1. ¿Tlake kichijki se iluikaejketl katli eliyaya Jehová iuampo?

SE ILUIKAEJKETL katli eliyaya Jehová iuampo kinejki yaya ma kiueyichiuakaj uan amo toTeotsij. Pampa nochipa moyoliljuijtoya nopa, tlajtlakolchijki (Sant. 1:14, 15). Kiijixnamijki Jehová, yeka “nochi istlakayotl peua ika ya” (Juan 8:44). Maske amo tijmatij kenijkatsa motokaxtiyaya, nama tikiljuiaj Satanás.

2, 3. ¿Kenke Jehová ikualankaitaka kitokaxtiaj “Satanás”, “Diablo”, “kouatl” uan “dragón”?

² Satanás tlauel kikualankaita Jehová uan maseualmej. Biblia kiijtoua kichiua tlen tlauel amo kuali. Kitokaxtia Satanás, ni kiijtosneki “tlaijixnamijketl”. Kiampa kitokaxtia pampa kikualankaita Jehová itlanauatijkayo uan kejuak moteuijtok iuaya. Satanás amo kineki ma tlanauati Jehová.

³ Ipan Apocalipsis [Revelación] 12:9 kitokaxtiaj Diablo. ¿Kenke? Pampa nopa tokajyotl kiijtosneki “teistlakauijketl”. Uan Satanás kiijtok Jehová san tekajkayaua. Nojkia kiiljuiaj “kouatl [tlen] uejkajkia” pampa kitekiuik se kouatl kema kikajkayajki  Eva. Uan kiiljuiaj “ueyi dragón” pampa kejuak se temajmati tlapiali uan tlen techiuilia tlen amo kuali. Ya amo kineki Jehová ma kichiua tlen mosentlalijtok, uan kineki kintlamiltis nochi itekipanojkauaj.

4. ¿Tlake tikitasej ipan ni tlamachtili?

⁴ Satanás tlauel kikualankaita Jehová uan itekipanojkauaj. Kineki ayokmo ma tijtekipanokaj Jehová, yeka Biblia kiijtoua: “Xitlachixtokaj, pampa [Diablo], yajaya inmokualankaitaka, nemi kampa ueli keja se tekuani tlen kitemojtinemi ajkeya uelis kitsontlamiltis” (1 Ped. 5:8). Ipan ni tlamachtili tikitasej eyi tlamantli tlen kinextis kenke moneki ma timomokuitlauikaj tlen Satanás.

5, 6. 1) ¿Tlake kinextia iluikaeuanij kipiaj miak chikaualistli? 2) ¿Kenke Biblia kiijtoua Satanás uelis kichiuas ma timikikaj?

⁵ Iluikaeuanij kipiaj miak chikaualistli (Sal. 103:20). Tlauel tlalnamikij uan kipiaj miak tetikayotl, uan tojuantij amo. Nopa kuali iluikaeuanij kitekiuiaj inintetikayo tlen ika kichiuaj kuajkuali tlamantli. Uejkajkia, se iluikaejketl kinmiktik 185,000 soldados san ipan se youali. Se akajya o tlateuianij amo ueltoskiaj kichiuasej nopa (2 Rey. 19:35). Seyok tonali, se iluikaejketl kinkixtik apóstoles kampa kintsaktoyaj. Kaltlapok, kinkixtik uan sampa kitsajki uan katli tlamokuitlauijtoyaj amo kiitakej (Hech. 5:18-23).

⁶ Uajka, kuali iluikaeuanij kichiuaj tlen kuali ika inintetikayo. Uan Satanás katli kipia miak chikaualistli, kitekiuia tlen ika kichiua tlen amo kuali. Yeka, Biblia kiijtoua ya “tlanauatia ipan ni Tlaltipaktli” uan yaya ininteotsij (Juan 12:31; 2 Cor. 4:4). Nojkia kiijtoua uelis kichiuas “ma onka mikistli” (Heb. 2:14). Ni amo kiijtosneki yaya kinmiktia nochi maseualmej. Uajka, ¿kenke Biblia kiijtoua kichiua “ma onka mikistli”? Se. Pampa kichiua ma mokualankaitakaj uan ma mosisinikaj maseualmej. Ome. Pampa kichijki Adán uan Eva ma tlajtlakolchiuakaj, yeka titlaixpanoj uan timikij (Rom. 5:12). Yeka Jesús kiijtok Satanás se temiktijketl (Juan 8:44). Uajka, Satanás nelia kipia miak chikaualistli.

