paul kiniljuik: “Ximochiakaj, nosiua itstok baño”. Pero nitlakalanik kema nijtsakuayaya nopa ropero kampa motlatijtoya nopa tosiuaikni uan niuejkajki kema nijkualtlalik tlen eltoya nopaya. Yeka, pejki nimajmaui uan niuiuipika. Amo nijnekiyaya nikaltlapos pampa tlaj kiampa nechitaskiaj, nima moiljuiskiaj nijtlatijtoya se akajya. Yeka, ichtakatsi nimomaijtok uan nikiljuik Jehová ma nechpaleui. Teipa nikaltlapok uan kuali nikintlajpalok. Se tlateuijketl nechkuatopejki uan yajki kampa eltoya nopa ropero uan tlamitlakijkixtik. Pero amo aka kipantik, yeka yajkej tlachiatoj ipan sekinok cuartos uan uejkapa kampa tijkauayayaj miak tlamantli uan nojkia amo aka kipantijkej.

Paul: Kemantika ika ijnalok amo tijpiayayaj tlen tijkuasej, pero nopa tlamachtili tlen toikniuaj kipanoltiyayaj ika ijnalok, techpaleuiyaya kuali ma titlaneltokakaj. Uan tijmatiyayaj tlaj tijpouaskiaj Biblia uan timomachtiskiaj, techpaleuiskia ma tikijiyouikaj tlen tikixnamikiskiaj mojmostla.

Tlaj tlantoskia tlakualistli uan atl, uan tikistejtoskiaj Betel, toikniuaj katli tikintlatijtoyaj temachtli kinmiktijtoskiaj. Maske amo tijmatiyayaj kenijkatsa Jehová kichiuayaya, asiyaya tlakualistli kema amo tijchiayayaj. Ya techmakak tlen monekiyaya uan techpaleuik ayokmo tlauel ma timajmauikaj.

Ipan nopa altepetl tlauel ouij kej itstoyaj, pero tlen Jehová techmachtia tlauel techpaleuik. Maske miakej toikniuaj nochipa motlatijtinemiyayaj para momanauisej, inijuantij kuali tlaneltokayayaj uan amo majmauiyayaj. Se keskij toikniuaj kiijtouayayaj nopa tlauilankayotl kinkualchijchiuayaya para kema asiskia nopa ueyi tlaijiyouilistli. Miakej ueuejtlakamej uan toikniuaj katli nojua eliyayaj telpokamej, amo majmajkej uan kinpaleuijkej sekinok. Toikniuaj uan tosiuaikniuaj katli kistejtoyaj tlen ininaltepe, mopaleuiyayaj uan tlajtolmoyauayayaj kampa amo aka tlajtolmoyajtoya. Uan maske itstoyaj kuatitla, kikualchijchiuayayaj kampa ueliskiaj monechikosej. Maske tlauel ouij panoyayaj, kema yauiyayaj tlanechikoli moyolchikauayayaj uan kema tlajtolmoyauayayaj kinpaleuiyaya ma kiijiyouikaj tlen kiixnamikiyayaj. Kema tikinuikiliyayaj tlakualistli, techyolchikauayaya pampa inijuantij tlajtlaniyayaj se morral o bolsa tlen ika ueliskia tlajtolmoyauasej uan amo yoyomitl. Maseualmej kuali kitlakakiliyayaj nopa kuali tlamachtili pampa mokuesojtoyaj uan momajmatijtoyaj. Tlauel kuali  kiitayayaj pampa toikniuaj yolpakiyayaj uan eliyayaj kejuak se tlauili tlen tlauia ipan tsintlayouilotl (Mat. 5:14-16). Teipa, se keskij tlateuianij katli tlauel mosisiniyayaj, nojkia pejkej kitekipanouaj Jehová pampa toikniuaj amo majmajkej tlajtolmoyauasej.

Paul: Miakpa monejki tikisasej tlen nopa altepetl: expa amo nima titlakuepilijkej uan ompa tiuejkajkej se xiuitl. Se tosiuaikni misionera kiijtok tlen tijyolmatiyayaj: “Ipan Galaad techmachtijkej moneki tikinpaleuisej toikniuaj ika nochi toyolo uan kiampa tijchijkej. Yeka, tlauel techyolkokouayaya pampa tikinkajteuaskiaj toikniuaj”. Maske tiajkej ipan sekinok altepemej tlen nechka mokauayaya, nojua uelki tikinpaleuiaj toikniuaj.

