Se keski tlamantli tlen techmakaj tlauel tijpatiitaj pampa katli techmakak kipia tekiuejkayotl o pampa tlauel tijpatiitaj. Uan maske kemantika techmakaj se tlenijki tlen amo patiyo, nojkia tlauel tijpatiitaj pampa techmakak se tlen tochampoyouaj o se kuali touampo. Kiampa kipanok Jordan ika tlen Russell kimakak, kej tikijtojkej ipan nopa tlamachtili tlen panok. ¿Kenijkatsa nojkia kiampa pano ika nopa tlaxtlauili tlen toTeotsij techmakatok?

Se: Biblia kiijtoua toTeko “techtitlanilik iKone iyojtsi [...] para ma tijpiakaj yolistli yankuik ipampa ya” (1 Juan 4:9). Ni kichiua ma eli tlauel ipati tlen techmakatok. Amo aka tlauel kipia tekiuejkayotl kej toTeotsij. Se tlakatl kiijtok ni: “Ma kimatikaj maseualmej ta motoka Jehová, san ta tlauel tiUeyi ipan nochi Tlaltipaktli” (Salmo 83:18, TNM). San Jehová tlauel ueyi uan amo kema techmakasej tlen ya techmakatok.

Ome: toTeotsij yaya ‘toTata’ (Isaías 63:16). Ya techmakatok nemilistli. Uan kej kichiua se tlakatl katli tlauel kiniknelia ikoneuaj, ika miak tlaiknelili kuali techmokuitlauia uan amo kema techtlauelkaua. Uejkajkia, toTeotsij kiijtok: “Israelitajmej itstokej nokoneuaj tlen yejyektsitsij. Kena, itstokej keja se tlakatl iokichpil tlen más kiiknelia. [...] Na tlauel nimoyolkuesoua ipampa nokoneuaj, uan nikiniknelia, uan temachtli nikintlasojtlas” (Jeremías 31:20). Ipan ni tonali toTeotsij nojkia tlauel kiniknelia katli kitekipanouaj. Ya amo san se Teotsij tlen tlauel ueyi, nojkia eli toTata uan touampo, uan amo kema techtlauelkauas. Yeka, nochi tlen techmaka nelia tlauel ipati.

Se keski tlamantli tlen techmakaj nelia tlauel tijpatiitaj, pampa katli techmakak nelia tlauel techiknelia uan amo san pampa monekiyaya techmakas. Kema se akajya temaka se tlenijki pampa kipia kuali iyolo amo moiljuia se tonali nojkia kimakasej se tlenijki.

ToTeotsij temaktilik iKone pampa nelia tlauel techiknelia. Biblia kiijtoua: “ToTeko technextilik hasta kanke techiknelia pampa techtitlanilik iKone iyojtsi”. ¿Kenke kiampa kichijki? Pampa kinejki “ma tijpiakaj yolistli yankuik ipampa ya” (1 Juan 4:9). ToTeotsij amo kichiualtijkej ma kichiua nopa. Kema “tlaxtlajki totlauikilis ipampa totlajtlakoljuaj” kinextik kenijkatsa tlauel “ueyi iyolo” (Romanos 3:24).

¿Kenke toTeotsij kinextik “ueyi iyolo” ika nopa tlamantli tlen techmakak? Biblia techixtomilia: “ToTeko technextilik para nelia miak techiknelia pampa Cristo mijki ipampa nochi tojuantij kema noja tieliyayaj titlajtlakolchiuanij” (Romanos 5:8). ToTeotsij tlauel teiknelia, yeka kinejki kinpaleuis maseualmej pampa kinitak teikneltsitsij uan tlajtlakolejkej. Amo kinamikiyaya ma techiknelikaj uan amo kema uelis tijtlaxtlauisej. Maske miak tlamantli techmakatok, san ika nopa kinextijtok kenijkatsa tlauel techiknelia.

