Uejkajkia, toTeotsij kiniljuik israeleuanij ma temakakaj diezmo a o ma temakakaj se achi tomij tlen kitlaniyayaj uan kiampa tlapaleuiskiaj ma kiueyichiuakaj toTeotsij. Kiniljuik: “Sejse xiuitl xikiyokatlalikaj para ToTeko nopa diezmo tlen kitocaroua tlen nochi tlen inkipixkasej” (Deuteronomio 14:22).

 Ipan nopa Tlanauatili tlen kimakakej Moisés, kiijtouayaya israeleuanij monekiyayaj temakasej diezmo. Ipan ni tonali, Cristo itokilijkauaj ayokmo moyakanaj ika nopa Tlanauatili, yeka amo moneki kiampa kichiuasej (Colosenses 2:13, 14). Sejse Jehová itlajtoltemajka temaka tomij tlen kipia ika nochi iyolo “keja ipa moyoliljuijtok para temakas”. Amo temaka ika kuesoli, yon pampa seyok kichiualtia “pampa toTeko kiiknelia tlen temaka ika pakilistli” (2 Corintios 9:7).

•  Nopa diezmo ipan Biblia: Antiguo Testamento

•  Nopa diezmo ipan Biblia: Nuevo Testamento

 Nopa tlajtoli diezmo miakpa motekiuia ipan Antiguo Testamento. Tlauel motekiuik nopa tlajtoli kema ya kinmakatoyaj israeleuanij nopa Tlanauatili tlen kimakakej Moisés. Ipan Biblia ompa motekiuik ni tlajtoli kema ayamo kinmakayayaj nopa tlanauatili.

Kema ayamo eltoya nopa Tlanauatili tlen kimakakej Moisés

 Katli achtoui temakak diezmo elki Abram (Abraham) (Génesis 14:18-20; Hebreos 7:4). Ya kimakak nopa diezmo katli eliyaya tlanauatijketl uan sacerdote ipan altepetl Salem. Biblia amo kiijtoua tlaj Abraham uan ikoneuaj sampa temakakej diezmo.

 Nopa seyok maseuali katli nojkia temakak diezmo elki Jacob, iixui Abraham. Jacob kiiljuik toTeotsij tlaj kiteochiuaskia ya nochipa kimakaskia se diezmo (Génesis 28:20-22). Se keskij katli tlauel momachtiaj Biblia kiijtouaj kema Jacob temakak nopa diezmo elki ika tlapialmej kej tlakajkaualistli. Maske ya temakak nopa diezmo, amo kinchiualtik ichampoyouaj nojkia kiampa ma kichiuakaj.

Kema ya kimakatoyaj Moisés nopa Tlanauatili

 Israeleuanij monekiyaya temakasej diezmo pampa kej nopa ueliskiaj tlapaleuisej kampa kiueyichiuayayaj toTeotsij.

•   Nopa diezmo kiseliyayaj katli mosentlalijtoyaj kitekipanosej toTeotsij uan amo kipiayayaj kampa motlatojtokisej. Eliyayaj nopa levitas uan sacerdotes (Números 18:20, 21). Israeleuanij kinmakayayaj diezmo nopa levitas katli amo eliyayaj sacerdotes uan teipa inijuantij kixelouayayaj ika diez tlen kinmakatoyaj uan nojkia kinmakayayaj se diezmo nopa sacerdotes (Números 18:26-29).

•   Nojkia sejse xiuitl monekiyaya temakasej seyok diezmo tlen kinpaleuiyaya levitas uan katli amo eliyayaj levitas (Deuteronomio 14:22, 23). Israeleuanij temakayayaj nopa tlakajkaualistli kema iljuichiuayayaj. Uan ipan se keski xiuitl, nopa tomij tlen temakayayaj kej tlakajkaualistli kinpaleuiyaya katli tlauel teikneltsitsij (Deuteronomio 14:28, 29; 26:12).

 ¿Kenijkatsa kiitayayaj keski temakasej? Sejse xiuitl, israeleuanij kixelouayayaj ika diez tlen kipixkayayaj uan temakayayaj kej tlakajkaualistli se tlen nopa tlaxeloli (Levítico 27:30). Tlaj se maseuali temakaskia nopa diezmo ika tomij monekiyaya tlaxtlauas seyok 20 % (Levítico 27:31). Uan nojkia monekiyayaj temakasej “sejse matlaktli tlapialmej” (Levítico 27:32).

