Kema pano miak tlamantli tlen amo kuali, kichiua amo kuali ma tijyolmatikaj uan amo kuali ma tiitstokaj. Uan katli kinpanotok tlen amo kuali, ouij kimatij motemachisej teipa kuali itstosej. Ma tikitakaj tlake kichiuaj katli kiampa kinpanotok.

• Se keskij amo kinekij kimatisej tlake panos teipa.

• Sekij tlauel moiuintiaj uan kitekiuiaj drogas.

• Sekij moiljuiaj san tlapik itstokej uan ayokmo kinekij itstosej.

• Xikilnamiki, nopa kuesoli tlen nama tijpia uelis amo uejkauas uan teipa kuali tiitstos.

• Tlaj nojua tikixnamiktos nopa kuesoli, uelis tijchiuas se keski tlamantli tlen mitspaleuis tikijiyouis.

• Biblia kiijtoua asis se tonali kema ayokmo aka kipias kuesoli.

Tlen Biblia kiijtoua: “Amo ximokuesokaj tlen uelis panos mostla. Pampa mojmostla tijpantijtiyouij kuesoli. Mojmostla achi kuali san timoiljuisej tlen nopa kuesoli tlen nopa tonal kiualikak” (Mateo 6:34).

Xijchiua san tlen tiueli ipan se tonal. Amo xijkaua sekinok kuesoli tlen ayamo pano ma mitstetsopa o ma mitstsakuili ipan se keski tlamantli tlen nama moneki tijchiuas.

Tlaj san timoiljuijtos ipan tlamantli tlen amo kuali tlen ueliskia panos teipa, kichiuas tlauel ximokueso uan ayokmo ximotemachi teipa kuali tiitstos.

Se katli kiijkuilok se salmo o se uikatl, kiiljuik toTeotsij: “Motlajtol eltok keja se tlauili tlen kitlauilia noojui kampa ninejnemi para axnimotepotlamis” (Salmo 119:105). ¿Tlake kiijtosneki nopa?

Kej se tlauili techpaleuia ma tikitakaj kanke tinejnemisej kema tsintlayoua, Biblia techpaleuia ma tijmatikaj tlake tijchiuasej kema tijtlapejpenisej se tlamantli tlen tlauel ipati ipan tonemilis.

Tlauili techpaleuia ma tikitakaj tlake eltok toixpa, uan Biblia techpaleuia ma tijmatikaj kenijkatsa tiitstosej teipa.