Biblia techpaleuia kuali ma tijtlapejpenikaj tlen tijchiuasej. Kiampa uelis tijpiasej “tlalnamikilistli uan tlamachilistli” (Proverbios 4:5). Kemantika kiijtoua tlake moneki tijchiuasej. Uan kemantika san kiijtoua se keski tlamantli tlen techpaleuis kuali ma tijtlapejpenikaj.

Ipan ni tlamachtili tikitasej:

•  Tlen mitspaleuis kuali tijtlapejpenis tlen tijchiuas

•  ¿Moneki nijpatlas tlen nijtlapejpenik nijchiuas?

•  ¿Tlake uelis nijchiuas tlaj amo kuali tlen nijtlapejpenik?

•   Amo nima xijtlapejpeni tlen tijchiuas. Biblia kiijtoua: “Tlen tlalnamiki moiljuia intla kuali para kichiuas se tlamantli o axtle” (Proverbios 14:15). Tlaj nima tijtlapejpenis tlen tijchiuas uelis amo tikitas tlen tlauel ipati. Yeka, achtoui kuali ximoiljui tlake tijchiuas (1 Tesalonicenses 5:21).

•   Amo xijtlapejpeni tlen tijchiuas san pampa timoiljuia o tijyolmati se tlamantli. Biblia kiijtoua tlaj tijneltokaj toyolo uelis techpanos tlen amo kuali (Proverbios 28:26; Jeremías 17:9). Se neskayotl, uelis amo kuali tijtlapejpenisej se tlamantli kema tikualantokej, timotekipachojtokej, timoyolkokojtokej, timoisiuiltijtokej o kema tlauel tisiajtokej (Proverbios 24:10; 29:22).

•   Xitlajtlani toTeotsij ma mitsmaka tlalnamikilistli (Santiago 1:5). ToTeotsij tlauel kipaktia techmakas tlalnamikilistli kema tijtlajtlaniaj. Ya eli kej se tetaj katli kinikneliaj ikoneuaj uan amo kineki ma kipiakaj kuesoli. Yeka, Jehová “temaka tlalnamikilistli, uan tlen ya uala nochi tlamatilistli uan tlamachilistli” (Proverbios 2:6). a ToTeotsij techpaleuia ma tijpiakaj tlalnamikilistli ika tlen kiijtoua ipan iTlajtol, Biblia (2 Timoteo 3:16, 17).

•   Ximomachti. Biblia kiijtoua: “Tlakamej tlen ya tlalnamikij ma kitlakakilikaj tlen nikaj eltok uan achi más ma motlalnamiktikaj” (Proverbios 1:5). Yeka, kema tijtlapejpenisej se tlamantli, achtoui moneki tikitasej tlake uelis tijchiuasej. ¿Kanke uelis tijpantis tlamachtili tlen uelis mitspaleuis?

   Achtoui, xikita tlake kiijtoua Biblia tlen nopa tlamantli tlen mitstekipachoua. ToTeotsij techchijchijki uan kuali kimati tlake techpaleuis. Yeka uelis timotemachisej san iTlajtol uelis kuali techyakanas (Salmo 25:12). Kemantika ipan Biblia eltok tlanauatili kampa kiijtoua tlake moneki tijchiuasej (Isaías 48:17, 18). Uan kemantika ipan se keski textos tlen Biblia, san techpaleuia ma tijkuamachilikaj tlake moneki tijchiuasej. Kema kiampa pano, uelis tijtlapejpenisej tlen tijchiuasej ika tlen tojuantij techpaktia. Tlaj tijneki tijpantis se keski textos tlen mitspaleuis, xijtemo se keski tlamachtili ipan jw.org. Amo moneki titlaxtlauas. b

   Kemantika, nojkia moneki tijtemos ipan sekinok tlamachtili tlen nelia uelis mitspaleuis. Se neskayotl, tlaj tijkouas se tlamantli tlen tlauel patiyo, achtoui moneki tijmatis katsa eli, ajkia kichijchijki uan tlaj uelis tijkuepas tlaj amo kuali eltok o tlaj kipoloua se tlenijki. Nojkia moneki kuali tikitas tlaj kena mitspaleuis.