Se keski tlamantli tlen techmakaj nojkia tlauel tijpatiitaj pampa katli techmakak monejki kichiuas se keski tlamantli. Kema se akajya kineki techmakas se tlenijki tlen tlauel kipatiita uan kiiknelia, kichiua tojuantij tlauel ma tijpatiitakaj tlen techmaka.

ToTeotsij temakak “iKone iyojtsi” (Juan 3:16). Ya techmaktilik katli nelia tlauel kiiknelia. Ipan nopa miak xiuitl tlen uejkajki kema kichijchijki nochi tlen onka, Jesús nochipa tekitik iuaya uan elki “katli [Jehová] tlauel kiikneliyaya” (Proverbios 8:30, TNM). “Yajaya tlauel kiiknelia” iKone Jesús, katli “itstok iixkopinka toTeko Dios tlen axaka ueli kiita” (Colosenses 1:13-15). San inijuantij nelia tlauel kuali mouikaj uan moikneliaj.

Maske tlauel kiiknelia, “toTeko axkitlasomatki iKone” (Romanos 8:32). Jehová techmakak tlen tlauel kuali katli kipixtoya. Tlauel ouij kimatki kema temaktilik iKone.

Se keski tlamantli tlen techmakaj nojkia tlauel tijpatiitaj pampa uelis techpolouayaya, uelis monekiyaya nima tijpiasej nopa tlamantli. Ma timoiljuikaj tijpiaj se kokolistli tlen kichiuaskia ma timikikaj, uan amo techaxilia totomij tlen ika uelis timopajtisej. Tlaj se akajya techtlaxtlauiliskia nochi tlen monekis kema timopajtisej, nelia tlauel tijtlaskamatiliskiaj uan tlauel tijpatiitaskiaj.

“Pampa Adán tlajtlakolchijki uejkajkia, nochi tlakamej moneki ma timikikaj. Pero nojkia pampa san se tlakatl, Jesucristo, moyolkuik, nochi tlakamej uelis moyolkuisej” (1 Corintios 15:22). Tiikoneuaj Adán amo san ‘timikij’ pampa amo tiuelij timomanauiaj tlen kokolistli uan mikilistli, nojkia pampa amo tiuelij timoyoltlaliaj iuaya toTeotsij uan kiampa tiitstosej tixitlauakej iixpa. Uan pampa san timaseualmej, amo tiuelij tijyolkuij yon se maseuali. Biblia kiijtoua maseualmej “axuelis kimakixtisej se ininikni” uan “axaka uelis kitlaxtlauis toTeko Dios para ma kimakixtis” (Salmo 49:7, 8). Tlauel moneki nima ma techpaleuikaj, pampa toselti amo uelis timomakixtisej.

Pampa tlauel teiknelia, Jehová kejuak tlaxtlajki tlen monekiyaya kema temaktilik Jesús uan kiampa ueliskia timomakixtisej. ¿Kenijkatsa techpaleuia nopa  tlaxtlauili? “Ieso Jesucristo, iKone toTeko, techyolpajpaktinemis tlen nochi tlajtlakoli”. Uajka, tlaj tojuantij titlaneltokasej ipan Jesús imikilis, uelis techtlapojpoljuisej uan tiitstosej nochipa (1 Juan 1:7; 5:13). ¿Uan kenijkatsa nopa tlaxtlauili uelis kinpaleuis tochampoyouaj katli ya miktokej? “Ika tlen kichijki san se tlakatl, Jesucristo, ama tlakamej ueli moyolkuisej” (1 Corintios 15:21). *

Amo onka seyok tlamantli tlen tlauel ipati katli techmakatokej, san Jesús imikilis. Katli techmakak nelia tlauel ueyi uan kichijki pampa tlauel techiknelia. Amo aka kichijtok kej Jehová, pampa san ya techmakak tlen tlauel kiiknelia uan kipatiita. Uan amo onka seyok tlamantli tlen tlauel monekiyaya ma techmakakaj, pampa techmakixtia tlen tlajtlakoli uan mikilistli. ¡Ni kinextia san nopa tlaxtlauili tlen toTeotsij temakak nelia tlauel ipati!