“Ipan se keski xiuitl tlen panotok uelis amo timoiljuiyayaj tlaj tijseliskia tlamachtili ika internet”. ¿Nojkia kiampa timoiljuia? Kiampa kiijtok toikni Geoffrey Jackson ipan Tlen techmatiltiaj Katli kinyakanaj Jehová itlajtoltemakauaj 2020 (6). Ya nojkia kiijtok: “Nama timotlatsintokiaj, ¿tlake tijchijtoskiaj tlaj ipan ni tonali amo tijpixtoskiaj JW Library? Ipan miak xiuitl Jehová techkualchijchijtok uan kiampa tikixnamikisej kuesoli kej ni”.

 ¿Kenijkatsa techkualchijchijtok Jehová? ¿Kenijkatsa kichijchijkej nopa aplicación JW Library? ¿Uan kenijkatsa kikualchijchiuaj uan kiyankuiliaj?

 Ipan mayo 2013, Katli kinyakanaj Jehová itlajtoltemakauaj kiniljuijkej se keskij toikniuaj katli itstokej ipan ueyi kali Betel, katli kiyankuiliaj MEPS, ma kichijchiuakaj se aplicación kampa eltoskia nopa Traducción del Nuevo Mundo tlen kiyankuilijtokej. Paul Willies, katli nopaya tekiti, kiijtok: “Amo kema tijtlalijtoyaj se aplicación kampa kikixtiaj aplicaciones. Monejki tijkauasej se keski tekitl tlen tijchiuayayaj, tikintlapejpenisej toikniuaj katli nopaya tekitiskiaj uan timopaleuisej ininuaya sekinok toikniuaj katli tekitij Betel uan kiampa uelkej tijchiuaj nopa aplicación. Tlauel timomaijtojkej uan tikitakej kenijkatsa Jehová techpaleuik, pampa kema panok makuili metstli, ipan Tlanechikoli tlen mochiua sejse xiuitl kiijtojkej ya eltoya nopa aplicación”.

 Onkak se tlamantli tlen ouij tijmatkej, tijchiuasej nopa aplicación JW Library ma kipia nochi amatlajkuiloli tlen tijtekiuiaj ipan miak tlajtoli. Ipan enero 2015, nopa aplicación ya kipiayaya miak amatlajkuiloli ipan Inglés, uan kema panok chikuasej metstli ya ueliyaya mokixtia amatlajkuiloli ipan miak tlajtoli.

 Toikniuaj nojua kiyankuilijtiauij miak tlamantli ipan ni aplicación pampa kitlalijtokej videos uan se tlaxeloli kampa eltok nochi tlen tijtekiuiaj ipan tlanechikoli, uan nojkia uelis tijtekiuisej Tlen ika momachtiaj Jehová itlajtoltemakauaj ipan se keski versículos tlen uala ipan Biblia.

 Kipano 15 millones kitekiuiaj nopa aplicación sejse metstli uan 8 millones mojmostla kitekiuiaj. ¿Kenke nopa aplicación kuali tekiti maske tlauel miakej kitekiuiaj? Paul Willies kiijtoua: “Nopa tekitl amo kema tlami. Nochipa tijyankuiliaj pampa tijnekij ma kipia yajyankuik tlamantli uan amo ouij ma kimatikaj kitekiuisej. Nopa dispositivos electrónicos moyankuilijtia, yeka nojkia tijchiuaj kampeka tijyankuilisej nopa aplicación uan kiampa nojua kuali tekitis ipan nopa dispositivos”. Nojkia moneki tijkualchijchijtiasej uan tijyankuilijtiasej nopa software interno pampa nama kipia miak amatlajkuiloli uan grabaciones ipan JW Library. Ipan ni tonali, nopa aplicación kipia se 200,000 amatlajkuiloli uan kipano 600,000 audios uan videos.

 Tlaj tijnekij kuali ma tekiti ni aplicación, amo san moneki tijtekiuisej computadoras. Nojkia moneki tijkouasej miak licencias de software. Se licencia tlen uejkaua se xiuitl, ipati 1,500 dólares. Nojkia, katli kiyankuiliaj MEPS kinixtlauiliaj 10,000 dólares sejse xiuitl katli kichijchiuaj nopa dispositivos electrónicos uan kiampa nopa aplicación nojua kuali tekitis ipan computadoras, tabletas uan teléfonos tlen yajyankuik kistia.