Anne: Ipan mayo 1996, tinauij tikistejkej tlen Betel ipan se carro uan tijuikayayaj amatl tlen tlauel ipati. Monekiyaya tiasej 16 kilómetros uan tijuikasej nopa amatl ipan seyok altepetl kampa amo tleno kipanoskia. Ipan nopa altepetl sampa pejkej moteuiaj. Nopa tlateuianij katli tlauel mosisiniyayaj pejkej tlatotopotsaj uan techojtsakuilijkej, tieyij techtemouijkej uan kiuikakej nopa carro maske Paul nojua itstoya iijtik. Amo tijmatkej tlake tijchiuasej uan nopaya timokajkej. Teipa, tikitakej Paul nejnentiualayaya kampa itstoyaj miakej maseualmej uan ikuaixpa kisayaya estli. Ika nochi tlen panotoya, timoiljuijkej kitoponijtoyaj, pero tlaj kiampa panotoskia amo nejnentiualaskia. Teipa tijmatkej se tlen nopa tlateuianij kimakilik kema kikuatepexiuik tlen nopa carro, yeka amo tlauel kikokojtoyaj.

Nechka tikitakej ijkatoya se carro tlen kitekiuiaj soldados uan nopaya tlejkotoyaj miakej maseualmej katli tlauel momajmatijtoyaj. Nopa carro tlauel temitoya, yeka san timouiyonijkej. Katli kinemiltiyaya nopa carro san nima kistejki uan nechka tiuetsij. Miakpa chikauak tijtsajtsilijkej ma moketsa, pero amo kinejki pampa tlauel momajmatijtoya. Maske kiampa tiauiyayaj, tojuantij kuali timotlatskilijkej. Kema tiasitoj, tlauel timomajmatijtoyaj uan tiuiuipikayayaj pampa tlauel tikuatitoyaj.

Paul: San tijpixtoyaj toyoyo tlen timokentijtoyaj tlen tsayantoya uan sokiyo eltoya. Tlauel timosentlachilijkej pampa amo timijkej. Tikochkej kalteno, inechka se helicóptero tlen tlauel kokoyokatoya pampa kitotopotstoyaj. Uan kema titonilijkej, nopa helicóptero techuikak Sierra Leona. Maske tiyolpakiyayaj pampa timomanauijtoyaj, tlauel techtekipachouayaya tlen kinpanoskia toikniuaj tlen Liberia.

Anne: Tiasitoj Betel tlen Freetown, ipan Sierra Leona, nopaya kuali techmokuitlauiyayaj. Pero pejki nikilnamijki nochi tlen techpanotoya. Mojmostla nimajmauiyaya, nimoiljuiyaya techpanoskia tlen amo kuali. Ika tlayoua niisayaya uan tlauel nimitonijtoya pampa nimajmauiyaya uan nimoiljuiyaya panoskia tlen amo kuali. Ouij nijmatiyaya nitlaijiyotilanas. Paul nechnajnauayaya uan momaijtouayaya nouaya. Tiuikayayaj uikatl tlen tijtekiuiaj ipan tlanechikoli hasta kema ayokmo niuiuipikayaya. Nimoiljuiyaya ayokmo ueliskia nitlatekipanos kej misionera pampa nimoiljuiyaya pejtoya niuiuitia.

Amo kema nikilkauas tlen panok teipa pampa ipan nopa semana tijselijkej ome pilamochtsitsij. Se elki nopa ¡Despertad! tlen junio 8, 1996, nopaya ualayaya se tlamachtili tlen itoka “Qué hacer ante los ataques de pánico”, nopa tlamachtili nechpaleuik ma nijkuamachili tlen nechpanoyaya. Nopa seyok pilamochtsi elki La Atalaya tlen mayo 15, 1996, tlen kiualikayaya nopa tlamachtili “¿De dónde proviene su fuerza?”. Nopaya nesiyaya se papalotl tlen amo kuali kipiayaya ieltlapal uan kiixtomayaya kenijkatsa nopa papalotl nojua ueliyaya patlani uan motlamaka. Sanse kej nopa papalotl, Jehová techpaleuia ika ichikaualis para uelis tikinpaleuisej sekinok maske tlen techpanotok kichiua amo kuali ma tijyolmatikaj. Jehová tlauel nechpaleuik pampa nechmakak ni tlamachtili kema más monekiyaya (Mat. 24:45). Nojkia nechpaleuik pampa nijtemok sekinok tlamachtili tlen nopa kuesoli uan nijnechikok ipan se carpeta. Teipa, ayokmo tlauel nikilnamikiyaya tlen nechpanotoya.

