1. ¿Tlake panotok ipan ni tonali kampa tiitstokej?

NAMA onkatok miak tlaouijkayotl. Ipan 1914 kema pejki “itlamia tonali” pejki pano tlen tlauel amo kuali (2 Tim. 3:1-5). Uan tijmatij nojua mochiuas san tlemach tlamantli, pampa Biblia kiijtok maseualmej eliskiaj tlauel amo kualmej (2 Tim. 3:13).

2. ¿Ika tlake tlamantli moyolpakiltiaj maseualmej ipan ni tonali? (Xikita nopa achtoui tlaixkopinkayotl.)

² Ipan ni tonali miakej moyolpakiltiaj ika tlen Jehová kikualankaita, kej tlasisinijkayotl, tlen ika momekatiaj, ika magia o ika amo kuali ajakamej. Yeka ipan Internet, televisión, películas, amochtli uan pilamochtsitsij kinextiaj ni tlamantli kejuak eliskia kuali. Maske ipan sekij altepemej kipatlatokej inintlanauatiljuaj uan nama tekauaj ma kichiuakaj tlen achtouia amo kuali kiitayayaj, Jehová amo kipatlatok itlanauatiljuaj uan nojua kikualankaita nopa amo kuali tlamantli (xijpoua Romanos 1:28-32).

3. ¿Kenijkatsa techitaj miakej pampa tijneltokaj toTeotsij itlanauatiljuaj?

³ Kema itstoyaj achtoui Cristo itokilijkauaj, sekinok moyolpakiltiyayaj ika tlasisinijkayotl uan ika tlen momekatiaj. Maske  kiampa, inijuantij amo kichiuayayaj nopa pampa kineltokayayaj toTeotsij itlanauatiljuaj. Yeka miakej amo kuali kinitayayaj, kinpinaualtiyayaj uan kintlaijiyouiltiyayaj (1 Ped. 4:4). Tojuantij nojkia tijneltokaj toTeotsij itlanauatiljuaj, yeka miakej amo kuali techitaj. Biblia kiijtoua kintlaijiyouiltiskiaj katli kichiuaskiaj kej Cristo (2 Tim. 3:12).

4. ¿Tlake amo kinamiki tijchiuasej tlaj tijnekij tijneltokasej toTeotsij?

⁴ Tlaj tijnekij tijneltokasej toTeotsij, amo kinamiki tikiknelisej “ni Tlaltipaktli, niyon tlen eltok ipan ni Tlaltipaktli” (xijpoua 1 Juan 2:15 uan 16). Biblia kiijtoua Satanás kinauatia Tlaltipaktli. Ya tekajkayaua ika religiones, tlanauatianij, tlanamakanij uan ika tlen nesi ipan televisión o Internet (2 Cor. 4:4; 1 Juan 5:19). Tlaj amo tijnekij ma techkajkayauakaj ika tlen onka ipan Tlaltipaktli, moneki kuali tikintlapejpenisej touampoyouaj. Biblia kiijtoua amo ma tijkauakaj ma techkajkayauakaj, yeka techiljuia: “Intla se kuali tlakatl nemi ika fiero tlakamej, kiijtlakosej nopa kuali tlen kinekiyaya kichiuas” (1 Cor. 15:33). (Xikita nopa recuadro “¿Tlake kiijtosneki?”.)

5, 6. 1) ¿Ajkia ininuaya amo kinamiki timouampojchiuasej? 2) ¿Kenke amo kinamiki timouampojchiuasej iuaya se akajya katli kichiua tlen amo kuali?

⁵ Tlaj tijnekij nochipa timouampojchijtosej iuaya toTeotsij, amo kinamiki timouampojchiuasej ininuaya katli kichiuaj tlen amo kuali yon ininuaya katli kiijtouaj kitekipanouaj Jehová uan amo kineltokaj. Yeka, tlaj se akajya kichiuas se ueyi tlajtlakoli uan amo moyolkuepas, ayokmo tijnojnotsasej uan ayokmo tiitstosej iuaya (Rom. 16:17, 18).