7. Xikijto tlake tlen uala ipan Biblia kinextia amo kuali ajakamej kipiaj miak chikaualistli.

⁷ Kema tikijixnamikij Satanás nojkia tikinijixnamikij amo kuali ajakamej katli kiijixnamijkej toTeotsij (Apoc. 12:3, 4). Biblia kinextia kipiaj miak chikaualistli uan tojuantij amo, uan nojkia kiijtoua uelis tlauel techtlaijiyouiltisej (Mat. 8:28-32; Mar. 5:1-5). Amo kema ma tikilkauakaj Satanás uan amo kuali ajakamej kipiaj miak chikaualistli (Mat. 9:34). Tlaj techpaleuis Jehová uelis tikintlanisej.

8. 1) ¿Tlake kineki kichiuas Satanás? (Xikita nopa achtoui tlaixkopinkayotl.) 1) ¿Kenke timoiljuia katli itstokej ipan Tlaltipaktli nojkia techiuiliaj tlen tlauel amo kuali kej Satanás?

⁸ Satanás tlauel tetlaijiyouiltia. Ipan párrafo 4 kiijtoua ya kej se león tlen nanalka pampa mayankamiki. Maske kinauatia Tlaltipaktli, nojkia kineki kichiuas sekinok tlamantli (1 Juan 5:19). Kineki kintsontlamiltis katli motemachiaj yasej iluikak uan nojua itstokej ipan Tlaltipaktli uan nopa “sekinok tlakamej” katli motemachiaj itstosej ipan Tlaltipaktli (Juan 10:16; Apoc. 12:17). Yeka, kichijtok ma kintlaijiyouiltikaj  ipan nopa achtoui cien xiuitl kema ya ualajtoya Jesús uan ipan ni tonali.

9, 10. 1) ¿Kenijkatsa Satanás kinejki kintsontlamiltis israeleuanij? 2) ¿Kenke tlauel kinekiyaya kichiuas nopa? 3) ¿Kenijkatsa timoiljuia kiyolmati Satanás kema se Jehová itekipanojka kichiua se ueyi tlajtlakoli?

⁹ Se león katli mayantok amo kitekipachoua nopa tlapiali tlen kimiktis. Uan Satanás nojkia amo kitekipachoua katli kintlaijiyouiltia. Yeka, kema kinejki kintsontlamiltis israeleuanij, kichijki se keskij kej Zimri ma tlajtlakolchiuakaj kema momekatijkej uan sekinok kej Giezi ma kikuikaj tlen amo ininaxka. Satanás tlauel kintlaijiyouiltik uan tlauel yolpajki kema uelki kichijki nopa (Núm. 25:6-8, 14, 15; 2 Rey. 5:20-27).

¹⁰ ¿Kenke tlauel kinekiyaya kintsontlamiltis? Pampa kimatiyaya nopa Mesías ualaskia tlen Israel, kitsontlamiltiskia uan kinextiskia san Jehová kinamiki tlanauatis (Gén. 3:15). Satanás amo kinekiyaya kuali ma itstokaj Jehová iixpa, yeka kitemolik ma tlajtlakolchiuakaj. Ya amo kitekipachok kema David momekatik yon kema Moisés ayokmo uelki panok ipan nopa tlali tlen toTeotsij kiniljuijtoya kinmakaskia. Ya tlauel yolpaki kema se toTeotsij itekipanojka kichiua se ueyi tlajtlakoli, pampa kiampa kipinaualtia Jehová (Prov. 27:11).

11. ¿Kenke uelis Satanás kiyejyekok Sara?