 Nama ayokmo motekiuia miak tomij kema mokixtia amatlajkuiloli ipan amatl uan kema motitlani pampa nama eltok ipan JW Library. Ma tikitakaj tlen panok ika nopa pilamochtsi Mojmostla timomachtiaj toTeotsij iTlajtol. Ipan xiuitl 2013 kikixtijkej nechka 12 millones imiaka. Uan ipan 2020 san mokixtik 5 millones, maske se 700,000 maseualmej pejkej tlajtolmoyauaj ipan nochi Tlaltipaktli. ¿Kenke kiampa kichijkej? Pampa nama miakej toikniuaj kipouaj nopa texto tlen mojmostla tijpouaj ipan JW Library. a

 JW Library nojkia techpaleuia ipan sekinok tlamantli. Geneviève, katli itstok Canadá, kiijtoua ni aplicación kipaleuijtok nojua kuali ma momachti Biblia. Ya kiijtoua: “Tlaj monekiskia nijtekiuis tlauel miak amochtli kema nimomachtia, amo nimomachtiskia mojmostla. Uan ika ni aplicación san moneki nijtlatis notableta pampa nopaya eltok nochi tlen nijtekiuis. Nikitstok kenijkatsa kema nimomachtia nechpaleuia kuali ma nitlaneltoka uan ma niitsto inechka Jehová”.

 Ni aplicación tlauel tlapaleuijtok pampa onka ni ueyi kokolistli. Charlyn katli eua Estados Unidos, kiijtoua: “Pampa onkatok ni ueyi kokolistli ipan nochi Tlaltipaktli, kipano se xiuitl amo nikitstok yajyankuik amatlajkuiloli tlen kistok ika amatl. Maske kiampa panotok, ipan JW Library tijpiaj nochi amatlajkuiloli, yeka tlauel nijtlaskamatilia Jehová pampa techmakatok ni tlamantli”.

 Miakej nojkia moiljuiaj kej Faye, katli eua Filipinas. Ya kiijtoua: “JW Library tlauel nechpaktia pampa nechpaleuijtok nimonechkauis iuaya Jehová. Nijtekiuia kema nitlapoua ika ijnalok, kema nijtlakakilia se tlamantli tlen nechyolchikaua maske nijchijtinemi se tlamantli nochaj, kema nimomachtia tlen mopanoltis ipan tlanechikoli uan kema nimomachtia Biblia. Nojkia kema nimosiajketsa nijtlachilia videos, uan kema nijchixtok se tlamantli nijpoua Biblia uan amatlajkuiloli. ¡Nelia tlauel ipati ni aplicación!”.

 Uan kema titlajtolmoyauaj tlauel techpaleuia ni aplicación. Se tosiuaikni katli eua Camerún tlauel kipaktik se texto tlen kitekiuik katli iuaya tlajtolmoyauayaya. Kema panotoya se keski semanas kinejki kitekiuis uan amo kiilnamikiyaya, ya kiijtoua: “Nikilnamijki se keski tlajtoli tlen kiijtoua nopa texto, nijtlapok nopa aplicación, nijtemok Biblia uan nikijkuilok nopa tlajtoli uan nijtsonpechilik. Tlauel nechpaktia ni aplicación pampa ueli nijpantia textos tlen kemantika nikilkaua”.

 Nopa tomij tlen intemakaj ipan donate.mt1130.com techpaleuijtok, tijchijchiuasej, tijkualchijchiuasej uan tijyankuilisej nopa aplicación JW Library, kiampa uelis kinpaleuis nochi toikniuaj. Tlauel tiinmechtlaskamatiliaj pampa intemakaj tomij ika nochi inmoyolo.

1. Octubre 2013: kiski nopa aplicación JW Library uan kipixtoya Traducción del Nuevo Mundo tlen kiyankuilijtoyaj ipan tlajtoli inglés.

2. Enero 2015: kitlalijkej sekinok amatlajkuiloli ipan tlajtoli inglés uan teipa ipan sekinok tlajtoli.

3. Noviembre 2015: kitlalijkej tlen ika ueliskia kiuasanisej se tlamantli.

4. Mayo 2016: kitlalijkej nopa tlaxeloli “Reuniones”.

5. Mayo 2017: kitlalijkej kampa ueliskia kiijkuilosej notas.

6. Diciembre 2017: kitlalijkej Biblia de estudio ika tlajtoli inglés.

7. Marzo 2019: kitlalijkej kampa ueliskia kikixtisej grabaciones, kiitasej videos ika internet, uan kiitasej tlamachtili tlen eltok ipan Tlen ika momachtiaj Jehová itlajtoltemakauaj.

8. Enero 2021: kitlalijkej yajyankuik tlamantli tlen ika titlamachtiskiaj ika nopa yankuik amatlajkuiloli ¡Nochipa xiitsto ika pakilistli!