⁶ Tlaj timouampojchiuasej iuaya se katli kichiua tlen amo kuali, teipa uelis nojkia kej nopa tijchiuasej. ¿Kenke? Pampa miakej kinekij kichiuasej kej ininuampoyouaj uan kichiuasej tlen kinpaktia. Tlaj timouampojchiuasej iuaya se katli momekatia, uelis nojkia timomekatiskiaj. Ya nopa kinpanotok se keskij Jehová itlajtoltemakauaj. Sekij moyolkuepkej uan sekinok amo, yeka kinkixtijkej ipan tlanechikoli (1 Cor. 5:11-13). Tlaj amo moyolkuepaj kinpanos tlen kiijtoua 2 Pedro 2:20-22 (xijpoua).

7. ¿Ajkia ininuaya moneki timouampojchiuasej?

⁷ Maske moneki nochi kuali tikinnojnotsasej, amo kinamiki timouampojchiuasej ininuaya katli amo kineltokaj toTeotsij. Amo kinamikiskia se toikni ma kiixtoka se akajya katli amo moatsonpoliuiltijtok. Tlauel ipati timouampojchiuasej iuaya toTeotsij uan amo iuaya se akajya katli amo kiiknelia Jehová. Yeka, kinamiki timouampojchiuasej san ininuaya katli monejnemiltiaj kej toTeotsij kineki. Jesús kiijtok: “Ajkeya kichiua tlen toTeko Dios kineki, yajaya nikita keja noikni” (Mar. 3:35).

8. ¿Tlake kinpanok israeleuanij pampa mouampojchijkej ininuaya amo kuali maseualmej?

⁸ Katli mouampojchiuaj ininuaya katli amo kinamiki motemoliaj uejueyi kuesoli. Kema israeleuanij asiskiaj ipan nopa tlali tlen toTeotsij kiniljuijtoya kinmakaskia, Jehová kiniljuik amo ma mouikakaj ininuaya katli itstoyaj nopaya. Ya kiijtok: “Amo ximotlankuaketsakaj ininixpa inintlaixkopinkayouaj o ininteotsitsij nopa tlakamej, niyon amo xikinueyichiuakaj. Axkema xijtokilikaj nopa fiero tlamantli tlen nopa tlakamej kichiuaj. Moneki xikintsontlamiltikaj nochi nopa tlakamej uan xijpapayatsakaj nochi nopa tetinij tlen kinueyichiuaj. San xinechueyichiuakaj na, niinmoTeko  [Jehová]” (Éx. 23:24, 25). Maske kinnauatik nopa, tlauel miakej amo tlaneltokakej, yeka tlauel tlaixpanokej (Sal. 106:35-39). ¿Tlake panok teipa? Jehová ayokmo kinejki israeleuanij ma kitekipanokaj, yeka kintlapejpenik Cristo itokilijkauaj (Mat. 23:38; Hech. 2:1-4).

9. ¿Kenke tlauel amo kuali miak películas, amatlajkuiloli, uikatl uan tlen nesi ipan Internet?

⁹ Miak películas, amatlajkuiloli, uikatl, tlen nesi ipan televisión uan ipan Internet tlauel amo kuali, pampa uelis kichiuas ayokmo kuali ma timouikakaj iuaya toTeotsij. Eliskia kejuak tikinpiaskiaj amo kuali touampoyouaj katli ueliskiaj kichiuasej ma timotemachikaj ipan tlen kinauatia Satanás uan amo ipan Jehová uan ipan tlen kiijtojtok kichiuas. Yeka moneki tlauel ma timomokuitlauikaj. Amo kema ma tijtlachilikaj, ma tijpouakaj yon ma tijtlakakilikaj tlen ueliskia kichiuas ma techyoltilana tijchiuasej tlen amo kuali (Tito 2:12).

10. ¿Tlake panos ika nopa películas, amatlajkuiloli, uikatl uan tlen amo kuali tlen nesi ipan Internet?

¹⁰ Nechka tlamis tlen Satanás kinauatia uan ayokmo onkas películas, amatlajkuiloli, uikatl uan tlen amo kuali tlen nesi ipan Internet. Biblia kiijtoua maske kitsontlamiltisej nochi tlen onka, katli kichiuaj tlen toTeotsij kineki itstosej nochipa (1 Juan 2:17). Nopa pilamochtsi Salmos nojkia kiijtoua tlen amo kualmej kintsontlamiltisej, uan katli kualmej itstosej nochipa ika pakilistli ipan Tlaltipaktli kampa onkas tlayolseuilistli (Sal. 37:9, 11, 29).

11. ¿Kenijkatsa techpaleuia Jehová amo kema ma tijtlauelkauakaj?

