Se tetaj kiiljuia ikone katli kipia chikome xiuitl: “Uejkajkia, toTeko kichijchijki Tlaltipaktli uan nochi tlen nikaj onka. Nojkia kichijchijki Tonati, metstli uan sitlalimej”. Nopa okichpil moiljuia ipan tlen itata kiiljuik uan teipa kitlajtlania: “Pa... ¿uan ajkia kichijchijki toTeotsij?”.

Nopa tetaj kiiljuia: “Amo aka, toTeotsij nochipa itstok”. Kema kiampa kiiljuia, nopa okichpil ayokmo tleno kiijtoua. Uan kema moskaltia sampa peua moiljuia ipan nopa tlamantli. Ouij kimati kikuamachilis itstok se akajya katli amo aka kichijchijki. Uan moiljuia: “¿Nopa nelnelia? Pampa nochi tlen onka kipixki ipejya”. Uan ya nojua motlajtlania: “¿Ajkia kichijchijki toTeotsij?”.

Biblia nojkia kiijtoua tlen nopa tetaj kiiljuik ikone. Moisés kiiljuik toTeotsij: “Hasta kema aya tikinchijchiuayaya tepetinij uan Tlaltipaktli, ta ipa tiitstok. Pampa ta, tiToteko Dios, axkema tijpixki mopejya, uan axkema tijpias motlamia” (Salmo 90:1, 2). Tlajtolpanextijketl Isaías nojkia kiijtok: “¿Axinkikaktokej para toTeko yajaya nopa Dios tlen itstok para nochipa?” (Isaías 40:28). Uan tlen kiijkuilok Judas kinextia toTeotsij “nochipa” itstok (Judas 25).

Ni textos kinextia toTeotsij eli nopa “Tlanauatijketl tlen tlanauatis para nochipa” kiampa kiijtok apóstol Pablo (1 Timoteo 1:17). Nopa kiijtosneki toTeotsij nochipa itstok pampa amo kipixki ipejya, uan nochipa itstos (Apocalipsis 1:8). Uajka, san toTeotsij amo aka kichijchijki uan amo kema mikis.

¿Kenke tlauel ouij tijmatij tijkuamachilisej ni tlamantli? Pampa tonemilis amo uejkaua, yeka amo tikitaj tonali kej Jehová kiita. Ya kiita mil xiuitl kej se tonali pampa nochipa itstok (2 Pedro 3:8). Ma timoiljuikaj ipan ni tlamantli. Se chapolij itstok san 50 tonali uan tojuantij tiitstokej 70 o 80 xiuitl, yeka amo kikuamachilia tlake kiijtosneki tiitstos miak xiuitl. Tojuantij tielij kej nopa chapolij kema timoiljuiaj toTeotsij nochipa itstok. San Jehová tlauel tlalnamiki uan tojuantij amo (Isaías 40:22; 55:8, 9). Yeka onka se keski tlamantli tlen toTeotsij tlen ouij tijmatij tijkuamachilisej.

Maske ouij tijmatij tijkuamachilisej toTeotsij nochipa itstok, kena uelis tijkuamachilisej. Tlaj se akajya kichijchijtoskia toTeotsij, ya eliskia katli kichijchijki nochi. Uan Biblia kiijtoua toTeotsij kichijchijki “nochi tlen onka” (Apocalipsis 4:11). Nojkia tijmatij se tonali iluikaktli uan Tlaltipaktli amo eltoya (Génesis 1:1, 2). Nopa kiijtosneki katli kichijchijki ipa itstoya. Uan teipa kichijchijki iKone uan iluikaeuanij (Job 38:4, 7; Colosenses 1:15). Uajka ni kinextia achtouia toTeotsij itstoya iselti, yeka ya amo aka kichijchijki.

Tonemilis uan nochi tlen onka ipan iluikak uan Tlaltipaktli kinextia itstok se Teotsij katli nochipa itstok. Ya kichijchijki nochi tlen onka kej kinamiki uan kiampa nochi kuali eltos. San ya uelki kichiua ma onka nemilistli (Job 33:4).