ISRAELEUANIJ tlauel kipatiitayayaj uikatl. Biblia kiijtoua inintoka miakej maseualmej katli tlatsotsonayayaj uan uikayayaj. Se 10% tlen Biblia eli uikatl. Uejkajkia maseualmej uikayayaj tlen ijkuilijtok ipan Salmos, El Cantar de los Cantares uan Lamentaciones. Nopa amochtli Music in Biblical Life (uikatl tlen eltok ipan Biblia), kiijtoua Biblia “kinextia maseualmej nochipa uikayayaj ipan sejse tlamantli tlen kichiuayayaj”.

Uikatl tlen nochipa kitekiuiyayaj. Israeleuanij kinextiyayaj tlen kiyolmatiyayaj ika uikatl (Is. 30:29). Siuamej uikayayaj, mijtotiyayaj uan kitsitsilitsayayaj pandereta kema kitekimakayayaj se akajya kej tlanauatijketl, kema tlaueyichiuayayaj uan kema tlatlaniyayaj ipan se tlauilankayotl (Juec. 11:34; 1 Sam. 18:6, 7; 1 Rey. 1:39, 40). Uan kema mikiyaya se akajya, israeleuanij uikayayaj mijkauikatl (2 Crón. 35:25). Se amochtli kiijtoua “hebreos tlauel kinpaktiyaya uikatl” (Cyclopedia, tlen McClintock y Strong).

Uikatl tlen kitekiuiyayaj ipan kaltlanauatili. Tlanauatianij tlen Israel kinpaktiyaya kikakisej uikatl. Yeka tlanauatijketl Saúl kitlanejki David para ma kitlatsotsonili ika arpa (1 Sam. 16:18, 23). Uan kema David elki tlanauatijketl, pejki kichijchiua tlen ika ueliskia tlatsotsonas, kiijkuilok yejyektsitsij uikatl uan kintlanejki miakej para ma uikatij ipan teokali (2 Crón. 7:6; Amós 6:5). Tlanauatijketl Salomón nojkia kintlalik siuamej uan tlakamej para ma uikakaj ipan kaltlanauatili (Ecl. 2:8).

Uikatl tlen ika kiueyichiuayayaj Jehová. Ipan teokali tlen Jerusalén itstoyaj se 4 mil tlatsotsonanij, sekij kitsiliniyayaj címbalos, kitsotsonayayaj arpas uan kipitsayayaj trompetas (1 Crón. 23:5; 2 Crón. 5:12). Uan miakej israeleuanij nojkia uikatiauiyayaj nopa uikatl tlen kitokaxtiyayaj Uikatl tlen ika Ixtlejkoj kema yauiyayaj Jerusalén para tlaueyichiuatij (Sal. 120-134). Uan se keski amochtli tlen kiijtouayaya tlen kichiuayayaj judíos, kiijtoua israeleuanij uikayayaj nopa Hallel a ipan Pascua.

Ipan ni tonali, ipan Jehová itlanechikol nojkia tijpatiitaj uikatl (Sant. 5:13). Yeka tiuikaj kema tijueyichiuaj Jehová (Efes. 5:19). Uikatl techpaleuia kuali ma timouikakaj ininuaya toikniuaj uan ma tikijiyouikaj tlen ueli tlaouijkayotl (Hech. 16:25; Col. 3:16). Nojkia techpaleuia ma tijnextikaj nelnelia tijneltokaj Jehová uan tlauel tikikneliaj.