Paul, katli mosiuajtitok uan kinpia omej ikoneuaj, kiijtoua: “Kema ipan toaltepe tlauel patiyojki nochi, onkayaya kentsi tlakualistli uan tlauel patiyo kinamakayayaj. Miakpa, maske miak horas nimochiayaya kampa tlanamakaj, kema na nipanoyaya ayokmo tleno mokauayaya. Maseualmej tlauel kelentikej nesiyayaj uan tlapolouayayaj ojtipa pampa mayanayayaj. Tlakualistli nimantsi tlauel patiyojki, ipati eliyaya millones, uan teipa, miles de millones. Totomij ayokmo kipixtoya ipati. Nijpolok nochi notomij tlen nijpixtoya ipan banco, nopa seguro uan tlen nechmakaskiaj kema ayokmo nitekitiskia”.

Paul kimatiyaya tlaj kinekiyaya kinmanauis ichampoyouaj, monekiyaya kichiuas tlen kinpaleuiskia (Prov. 3:21). Ya kiijtoua: “Maske nieliyaya nielectricista, nijchiuayaya tlen ueli tekitl maske amo miak nechtlaxtlauiyayaj. Sekij san nechmakayayaj tlakualistli o sekinok tlamantli. Tlaj nechmakayayaj naui xapoj, nimokauiyaya ome uan nijnamakayaya ome. Teipa nikinkojki 40 pilpiyotsitsij uan nikiniskaltik, nikinnamakak uan sampa nikinkojki 300 pilpiyotsitsij. Teipa 50 piyomej nikinpatlak ika ome koxtali ika tixtli tlen 50 kilos. Ika nopa uejkajki nikinpanoltik nochampoyouaj uan sekinok”.

Paul kimatiyaya tlauel monekiyaya motemachis ipan toTeotsij. Pampa kema tijneltokaj, ya techpaleuia. Jesucristo kiijtok kema tijtemosej tlen tijkuasej amo kinamiki tlauel timotekipachosej, uan kiijtok: “InmoTata kimati moneki nochi ni tlamantli para ika inmopanoltisej” (Luc. 12:29-31).

Uan Satanás, katli toTeotsij ikualankaitaka kichijtok miakej ma moiljuikaj tlauel moneki san tlapijpiasej. Yeka tlauel kintekipachoua kipiasej nochi tlen nelia o tlen san moiljuiaj kinpoloua, uan kichiuaj se ueyi kampeka kipiasej nopa. Miakej tlauikaj miak tomij, yeka kema kinpano tlen  amo kuali kiitaj kejuak eliskiaj inintlatekipanojkauaj “tlen kitlauikiliaj tomij” (Prov. 22:7).

Sekij amo kuali kitlapejpeniaj tlen kichiuaj. Paul kiijtoua: “Miakej kinkajkej ininchampoyouaj uan ininuampoyouaj pampa yajkej tekititoj ipan seyok altepetl. Sekij amo kipiayayaj ininama kampa yajkej, yeka amo kintekimakakej. Kemantika motlatiyayaj uan kiampa amo kinitayayaj policías o san ojtipa kochiyayaj. Amo kiiljuijkej toTeotsij ma kinpaleui. Na ika nochampoyouaj timosentlalijkej sansejko tikijiyouisej nopa kuesoli uan tikiljuijkej toTeotsij ma techpaleui”.

Paul kiijtoua: “Jesús kiijtok: ‘Uajka amo ximokuesokaj tlen uelis panos mostla. Pampa mojmostla tijpantijtiauij kuesoli. Mojmostla achi kuali san timoiljuisej tlen nopa kuesoli tlen nopa tonal kiualikak’. Yeka mojmostla nijtlajtlaniyaya toTeotsij tlen tijkuaskiaj. Uan kej Jesús kiijtok, toTeotsij techmakak tlen monekiyaya, maske kemantika amo tijpiayayaj tlen tlauel techpaktiyaya. Se tonali nimochixtoya kampa tlanamakaj maske amo nijmatiyaya tlake kinamakayayaj. Kema nipanok nikitak kinamakayayaj yogur. Uan na amo nechpaktia yogur. Pampa eliyaya tlakualistli san inoj tijkuajkej ipan nopa youali. Nelia tlauel nijtlaskamatilia toTeotsij pampa ipan nochi nopa tonali nochipa tijpixkej tlen ika timopanoltijkej. *

”Nama kena tijpiaj tlen ika timopanoltiaj. Tlen ika techpanok tijmatkej tlaj timotemachisej ipan Jehová * techpaleuis amo tlauel timotekipachosej. Tlaj tijchiuasej tlen kipaktia, ya nochipa techpaleuis. Tikitakej nelia tlen kiijtoua Salmo 34:8: ‘Inkiitasej para [Jehová] melauak kuali iyolo touaya. Ueyi pakilistli kipiaj nochi tlakamej tlen ipan ya motemachiaj’. Yeka, amo tlauel techtekipachoua tlaj sampa tlauel tlapatiyouas.

”Maseualmej uelis momanauisej ika tlakualistli, amo ika se tekitl yon ika tomij. Yeka tijnekij ma moaxiti ni tlajtoli: ‘Onkas miak trigo ipan nochi nopa tlali’. Uajka tiyolpakisej ika tlen tijkuasej uan ika tlen timokentisej. Biblia nojkia kiijtoua: ‘Amo xikixtokakaj inkipiasej miak tomij. Más kuali xipakikaj ika tlen inkipiaj pampa toTeko Dios kiijtojtok: “Axkema niinmechkajteuas, nochipa niitstos inmouaya”’. * Ni tlajtoli tlauel techyolchikaua.”

Moneki kuali titlaneltokasej ipan toTeotsij, kiampa tijnekisej yaya ma techyakana kej kichijki Paul uan ichampoyouaj (Gén. 6:9). Tlaj nama o teipa amo tijpiasej tlen ika timopanoltisej, tlen Paul kichijki tlauel techpaleuis.

¿Uan tlaj techtekipachoua nopa kuesoli tlen tijpiaj ika tochampoyouaj?