Nochipa nechpaktijtok nikitas tlen onka ipan. Tlaltipaktli, kej kuatitlamitl uan tlapialmej. Yeka, ipan nopa altepetl Jyväskylä (Finlandia), kampa tiitstoyaj, nochipa niauiyaya ininuaya nochampoyouaj kampa onkayaya miak kuatitlamitl uan kampa onka akomoli. ¡Tlauel nechpaktia tlapialmej! Yeka, kema nojua niokichpil nieliyaya nikinnajnauayaya chichimej uan mistomej katli nikinitayaya. Kema nimoskaltik, tlauel nechyolkokouayaya kema nikitayaya kenijkatsa kintlaijiyouiltiaj tlapialmej. Yeka, pejki nikinpaleuia sekinok katli nojkia kinmanauiyayaj tlapialmej. Nopaya nikinixmatki sekinok maseualmej katli nojkia moiljuiyayaj kej na.

Tijchiuayayaj se keski tlamantli pampa tijnekiyayaj maseualmej amo ma kintlaijiyouiltikaj tlapialmej. Tijmoyajkej miak amatl uan tikintlaneuiyayaj sekinok ma yakaj touaya kampa tijnextiyayaj amo techpaktiyaya tlen kichiuayayaj katli kinnamakayayaj ininkuetlaxo tlapialmej uan kampa kintekiuiyayaj tlapialmej ipan laboratorios. Teipa, tijtlalijkej se katli kinmanauiyaya tlapialmej uan ya techyakanayaya. Tlen tijchiuayayaj amo kuali kiitayayaj tekichiuanij, yeka techtlatsakuiltiyayaj. Miakpa nechitskijkej uan nechteljuijkej.

Nojkia, nechtekipachouayaya sekinok tlamantli. Yeka, nikalajki ipan Amnistía Internacional y Greenpeace, uan mojmostla nitlapaleuiyaya nopaya. Nojkia, nikinpaleuiyaya katli amo tlauel tlapijpiaj o teikneltsitsij.

Teipa, nikitak amo ueliskia nijpatlas kej maseualmej moiljuiaj. Maske kemantika kena tikintlaniyayaj ika kuesoli tlen amo uejueyi, nopa amo techpaleuiyaya pampa san kichiuayaya ma momiakili sekinok kuesoli. Nikitayaya kenijkatsa maseualmej amo kintekipachouayaya tlen panoyaya. Nijmatiyaya ayokmo tleno ueliyaya nijchiua.

Pejki nimoyoliljuia ipan toTeotsij uan ipan tlen Biblia tlamachtia pampa nijmatiyaya ayokmo tleno ueliyaya nijchiua. Maske achtouia nimomachtijtoya ininuaya Jehová itlajtoltemakauaj uan nijpatiitayaya pampa nechikneliyayaj uan kinextiyayaj motekipachoua ika tlen nechpanoyaya, ipan nopa tonali nojua ayamo nijnekiyaya nijpatlas kej nimonejnemiltiyaya. Uan nama, ayokmo kiampa nimoiljuiyaya.

Nijtemok noBiblia uan pejki nijpoua. ¡Nelia tlauel nechyolchikajki! Nijpojki miak textos kampa kiijtoua kenijkatsa moneki tikinitasej tlapialmej. Nijpojki Proverbios 12:10 kampa kiijtoua: “Se katli kuali monejnemiltia kinmokuitlauia tlapialmej” (La Palabra de Dios para Todos). Nojkia, nikitak toTeotsij amo kichiua ma titlaijiyouikaj. Maseualmej tlaijiyouiaj pampa amo kichiuaj tlen Jehová tlanauatia. Asik ipan noyolo kema nikitak Jehová tlauel teiknelia uan kipia iyolo (Salmo 103:​8-14).

Ipan nopa xiuitl nijpantik se pilamatsi kampa ueliskia nitlajtlanis amochtli ¿Tlake nelnelia tlamachtia Biblia?, uan nitlajtlanki. Nima techpaxaloko se toikni iuaya isiua uan nechiljuijkej tlaj nijneki nimomachtis. Uan pejki nimomachtia ininuaya uan pejki nimosentilia. Ika yolik pejki nijkuamachilijtia tlen melauak tlamachtia Biblia uan asik ipan noyolo.

Kema pejki nimomachtia Biblia pejki nijpatla se keski tlamantli. Ayokmo nitlachichinki, ayokmo nitlaik, pejki kuali nimoyoyontia, ayokmo nikijtouayaya tlamantli tlen amo kuali uan pejki nikintlepanita tekichiuanij (Romanos 13:⁠1). Nojkia, nijpatlak se keski tlamantli ipan nonemilis uan tlen nijchiuayaya.

Tlauel ouij nijmatki nikinitas kej kinamiki katli moiljuiyayaj kikualtlalisej tlen pano ipan Tlaltipaktli. Yeka, amo nima nijpatlak kej nimoiljuiyaya. Nijmatiyaya kejuak nikintlauelkajtoya. Teipa, nikitak san toTeotsij iTlanauatijkayo kichiuaskia kuali ma tiitstokaj, yeka nimosentlalik nikinmachtis sekinok (Mateo 6:33).

Kema nijnekiyaya nijpatlas tlen tekichiuanij kichiuaj, nijchiuayaya ome pamitl maseualmej: tlen kualmej uan tlen amo kualmej, uan nochipa timokualaniyayaj ininuaya katli kichiuayayaj tlen amo kuali. Biblia kipatlak nonemilis pampa nama ayokmo nitekualankaita uan nijchiua kampeka nikiniknelis sekinok (Mateo 5:44). Uan nopa tlaiknelili nijnextia kema nikinmachtia sekinok tlen Toteotsij iTlanauatijkayo. Tlauel niyolpaki pampa tlen tijmoyauaj kinpaleuia sekinok kuali ma itstokaj uan ma yolpakikaj, uan ma motemachikaj kiselisej tlen Jehová kitenkajtok.

Nochi tlen nechkuesoua nikiljuia Jehová, uan nopa kichiua kuali ma nijyolmati. Nimotemachia Jehová amo kinkauas maseualmej uan tlapialmej nojua ma tlaijiyouikaj yon kinkauas sekinok ma kinempolokaj Tlaltipaktli. ToTeotsij iTlanauatijkayo nechka kikualtlalis tlen maseualmej kinempolojtokej (Isaías 11:1⁠-9). Tlauel niyolpaki pampa nijmati tlen melauak uan nojkia pampa nikinpaleuia sekinok ma motemachikaj ipan tlen toTeotsij mosentlalijtok kichiuas. Nama, ayokmo nijneki nijpatlas tlen kichiuaj maseualmej.