   Biblia kiijtoua: “Kema se akajya kineki kichiuas se tlamantli pero axmotlajtlania kejatsa kichiuas [...], axkisa kuali iteki” (Proverbios 15:22). Yeka, ximonojnotsa ininuaya maseualmej katli ipan timotemachia kema ayamo tijtlapejpenia tlen tijchiuas. Se neskayotl, tlaj tijneki timopajtis, achtoui moneki timokamanaljuis ika se tepajtijketl uan ya mitsiljuis tlake uelis tijchiuas (Mateo 9:12). Kemantika nojkia mitspaleuis tlaj tikamanaltis ininuaya sekinok katli nojkia kinpanok sanse kej ta. Maske kiampa, xikilnamiki amo aka kinamiki mitsiljuis tlake tijchiuas. Nopa san ta moneki tijtlapejpenis uan tikixnamikis tlen mitspanos teipa (Gálatas 6:4, 5).

•   Xikita nochi tlen uelis mitspaleuis. Achtoui xijtemo tlamachtili uan teipa xikijkuilo tlake ueliskia tijchiuas uan kenijkatsa uelis mitspaleuis o amo. Teipa, kuali ximonejneuili tlake panos ika tlen tijtlapejpenis (Deuteronomio 32:29). Uelis timoiljuis, ¿kenijkatsa mitspaleuis ta, mochampoyouaj o sekinok maseualmej? (Proverbios 22:3; Romanos 14:19). Tlaj timoiljuis ipan ni tlajtlanili uan ipan tlen Biblia tlamachtia, mitspaleuis kuali tijtlapejpenis tlen tijchiuas uan nochi kinpaleuis.

•   Xijchiua tlen timoiljuia. Kemantika amo tijnekij tijtlapejpenisej se tlamantli pampa timajmauij timokuapolosej. Tlaj amo tleno tijchiuaj amo uelis tijmatisej tlaj nopa techpaleuis o amo. Nojkia ueliskia panos tlen amo kuali. Kema amo tleno tijchiuaj eli sanse kej kema amo kuali tijtlapejpeniaj tlen tijchiuasej. Biblia kineskayotia ni ika tlen kichiua se milchijketl: “Intla tijchias ma moijkuini nochi ajakatl uan ma ayok tlaauetsi para tijchiuas se tekitl, uelis axkema tijchiuas” (Eclesiastés 11:4).

 Xikilnamiki, maske kuali tijtlapejpenis tlen tijchiuas nopa amo nochipa mitspaleuis. Kemantika monekis tijkauas se keski tlamantli o uelis panos tlen amo timoiljuijtoya (Eclesiastés 9:11). Yeka, xijtemo tlamachtili tlen mitspaleuis kuali tijtlapejpenis tlen tijchiuas uan xijchiua tlen timoiljuia kuali kisas.

 Kemantika uelis amo tijchiuas tlen tijtlapejpenik pampa uelis mopatlas se keski tlamantli o tikitak tlen tijtlapejpenik amo mitspaleuik. Yeka, sampa kuali ximoiljui uan xikita tlake seyok tlamantli ueliskia tijchiuas.

 Maske kiampa, onka se keski tlamantli tlen amo uelis mopatlas (Salmo 15:4). Se neskayotl, kema se tlakatl uan se siuatl mosenkauaj, toTeotsij kineki nochipa ma itstokaj sansejko (Malaquías 2:16; Mateo 19:6). c Yeka, kema kiixnamikij se kuesoli, moneki kichiuasej kampeka kisenkauasej uan amo kiixpolosej nopa amatl kampa nesi mosenkajtokej.

 Kemantika amo kuali tijtlapejpeniaj tlen tijchiuaj (Santiago 3:2). Yeka, uelis timotlajtlakoltiaj uan timoiljuiaj amo kiampa tijchijtoskiaj (Salmo 69:5). Amo kenijki tlaj kiampa tijyolmati tlaj nopa mitspaleuis ayokmo ximokuapolo teipa (Proverbios 14:9). Biblia kiijtoua moneki amo tlauel timotlajtlakoltisej yon timoseniljuijtosej tlen techpanok pampa nopa uelis tlauel techyolkokos (2 Corintios 2:7). d Xikilnamiki “toTeko [Jehová] tetlasojtla miak uan kipia ueyi iyolo” (Salmo 103:8-13). Yeka, tlaj amo kuali tlen tijtlapejpenik uan amo ueli tijpatla, xikita tlake mitsmachtia tlen tijchijki uan xijchiua kampeka kuali tiitstos.