¹¹ Satanás tlauel kinkualankaitayaya katli kitlakatiltiskiaj Mesías. ¿Tlake panok kema Jehová kiiljuik Abraham kichiuaskia ma elikaj “tlauel miak tlakamej ipan inintlal”? (Génesis 12:1-3.) Kema Abraham uan Sara itstoyaj ne Egipto, nopa tlanauatijketl kiuikak Sara pampa kinekiyaya mosiuajtis  iuaya, uan Jehová kimanauik (xijpoua Génesis 12:14-20). Kema nechka tlakatiskia Isaac nojkia kej nopa kinejki kichiuas seyok tlanauatijketl ne Gerar (Génesis 20:1-7). ¿Uelis Satanás kichijki ni tlanauatianij ma kiixtokakaj Sara? Maske Biblia amo kiijtoua, moneki ma tikilnamikikaj ya kikajtoya nochi tlen kipixtoya pampa yajki itstoti ipan yoyonkali. Uelis Satanás kinekiyaya kiyoltilanas ika tlen kipixtoyaj tlanauatianij uan kinekiyaya ma kitlauelkaua iueue uan Jehová. Satanás tlauel kipaktijtoskia Sara ayokmo ma mochiua se tlen Mesías ichampoyouaj. Amo kitekipachouayaya tlaj kichiuaskia ayokmo kuali ma itsto iuaya iueue, tlaj sekinok moiljuiskiaj kichiuas tlen amo kuali o tlaj ayokmo kuali mouikaskia iuaya Jehová. ¡Satanás nelia techiuilia tlen tlauel amo kuali!

12, 13. 1) ¿Tlake kichijki Satanás kema tlakatki Jesús? 2) ¿Kenijkatsa timoiljuia kinita Satanás telpokamej katli ipan ni tonali kitekipanouaj Jehová?

¹² Teipa, kema Jesús tlakatki, Satanás amo kiitak kej se yejyektsi pilkonetsi. Ya kimatiyaya eliyaya se tlen Abraham ichampoyouaj, yaya eliskia nopa Mesías uan kimatiyaya Jesús kitlamiltiskia nochi tlen Diablo kichijtok (1 Juan 3:8). ¿Moiljuik tlauel amo kuali tlaj kimiktiskia se okichpil? Amo. Ya amo kineki kimatis tlake kuali uan tlake amo kuali. Yeka, nimantsi kitemolik kenijkatsa kimiktiskia Jesús. ¿Tlake kichijki?

¹³ Kema Herodes kimatki “inintlanauatijka israelitajmej” tlakatki, tlauel kualanki uan kinejki kimiktis (Mat. 2:1-3, 13). Yeka tlanauatik ne Belén uan ipan sekinok altepemej ma kinmiktikaj nochi okichpilmej tlen kipixtoyaj ome xiuitl o ayamo (xijpoua Mateo 2:13-18). Jesús momanauik kema kinmiktijkej. Ni kinextia Satanás amo kipatiita maseualmej ininnemilis yon okichpilmej ininnemilis. Satanás nelia kejuak se león tlen tlauel mosisinia. Amo kema ma tikilkauakaj techiuilia tlen tlauel amo kuali.

14, 15. ¿Kenijkatsa tekajkayaua Satanás?

¹⁴ Jehová tlauel teiknelia (1 Juan 4:8). Satanás kinkajkayaua maseualmej kema kineki ma kiijixnamikikaj toTeotsij. Yeka, kichiua amo ma kimatikaj “moneki momachtisej toTeotsij iTlajtol”. Kiampa amo kiitaj moneki mouampojchiuasej iuaya toTeotsij (Mat. 5:3, TNM). Miakej kinkajkayajtok, yeka amo kiyekouaj katli melauak tlen toTeotsij (2 Cor. 4:4).

