Maseualmej katli kimatij tlen kinamiki kichiuasej elij temachmej, kichiuaj tlen kinnauatiaj uan nima kitlamiltiaj tlen kiniljuijkej.

Maske konemej nojua pilsiltsitsij uelis kimatisej tlen kinamiki kichiuasej. Nopa amochtli Parenting Without Borders (Padres sin fronteras) kiijtoua: “Kema se konetl kipia se xiuitl uan eyi metstli, uelis tlapaleuis ipan se keski tlamantli, uan kema kipia se xiuitl uan tlajko kineki tlapaleuis maske amo kiiljuiaj. Ipan miak altepemej, tetajmej peuaj kinnauatiaj ininkoneuaj ma kichiuakaj se keski tlamantli kema kipiaj nechka makuili o chikome xiuitl. Konemej katli kipiaj ni xiuitl kena uelis tlapaleuisej ininchaj”.

Miakej telpokamej kisteuaj ininchaj uan kema kipiaj kuesoli sampa tlakuepiliaj. Kemantika kiampa kichiuaj pampa amo kinmachtijkej kenijkatsa kitekiuisej tomij, kenijkatsa kichiuasej se keski tlamantli ipan ininchaj o pampa amo kimatij tlen kinamiki kichiuasej.

Yeka, tlauel moneki tijmachtis mokone kenijkatsa kichiuas tlen kinamiki pampa nopa kipaleuis kema moskaltis. Nopa amochtli How to Raise an Adult (Cómo preparar a su hijo para la edad adulta) kiijtoua: “Amo tijnekiskia tijmakas mokone nochi tlen kinekis uan ayokmo tijchiuas san kema kiaxitis 18 xiuitl pampa tlauel tlaijiyouis kema ayokmo itstos mouaya”.

Xikinnauati ma kichiuakaj se keski tlamantli

TLEN BIBLIA TETLAJTOLMAKA: “Tlen tekitij kuali kiselisej inintlaxtlauil” (Proverbios 14:23).

Konemej tlauel kinpaktia kichiuasej se tlamantli ininuaya inintatauaj, yeka xikiniljui mokoneuaj ma mitspaleuikaj ipan mochaj.

Sekij tetajmej amo kiniljuiaj ininkoneuaj ma tlapaleuikaj ipan ininchaj pampa moiljuiaj ipan escuela mojmostla kinmakaj miak tekitl.

Maske kiampa moiljuiaj, konemej katli tlapaleuiaj ininchaj, kichiua nojua kuali ma momachtikaj ipan escuela pampa kimatij tlake tlamantli kinamiki kichiuasej uan kena kichiuaj. Nojkia, nopa amochtli Parenting Without Borders kiijtoua: “Tlaj konemej amo kinnauatiaj ma tlapaleuikaj maske inijuantij kinekij kichiuasej, moiljuisej amo moneki kinpaleuisej sekinok [...]. Uan nochipa kinekisej ma kinpaleuikaj”.

Kej kiijtoua ni amochtli, kema konemej tlapaleuiaj ipan ininchaj, kinpaleuia ma kiitakaj moneki kinpaleuisej  sekinok uan amo san moiljuisej ipan tlen inijuantij kinpoloua. Kiampa kiitasej ininchampoyouaj kinpatiitaj uan onka tlamantli tlen kinamiki kichiuasej.

Kema mokuapolouaj xijkaua ma kinpano tlen kinamiki

TLEN BIBLIA TETLAJTOLMAKA: “Xijtlakakili nochi consejos uan xijseli inintlajtol tlen mitstlakaualtiaj, uan tijpias miak tlalnamikilistli tlen uejkauas nochi moyolis” (Proverbios 19:20).

Kema mokone mokuapolos ika se tlamantli amo xijmanaui. Konemej moneki kimatisej kinpanos tlen amo kuali tlaj kichiuasej tlen amo kinamiki. Tlaj mokone kitlapanas se tlamantli tlen amo iaxka uelis teiljuis ma kitlapojpoljuikaj uan kikuepas tlen kitlapanki.

Tlaj mokone kiilnamiktos tlen ika mokuapolok uan kema amo kuali kiski tlen kinekiyaya kichiuas, kipaleuis:

• Nochipa ma kiijto tlen melauak.

• Amo ma kinkauili sekinok kema mokuapolos.

• Amo ma motechti kema kichiuas tlen amo kuali.

• Ma kiniljui sekinok ma kitlapojpoljuikaj.