Miakej maseualmej techikoitaj pampa tlen kikajkej o tlen kiniljuijkej amo melauak. Ximoiljui ipan ni tlamantli:

• Sekij tlakamej amo kintekimakaj siuamej pampa moiljuiaj amo uelij kikualchijchiuaj se tlamantli o amo ixtlamatij.

• Miakej maseualmej kiijtouaj katli itstokej ipan se pilaltepetsi tlauel moiuintiaj uan tlatsiuij.

• Miakej maseualmej moiljuiaj katli amo kuali eltok inintlakayo, nochipa mokuesouaj uan kualanij.

Katli kineltokaj ni tlamantli moiljuiaj amo moneki kipatlasej tlen moiljuiaj pampa miakej kiampa kineltokaj, uan kiijtouaj katli amo kiampa moiljuiaj, elij uiuitikej.

“Mauilili intla se akajya nimantsi kineki kichiuas se tlamantli tlen axkimati” (PROVERBIOS 19:2).

¿Tlake kiijtosneki? Tlaj amo tijmatij nochi tlen melauak, timokuapolosej. Tlaj tijneltokaj nochi tlen techiljuiaj uan amo tikitaj tlen kichiuaj sekinok, uelis tikinchikoitasej.

Kema nelia tikixmatij se akajya amo tijneltokasej tlen kiijtouaj sekinok tlen nopa maseuali. Uan kema tijmatij amo nelia tlen techiljuijkej tlen se keskij maseualmej, uelis timoiljuisej nojkia amo nelia tlen techiljuijtokej tlen sekinok.

• Tlaj tikitasej se akajya kichiua tlen amo kuali, amo ma timoiljuikaj kiampa kichiuaj nochi maseualmej katli elij kej ya.

• Amo ximoiljui tijmati nochi tlen se akajya.

• San xijneltoka tlen kiijtouaj katli tijmati amo istlakatij.