¹¹ Kema Jesús momaijtok kiijtok tlaj tijnekij tiitstosej nochipa, moneki kuali tikixmatisej Jehová uan iKone (Juan 17:3). Ika itlanechikol toTeotsij techpaleuia kuali ma tikixmatikaj uan amo kema ma tijtlauelkauakaj. ToTeotsij itlanechikol amo kichiua kej maseualmej, pampa kichiua amatlajkuiloli, videos uan tlen nesi ipan Internet kampa techmachtiaj tlen moneki tijchiuasej uan kiampa uelis tiitstosej nochipa. Uan nojkia techmachtia kema timonechikouaj ipan kipano 110,000 tlanechikoli tlen mochiua ipan nochi Tlaltipaktli. Tlen tijyekouaj kema timosentiliaj uan ipan uejueyi tlanechikolistli tlauel techpaleuia timotemachisej ipan Jehová uan ipan tlen kiijtojtok kichiuas (Heb. 10:24, 25).

12. ¿Tlake kiijtosneki timosenkauasej san iuaya se “tlen nojkia kineltoka” Jehová?

¹² Tlaj tijnekij timosenkauasej moneki tijmatisej kenijkatsa tijchiuasej. Biblia techiljuia amo ma tikixtokakaj se akajya katli amo kitekipanoua Jehová pampa amo tisanse, kej tonaya amo sanse ika youali (2 Cor. 6:14). Biblia nojkia kiijtoua moneki timosenkauasej san iuaya se “tlen nojkia kineltoka” Jehová (1 Cor. 7:39). Ni kiijtosneki moneki timosenkauasej san iuaya se tlen Jehová itlajtoltemakauaj katli moatsonpoliuiltijtok uan kitlepanita toTeotsij itlanauatiljuaj. Tlaj timosenkauasej iuaya se katli kiiknelia Jehová, techpaleuis amo kema ma tijtlauelkauakaj toTeotsij.

13. ¿Tlake kinnauatik Jehová ma kichiuakaj nopa israeleuanij?

¹³ Jehová kimati tlake tlauel techpaleuis. Uan nochipa kinnauatijtok itekipanojkauaj ma mosenkauakaj san ininuaya katli kitekipanouaj. Jehová kinnauatik israeleuanij amo ma mosenkauakaj ininuaya katli kinueyichiuayayaj sekinok teotsitsij. ¿Kenke? Pampa tlaj mosenkauaskiaj ininuaya, kichiuaskiaj ma kintekipanokaj sekinok  teotsitsij. Uan Jehová nojkia kiniljuik tlaj amo kineltokaskiaj, tlauel kualaniskia ininuaya uan kintsontlamiltiskia (Deut. 7:3, 4).

14, 15. ¿Tlake kipanok Salomón pampa amo kineltokak Jehová?

¹⁴ Kema Salomón kitekitlalijkej ne Israel kiiljuik Jehová ma kipaleui kipias tlalnamikilistli. Jehová kipaleuik, yeka Salomón tlauel kiixmatkej pampa eliyaya se tlanauatijketl katli tlauel tlalnamikiyaya uan kipixtoyaj miak tomij kampa tekichiuayaya. Biblia kiijtoua se siuatlanauatijketl tlen seyok altepetl kipaxaloto pampa kiiljuijtoyaj ya tlauel tlalnamikiyaya uan tlatominpiayaya. Uan kema kiixmatki, amo kineltokayaya tlen kiitak (1 Rey. 10:7). Maske kiampa eliyaya Salomón, teipa kichijki tlen techmachtia tlake ueliskia techpanos tlaj timosenkauaskiaj iuaya se katli amo kitekipanoua Jehová (Ecl. 4:13).

¹⁵ Maske Jehová kimakak Salomón miak kuajkuali tlamantli, ya amo tlaneltokak uan mosiuajtik ininuaya “miak siuamej tlen kampa ueli euanij”. ¡Kinpixki 1,000 isiuajuaj! ¿Tlake kipanok Salomón pampa amo kineltokak Jehová? Kema ueuejtixki, nopa siuamej kichijkej ma kitlauelkaua Jehová (1 Rey. 11:1-6). Tlaj nopa kipanok Salomón katli tlauel tlalnamikiyaya, ueliskia nojkia techpanos. Yeka yon kentsi ma timoyoliljuikaj timonamiktisej o timosiuajtisej iuaya se akajya katli amo kiiknelia Jehová.