 Kema israeleuanij kiitayayaj keski tlapialmej temakaskiaj, kitlapejpeniyayaj nopa matlaktli tlapiali tlen kisayaya kampa kintsaktoyaj. Nopa Tlanauatili kiijtouayaya amo monekiyaya kiitasej tlaj nopa tlapiali mokokouayaya o amo, uan amo ueliyayaj kipatlasej yon tlaxtlauasej ika tomij (Levítico 27:32, 33). Uan nopa seyok diezmo tlen temakayayaj sejse xiuitl kema kichiuayayaj iljuitl, kena ueliyayaj kiixtlauasej ika tomij. Ni tlauel kinpaleuiyaya israeleuanij katli uejka euayayaj uan yauiyayaj kampa kiiljuichiuiliyayaj Jehová (Deuteronomio 14:25, 26).

 ¿Kema temakayayaj israeleuanij nopa diezmo? Monekiyaya temakasej sejse xiuitl (Deuteronomio 14:22). Chijchikompa xiuitl amo kiampa eliyaya pampa ipan nopa xiuitl nochi israeleuanij mosiajketsayayaj uan amo tlatojtokayayaj (Levítico 25:4, 5). Ipan nopa xiuitl amo kintlajtlaniyayaj diezmo kema asiyaya tonali tlen pixkistli. Nojkia, kema panoyaya eyi xiuitl uan chikuasej xiuitl, israeleuanij kinmakayayaj levitas uan katli teikneltsitsij nopa seyok diezmo (Deuteronomio 14:28, 29).

 ¿Kintlatsakuiltiyayaj pampa amo temakayayaj diezmo? Ipan nopa Tlanauatili amo kiijtouayaya tlaj kintlatsakuiltiskiaj. Nochi monekiyaya temakasej nopa diezmo pampa kimatiyayaj kiampa monekiyaya kichiuasej. Teipa israeleuanij monekiyaya kiijtosej iixpa toTeotsij kena temakatoyaj nopa diezmo uan kitlajtlanisej ma kinteochiua pampa kiampa kichijtoyaj (Deuteronomio 26:12-15). Tlaj se akajya amo temakayaya nopa diezmo, toTeotsij kiitayaya kejuak kitlachtekiliyaya (Malaquías 3:8, 9).

 ¿Eliyaya tlauel ouij temakasej diezmo? Amo, toTeotsij kiniljuik israeleuanij tlaj temakaskiaj diezmo, ya tlauel kinteochiuaskia uan amo tleno kinpoloskia (Malaquías 3:10). Kema israeleuanij amo temakayayaj nopa diezmo, amo kuali kisayaya tlen kichiuayayaj uan Jehová amo kinteochiuayaya pampa amo kinpaleuiyayaj sacerdotes yon levitas. Kema kiampa panoyaya, sacerdotes uan levitas monekiyayaj tekitisej uan yeka amo ueliyayaj kinpaleuiaj israeleuanij kuali ma tlaueyichiuakaj (Nehemías 13:10; Malaquías 3:7).

 Kema Jesús itstoya, nojua kiixtlauayayaj diezmo. Uan kema mijki, ayokmo monejki kiixtlauasej.

Kema Jesús itstoya ipan Tlaltipaktli

 Ipan Biblia, kampa kiixmatij kej Nuevo Testamento, kinextia kema Jesús itstoya ipan Tlaltipaktli, israeleuanij nojua kiixtlauayayaj nopa diezmo. Maske Jesús kimatiyaya monekiyaya kiixtlauasej, amo kuali kiitak tlen kichiuayayaj katli tlayakanayayaj ipan religión pampa kinchiualtiyayaj maseualmej ma temakakaj nopa diezmo uan inijuantij kiilkauayayaj “tlen más ipati tlen itlanauatiljuaj Moisés”, kej kichiuasej tlen xitlauak, tetlasojtlasej uan itstosej temachmej (Mateo 23:23).

Teipa kema Jesús mijki

 Kema Jesús temaktilik inemilis, maseualmej ayokmo monejki tlaxtlauasej nopa diezmo pampa Jesús imikilis kitlamiltik nopa Tlanauatili tlen kimakatoyaj Moisés kampa kiijtouayaya israelitajmej monekiyaya temakasej diezmo (Hebreos 7:5, 18; Efesios 2:13-15; Colosenses 2:13, 14).