Amo aka kineki tetlaijiyouiltis, tekajkayauas o techiuilis tlen amo kuali. Nochi kinekij kichiuasej tlen kuali. Uajka, ¿kenke tlauel onka tlen amo kuali, kualantli uan tlen amo xitlauak? Mojmostla tikitaj miak tlamantli tlen tlauel amo kuali. ¿Ajkia kinyololinia ma kichiuakaj nopa? (Xijpoua 1 Juan 5:19.)

¿Kichijki toTeotsij ma tijnekikaj tijchiuasej san tlen amo kuali? Amo. Ya techchijki kej ya itlachialis uan kej ya kichiua. Nojkia kichijki ma titeiknelikaj (Gén. 1:27; Job 34:10). Uan nojkia kichijki tojuantij ma tijtlapejpenikaj tlake tijchiuasej. Adán uan Eva amo kinejkej kichiuasej kej toTeotsij uan kichijkej tlen amo kuali. Yeka mochijkej tlajtlakolejkej, uan kema kinpixkej ininkoneuaj kinpanoltilijkej tlajtlakoli uan nojkia kinejkej kichiuasej tlen amo kuali. (Xijpoua Deuteronomio 32:4 uan 5.)

ToTeotsij kineki ayokmo ma tijnekikaj tijchiuasej tlen amo kuali (Prov. 27:11). Uan techiljuia kenijkatsa uelis tijchiuasej tlen kuali. Tlaj tijkauasej ma techyakana uan nojkia tijnextisej nopa kuajkuali tlamantli tlen ya kinextia, uelis tiyolpakisej. Nama amo uelis tijchiuasej nochi kej ya kichiua. ¿Nochipa kiampa tiitstosej? (Xijpoua Salmo 32:8.)

Maske toTeotsij kikajtok ma mochiua tlen amo kuali pampa kineki ma tikitakaj kenijkatsa tetlaijiyouiltia, amo nochipa kikauas ma mochijto nopa (2 Ped. 3:7-9). Ipan Tlaltipaktli nechka itstosej san kuali maseualmej uan katli yolpakisej pampa kichiuasej kej toTeotsij. (Xijpoua Salmo 37:9-11.)