16. ¿Tlake moneki kichiuas se toikni tlaj mosenkajtok iuaya se katli amo kitekipanoua Jehová?

¹⁶ ¿Tlake moneki kichiuas se akajya katli mochiua se tlen Jehová itlajtoltemakauaj tlaj mosenkajtok iuaya se katli amo kitekipanoua Jehová? Biblia kiniljuia siuamej: “Intla se siuatl kipia iueue, ma kikauili  iueue para ma kiyakana. Uan intla kej nopa kichiua, yonke se kipia iueue tlen axkineltoka iTlajtol toTeko, iueue kiitas para kuali iyolis isiua, uan ika yolik kineltokas toTeko yonke axtleno isiua kiiljuia” (1 Ped. 3:1). ¿Tlake kiijtosneki ni? Tlaj se siuatl kichiuas kampeka kichiuilis tlen kuali iueue uan kichiuas tlen Biblia tetlajtolmaka, uelis kema iueue kiitas tlauel kuali monejnemiltijtia, nojkia kinekis mochiuas se tlen Jehová itlajtoltemakauaj. Ya ni kinpanotok miakej. Uan toikniuaj katli kipiaj ininsiua katli amo kitekipanouaj Jehová nojkia moneki kichiuasej tlen kiijtoua 1 Pedro 3:1.

17, 18. 1) ¿Tlake kipaleuik Noé ma momanaui kema uetski miak atl? 2) ¿Tlake kinpaleuik achtoui Cristo itokilijkauaj ma momanauikaj kema kitsontlamiltijkej Jerusalén?

¹⁷ Amo kuali touampoyouaj uelis kichiuasej ayokmo ma tijneltokakaj Jehová. Uan katli kuali touampoyouaj uelis techpaleuisej amo kema tijtlauelkauasej toTeotsij. Ma timoyoliljuikaj tlen kipanok Noé. Kema itstoya, maseualmej san moiljuiyayaj kichiuasej tlen amo kuali ipan Tlaltipaktli (Gén. 6:5). Pampa tlauel amo kuali eliyayaj Jehová kiijtok nochi kintsontlamiltiskia. Biblia kiijtoua Noé kichiuayaya san tlen xitlauak uan nochipa kineltokak Jehová (Gén. 6:7-9). ¿Tlake kipaleuik amo kema kitlauelkajki toTeotsij?

¹⁸ Noé amo kema mouampojchijki ininuaya katli amo kiikneliyayaj Jehová. Ya nochipa itstoya iuaya isiua, ikoneuaj uan iyexuaj, uan sansejko mosentlalijkej kichiuasej nopa akali uan tlajtolmoyajkej (2 Ped. 2:5). Ni kinpaleuik ma momanauikaj kema uetski miak atl. Pampa nochi tiualauij tlen Noé uan ichampoyouaj moneki tikintlaskamatilisej, pampa tlaneltokakej uan amo mouampojchijkej ininuaya katli amo kualmej. Nopa achtoui Cristo itokilijkauaj nojkia tlaneltokakej uan amo mouikakej ininuaya katli amo kiikneliyayaj Jehová. Yeka, momanauijkej kema kitsontlamiltijkej Jerusalén ipan xiuitl 70 (Luc. 21:20-22).

19. ¿Tlake moneki tijchiuasej tlaj amo kema tijnekij tijtlauelkauasej Jehová?

¹⁹ ¿Tlake moneki tijchiuasej tlaj amo kema tijnekij tijtlauelkauasej Jehová ipan itlamia tonali? (1 Cor. 16:13; Prov. 13:20.) Moneki tijchiuasej kej Noé, ichampoyouaj uan nopa achtoui Cristo itokilijkauaj. Amo kema ma timouampojchiuakaj ininuaya katli amo kiikneliaj Jehová. Ma tikilnamikikaj itstokej tlauel miakej toikniuaj katli nochipa kitekipanouaj uan uelis timouampojchiuasej ininuaya. Inijuantij uelis techpaleuisej amo tijtlauelkauasej toTeotsij uan timomanauisej kema kitsontlamiltisej nochi tlen amo kuali uan tiitstosej ipan Xochimili. Yeka, kuali ma tikintlapejpenikaj touampoyouaj ipan itlamia tonali.