Paul: Kema titlakuepiliyayaj Liberia, tlauel tiyolpakiyayaj pampa tijyolmatiyayaj kejuak tiitstoyaj tochaj. Itlamia xiuitl 2004, nechka tikaxitiskiaj 20 xiuitl ipan nopa altepetl. Ayokmo onkayaya tlauilankayotl uan kiijtouayayaj kichijchiuaskiaj kali Betel. Pero teipa techiljuijkej tlaj ueliskia titlatekipanotij sejkanok.

 Tlauel ouij tijmatkej tikinkajteuasej toikniuaj tlen Liberia pampa tlauel tikinikneliyayaj. Ya tikitstoyaj kenijkatsa Jehová tlauel techteochijtoya kema tiajkej Galaad uan monejki tikinkajteuasej tochampoyouaj. Yeka, tikijtojkej kena tiaskiaj kampa techtitlaniyayaj ipan altepetl Ghana.

Anne: Tlauel tichokakej kema tikistejkej Liberia. Pero tlauel timosentlachilijkej ika tlen techiljuik Frank, se toikni katli ya ueyi uan tlauel tlalnamiki. Ya techiljuik: “Moneki intechilkauasej”. Uan teipa nojkia kiijtok: “Tijmatij amo intechilkauasej, pero moneki inmosentlalisej intlatekipanosej kampa inmechtitlanij. Jehová inmechmakatok ni tekitl, yeka xikinpaleuikaj toikniuaj uan tosiuaikniuaj”. Tlen techiljuik techpaleuik ma timomatikaj ipan nopa altepetl uan ma tikinixmatikaj toikniuaj.

Paul: Nima tikiniknelijkej toikniuaj tlen Ghana. Ipan nopa altepetl itstoyaj miakej toikniuaj. Inijuantij techpaleuijkej amo ma tijtlauelkauakaj Jehová uan nojua kuali ma titlaneltokakaj. Pero kema ya tijuikayayaj 13 xiuitl ipan nopa altepetl, techiljuijkej ma tiakaj altepetl Kenia, ipan kali Betel tlen África Oriental. Maske tlauel tikintemouayayaj toikniuaj tlen Liberia uan Ghana, nima pejki tikinikneliaj toikniuaj tlen Kenia. Uan ipan ni tonali nojua titlatekipanouaj ipan ni altepetl pampa nopaya tlauel monekij tlajtolmoyauanij.

Anne: Ipan nonemilis nechpanotok miak tlamantli tlen tlauel ouij uan tlen nechmajmatijtok. Kema techpano tlen amo kuali, uelis kichiuas ma timokokokaj uan amo kuali ma tijyolmatikaj. Uan ipan ni tonali, Jehová amo techkixtilis nopa tlamantli. Kema nijkaki tlatotopotsaj, peua nielmoyauia uan nimasesepoka. Pero nikitstok kenijkatsa Jehová nechpaleuia ika miak tlamantli, uan kemantika kintekiuia toikniuaj uan tosiuaikniuaj. Nojkia nikitstok tlaj tijchiuaj kampeka kuali timomachtisej Biblia, Jehová techpaleuis nojua ma tijtekipanokaj kampa techtitlani.

Paul: Kemantika techtlatsintokiaj: “¿Inmechpaktia kampa intlatekipanouaj?”. Maske se altepetl uelis eli tlauel yejyektsi, sanima uelis mopatlas kej itstokej uan peuas se kualantli. Pero tlen kichiua más ma tiyolpakikaj elij toikniuaj pampa tikinitaj kej tochampoyouaj. Amo sanse kej techiskaltijkej uan amo tieuaj ipan sanse altepetl, pero nochi tikikneliaj Jehová. Timoiljuiyayaj tojuantij tikinyolchikauaskiaj toikniuaj, pero amo kiampa panok pampa inijuantij techyolchikajkej.

Kema techtitlanij ipan seyok altepetl tikitaj kampa ueli tikinpiaj tochampoyouaj. Tlaj tijtekipanouaj Jehová, nochipa tikinpiasej tochampoyouaj uan kuali tijyolmatisej. Timotemachiaj tlaj amo kema tijtlauelkauaj, ya nochipa techpaleuis kema monekis (Filip. 4:13).