•   ¿Amo kuali tijyolmati kema tijkaki sekinok kiijtouaj tlajtoli tlen sokiyo?

  •  Amo kenijki nijmati, ya nimomatki nijkakis.

  •  Maske amo nechpaktia nijkakis nopa tlajtoli, amo tleno uelis nijchiuas.

  •  Tlauel amo kuali nijyolmati kema nijkaki nopa tlajtoli.

•   ¿Tikijtoua tlajtoli tlen sokiyo?

  •  Amo kema.

  •  Kemantika.

  •  Nochipa.

•   ¿Nelia tlauel amo kuali?

  •  Amo, onka sekinok tlamantli tlen nojua tlauel amo kuali.

  •  Kena, tlauel amo kuali.

 ¿Nelia tlauel amo kuali tlaj tikijtos tlajtoli tlen sokiyo? Uelis timoiljuia: “Amo kenijki, onka sekinok tlamantli tlen nojua tlauel amo kuali. Nojkia, nochi maseualmej kiijtouaj tlajtoli tlen sokiyo kema kamanaltij”. ¿Nopa nelia?

 Maske ouij tijmatis tijneltokas, miakej maseualmej kichiuaj kampeka amo kiijtosej tlajtoli tlen sokiyo. Kiampa kichiuaj pampa kiilnamikij se keski tlamantli tlen sekinok amo kimatij. Ximoiljui ipan ni tlamantli:

•  Katli kitekiuiaj tlajtoli tlen sokiyo amo san kamanaltij. Tlen tikijtoua kinextia kenijkatsa nelnelia tieli. Tlaj tijtekiuis tlajtoli tlen sokiyo kinextis amo mitstekipachoua tlen kiyolmatij sekinok. Ximoiljui: ¿nelnelia kiampa tieli?

   Biblia kiijtoua: “Kema se kiijtoua se tlajtoli fiero, uajka kisas ipan iyolo” (Mateo 15:18).

•  Tlaj tikijtos tlajtoli tlen sokiyo kichiuas sekinok amo kuali ma mitsitakaj. Nopa amochtli Cuss Control kiijtoua: “Kej tikamanalti uelis kinextis ajkia ininuaya timouampojchiuas, ma mitstlepanitakaj o amo mochampoyouaj uan katli ininuaya titekiti, kenijkatsa timouikas ininuaya sekinok, tlaj tikinpaleuis ma kichiuakaj tlen kuali o amo, tlaj mitsmakasej se tekitl o seyok kuali tekitl uan kenijkatsa mitsitasej maseualmej katli amo mitsixmatij”. Ni amochtli nojkia kiijtoua: “Ximotlatsintoki tlaj uelis tikinpias nojua kuali mouampoyouaj tlaj ayokmo tikijtos tlajtoli tlen sokiyo”.

   Biblia kiijtoua: “Ayok xikualankatlauejchiuakaj. Ayok xitetlaijiljuikaj” (Efesios 4:31).

•  Tlaj tikijtos amo kuali tlajtoli, amo kichiuas sekinok ma mitstlepanitakaj. Ipan nopa amochtli ¡Qué maleducado!, Alex Packer kiijtok maseualmej ayokmo kinekij kinkakisej katli san kiijtouaj tlajtoli tlen sokiyo, uan katli tlen ueli kamatij amo kinextiaj “tlalnamikij yon kinkuamachiliaj sekinok”. Nojkia kiijtok: “Tlaj amo tijmati tlake tlajtoli tijtekiuis kema tikamanaltis, uajka motlalnamikilis nojkia amo kuali eltos”.

   Biblia kiijtoua: “Amo tlen ueli xikamatikaj” (Efesios 4:29).

•  Ximosentlali tijchiuas se tlamantli. Ipan se metstli xijchiua kampeka amo tikijtos tlajtoli tlen sokiyo. Ipan se calendario uelis tijtlalijtias keski tonali ayokmo tikijtok tlajtoli tlen sokiyo. Tlaj tijneki tijchiuas tlen timosentlalijtok, moneki tijchiuas sekinok tlamantli. Ximoiljui ipan ni:

•  Amo ximoyolpakilti ika tlamantli kampa kiijtouaj tlajtoli tlen sokiyo. Biblia kiijtoua: “Intla se kuali tlakatl nemi ika fiero tlakamej, kiijtlakosej nopa kuali tlen kinekiyaya kichiuas” (1 Corintios 15:33). Nopa tlajtoli tlakamej tlen motekiuia ipan ni texto, amo san kiijtosneki maseualmej, nojkia kiijtosneki películas, videojuegos uan uikatl tlen tijkaki. Kenneth, katli kipia 17 xiuitl, kiijtoua: “Kemantika uelis peuas tiuikas se uikatl pampa mitspaktia kej kakisti uan amo tikitas tlaj kiijtoua tlajtoli tlen sokiyo”.

•  Xijnexti kuali titlalnamiki. Sekij kiijtouaj tlajtoli tlen sokiyo pampa moiljuiaj kiampa kinextiaj ya elij uejueyij. Maske kiampa moiljuiaj, katli ya uejueyij kitekiuiaj “inintlalnamikilis para kiixmatisej tlen kuali uan tlen axkuali para kichiuasej” (Hebreos 5:14). Uan amo kichiuaj tlen amo kuali san pampa kinekij sekinok kuali ma kinitakaj.

 Tlaj tikijtos tlajtoli tlen sokiyo, motlalnamikilis amo kuali eltos pampa timoiljuis tlamantli tlen amo kinamiki uan tikinmauas sekinok. Uan ya onka miak tlamantli tlen amo kuali. Nopa amochtli Cuss Control kiijtoua: “Amo xijchiua kej sekinok maseualmej. Xijchiua kampeka amo tikijtos tlajtoli tlen sokiyo, kiampa kuali tijyolmatis uan sekinok nojkia kuali kiyolmatisej kema itstosej mouaya”.