Sejse xiuitl moatsonpoliuiltiaj miakej telpokamej katli inintatauaj elij Jehová itlajtoltemakauaj. ¿Nojkia timoiljuijtok timoatsonpoliuiltis? Tlaj kena, achtoui moneki tijkuamachilis tlake kiijtosneki tijmaktilis Jehová monemilis uan timoatsonpoliuiltis.

•  ¿Tlake kiijtosneki nimoatsonpoliuiltis?

•  ¿Tlake kiijtosneki timotemaktilis?

•  ¿Kenke moneki timoatsonpoliuiltisej?

•  Tlen telpokamej uan ichpokamej kiijtouaj

•  Tlen melauak uan tlen amo melauak

 Kema se akajya moatsonpoliuiltia amo san kiijtosneki kema kitekiliaj atl ipan itsonteko. Biblia kiijtoua kema se akajya moatsonpoliuiltia, moneki nochi itlakayo atsonpoliuis. Kema kiampa kichiua, kiixnextia se tlamantli tlen tlauel ipati.

•   Kema timoatsonpoliuiltis tijnextis ininixpa sekinok ayokmo tijchiuas san tlen ta mitspaktia.

•   Kema mitskixtisej, tijnextis timosentlalijtok tijchiuas tlen toTeotsij kineki.

 Kema timoatsonpoliuiltis, tijnextis ininixpa sekinok san Jehová uelis kiijtos tlake kuali uan tlake amo kuali. Nojkia, tijnextia timosentlalijtok tijchiuas tlen ya kineki.

 Ximoiljui ni: ¿Tlake mitsyololinis tijnextis ininixpa sekinok nochipa tijneki tijneltokas Jehová? Xijpoua 1 Juan 4:19 uan Apocalipsis 4:11.

 Tlaj tijneki timoatsonpoliuiltis, achtoui moneki tijmaktilis toTeotsij monemilis kema tiitstos moselti. ¿Kenijkatsa uelis tijchiuas?

 Kema tiitstos moselti, tijchiuas se tlamaijtoli kampa tikiljuis Jehová nochipa tijtekipanos uan maske tikixnamikis miak tlaouijkayotl uan sekinok kitlapejpenisej kichiuasej sekinok tlamantli, ta nochipa tijchiuas tlen ya kipaktia.

 Kema ya timoatsonpoliuiltijtos, sekinok kiitasej ya nopa tikiljuik Jehová tijchiuas. Uan tijnextis ininixpa sekinok nama monemilis iaxka Jehová (Mateo 16:24).

 Ximoiljui ni: ¿Kenke nojua kuali tiitstos kema tijkauas monemilis imako Jehová? Xijpoua Isaías 48:17, 18 uan Hebreos 11:6.

 Jesús kiijtok itokilijkauaj monekiyaya moatsonpoliuiltisej. Ya amo kiijtok ueliskia kiampa kichiuasej tlaj kinekiskiaj, kiijtok monekiyaya kiampa kichiuasej (Mateo 28:19, 20). Ipan ni tonali, Cristo itokilijkauaj nojkia moneki kiampa kichiuasej. Uan Biblia kiijtoua tlaj tijnekij timomakixtisej, moneki timoatsonpoliuiltisej (1 Pedro 3:21).

 Xikilnamiki, tlaj timoatsonpoliuiltis moneki tijchiuas pampa tikiknelia Jehová uan pampa tlauel tijpatiita timouampojchiuas iuaya. Moneki timoiljuis kej katli kiijkuilok se salmo, ya kiijtok: “¿Kejatsa uelis nijtlaxtlauis toTeko ipampa nochi tlen nechchiuilijtok?”. Ya nojkia kiijtok: “Nijueyimatis toTeko pampa nechmakixtijtok. Tlamiakapa nijualikilis toTeko nopa tlakajkaualistli tlen nijtlajtolkauilik nijmakas” (Salmo 116:12-14).

 Ximoiljui ni: ¿Tlake tlateochiualistli mitsmakatok Jehová uan kenijkatsa uelis tijnextis tijtlaskamatilia? Xijpoua Deuteronomio 10:12, 13 uan Romanos 12:1.