Maske katli ixtlamatij nojua kichijtiasej miak tlamantli, ¿uelis kichiuasej kuali ma itstokaj uan ma kintekipacho tlen kinpano sekinok? Uelis amo. Maseualmej kitemouaj san tlen inijuantij kinpoloua. Maske kiampa pano, toTeotsij kineki nochi ma kipiakaj san tlen kuali. (Xijpoua 2 Pedro 3:13.)

Biblia kiijtoua teipa ipan nochi Tlaltipaktli nochi moiknelisej, kuali itstosej uan amo aka kinchiuilis tlen amo kuali. (Xijpoua Miqueas 4:3 uan 4.)

Kema toTeotsij kichijki Adán, amo kichijki ma kitemo san tlen ya kinekiyaya, pampa kichijki amo tlajtlakole. Uan kema amo kineltokak toTeotsij, elki tlajtlakole. Ya techpanoltilik tlajtlakoli uan nojkia kichiua ma tijtemokaj san tlen tojuantij techpoloua. Maske kiampa tiitstokej, toTeotsij kichiuas ika Jesús ayokmo ma tijpiakaj tlajtlakoli. (Xijpoua Romanos 7:21, 24 uan 25.)

Jesús kichijki tlen toTeotsij kinekiyaya, yeka motemaktilik uan kej nopa ueliskia kitlamiltis tlajtlakoli (Rom. 5:19). Kiampa, Jesús kichiuas kuali ma itstokaj nochi maseualmej, ayokmo ma kitemokaj san tlen inijuantij kinpoloua yon ma tlajtlakolchiuakaj. (Xijpoua Salmo 37:9-11.)