¹⁵ Satanás kimati Jehová kineki san ya ma tijueyichiuakaj (Éx. 20:5). Yeka tekajkayaua ika religiones tlen amo melauak. Tlauel yolpaki kema kichiua amo ma kiueyichiuakaj Jehová, uan kena ma kinueyichiuakaj ininchampoyouaj katli ya mijkej, tlamantli tlen onka, tlapialmej uan sekinok tlamantli. Maske moiljuiaj kipaktia toTeotsij, tlen kineltokaj uan tlen ika tlaueyichiuaj san tlapik. Kema itstoya Isaías nojkia kej nopa panoyaya ika israeleuanij. Jehová kinejki kinpaleuis, yeka kiniljuik nopa religión tlen amo melauak eliskia kej amo kuali tlakualistli uan kiniljuik amo kinamikiyaya kiixtlauasej tlen amo kuali tlakualistli. Uan nojkia kiniljuik: “Kuali xinechtlakakilikaj. Na niinmechiljuis kanke uelis inkipantisej nopa tlakualistli tlen achi kuali” (Is. 55:2).

16, 17. 1) ¿Kenke Jesús kiiljuik Pedro: “Xinechtlalkaui, Axkualtlakatl”? 2) ¿Kenijkatsa kitemolia techkajkayauas Satanás?

 ¹⁶ Satanás nojkia uelis kinkajkayauas toTeotsij itekipanojkauaj. Kema Jesús kiniljuik itokilijkauaj nechka mikiskia, Pedro pampa tlauel kiikneliyaya Jesús, kiiljuik: “Ma toTeko Dios mitspaleui, noTeko, para ni tlaijiyouilistli ma axmitsasi”. Uan Jesús kinankilik: “Xinechtlalkaui, Axkualtlakatl” (Mat. 16:22, 23). Jesús kiiljuik nopa pampa kimatiyaya monekiyaya mikis uan kiampa kinmakixtiskia nochi uan kinextiskia san istlakati Satanás. Ni eliyaya tlauel ipati, yeka monekiyaya kichiuas tlen kinamikiyaya. Satanás tlauel yolpaktoskia tlaj Jesús kiilkajtoskia tlen monekiyaya kichiuas.

¹⁷ Nochi katli kichiuaj tlen amo kuali nechka kintsontlamiltisej. Maske tiitstokej ipan tonali kema panos tlen tlauel ipati, Satanás kineki amo ma timoisiuiltikaj tijchiuasej tlen moneki uan ma timosentlalikaj san timoyolpakiltisej. Kineki ma timoiljuikaj poliui miak o amo kema asis itlamia nochi. Nopa san se istlakatili. Yeka, kuali ma titlachixtokaj uan amo ma tikilkauakaj tiitstokej ipan itlamia tonali (Mat. 24:42).

18, 19. 1) ¿Tlake kineki Satanás ma tijneltokakaj? 2) ¿Kenijkatsa techpaleuia Jehová?

¹⁸ Satanás kineki ma tijneltokakaj Jehová amo techiknelia uan amo kema techtlapojpoljuis. Nopa nojkia san se istlakatili. Biblia kiijtoua: “ToTeko Dios nochipa kichiua tlen xitlauak. Yajaya axkiilkauas nopa tekitl tlen inkichijtokej pampa inkiikneliaj” (Heb. 6:10). Uajka, Jehová kipatiita nochi tlen tijchiuaj (xijpoua 1 Corintios 15:58). Jehová san Satanás amo kiiknelia uan amo kitlapojpoljuis. Uajka, amo ma tijkauakaj Satanás ma techkajkayaua.

¹⁹ Maske Satanás kipia miak chikaualistli, techiuilia tlen tlauel amo kuali uan kineki techkajkayauas, uelis tijtlanisej pampa Jehová techpaleuia. Biblia techiljuia tlake kitekiuia Satanás tlen ika temasiltia uan kiampa kuali ma titlachixtokaj (2 Cor. 2:11). Moneki tijmatisej ika tlake temasiltia uan amo tijnekisej tijchiuasej. Yeka Biblia kiijtoua: “Ximoketsakaj keja intemachmej iixpa Axkualtlakatl uan amo xijchiuakaj tlen kineki xijchiuakaj, uan yajaya inmechtlalkauis” (Sant. 4:7). Ipan nopa seyok tlamachtili tikitasej kenijkatsa Satanás amo uelis techkajkayauas ika eyi tlamantli.