Kema ipan Biblia motekiuia nopa tlajtoli kuali titlaneltokas, kiijtosneki kema se akajya tlauel kineki kiyolpakiltis toTeotsij uan moiljuia kej ya. Se akajya katli kuali tlaneltoka kichiua kampeka kineltokas toTeotsij itlanauatiljuaj uan kikaua ma kiyakana itonal a (Romanos 8:5; Efesios 5:1).

 Biblia nochipa kinextia amo sanse kichiua se akajya katli kuali tlaneltoka uan se katli amo. Se neskayotl, se akajya katli kuali tlaneltoka amo sanse kej katli amo kuali tlaneltokaj, pampa inijuantij “axkimachiliaj, niyon axkiseliaj, tlen itonal toTeko tlamachtia” (1 Corintios 2:14-16). Katli amo kuali tlaneltokaj, amo kinpaktia temakasej tlen kipiaj, amo itstokej ika tlaseuilistli uan san ‘monajnankiliaj uan motlajkoxelouaj’, uan katli kuali tlaneltokaj amo kiampa kichiuaj (1 Corintios 3:1-3). Biblia kiijtoua katli teistlakauiaj uan kinxelouaj katli mouampojchijtokej elij kej tlapialmej pampa “kitokiliaj tlen ueli kinekij kichiuasej. Axkipiaj itonal toTeko” (Judas 19; Proverbios 16:28). b

Ipan ni tlamachtili tikitasej:

•  ¿Kenke ueli titlaneltokaj?

•  ¿Kenke tlauel ipati titlaneltokasej?

•  ¿Tlake moneki nijchiuas uan kiampa nitlaneltokas?

•  ¿Moneki tiitstos ipan se religión uan kiampa titlaneltokas?

•  Tlen sekinok kiijtouaj kema titlaneltokaj

•  Se keski textos kampa kiijtoua tlen tlaneltokili

 Titlaneltokaj pampa toTeotsij techchijchijki kej ya itlachialis (Génesis 1:27). Yeka, amo timosentlachiliaj kema maseualmej kinekij kimatisej kenijkatsa eli tlen amo ueli kiitaj yon kiitskiaj.

 Nochi uelis tijnextisej kuajkuali tlamantli kej Jehová, c kej titetlasojtlasej, tiitstosej ika tlaseuilistli uan amo titechikoitasej (Santiago 3:17). Nojkia, toTeotsij kinpaleuia ika itonal nojua kuali ma tlaneltokakaj katli kichiuaj kampeka kineltokasej (Hechos 5:32).

 Kema titlaneltokaj, techpaleuia “tijpantisej tlaseuilistli uan yolistli tlen yankuik” (Romanos 8:6). Ni tlamantli tlen toTeotsij techmakatok tlauel ipati.

•   Nemilistli: ToTeotsij kiijtoua katli kuali tlaneltokaj itstosej nochipa (Juan 17:3; Gálatas 6:8).

•   Tlaseuilistli: Kiijtosneki kema kuali timouikaj ika toTeotsij. Katli mosentlaliaj san ipan inijuantij mochiuaj ikualankaitakauaj toTeotsij (Romanos 8:7). Uan katli kuali tlaneltokaj, toTeotsij kinmaka “tlaseuilistli ipan ininyolo tlen tlakamej axuelis kimachilisej” (Filipenses 4:6, 7). Nopa tlaseuilistli tlen kiyolmatij kinpaleuia ma yolpakikaj (Mateo 5:3).

•   Ximomachti uan xijchiua tlen toTeotsij kiijtoua. Uelis kiampa tijchiuas tlaj tijpouas Biblia, nopaya ijkuilijtok toTeotsij itlalnamikilis tlen kiijkuilojkej se keskij tlakamej ika “itonal toTeko” (2 Pedro 1:21). Tlen tijyekojtias mitspaleuis tijueyichiuas toTeotsij ika itonal uan ika “tlen melauak”, ni kineki kiijtos tijkauas ma mitsyakana toTeotsij itonal uan tijchiuas tlen ya kineki (Juan 4:24).

•   Ximomaijto uan xikiljui toTeotsij ma mitspaleui (Lucas 11:13). ToTeotsij mitspaleuis tijnextis nopa kuajkuali tlamantli tlen kinextiaj katli kuali tlaneltokaj (Gálatas 5:22, 23). Ya mitsmakas tlalnamikilistli kema tikixnamikis tlaouijkayotl (Santiago 1:5).

•   Ximouampojchiua ininuaya katli kuali tlaneltokaj. Inijuantij mitspaleuisej nojua kuali titlaneltokas (Romanos 1:11, 12). Tlaj mouampoyouaj amo tlaneltokaj, mitsuejkatlalisej tlen toTeotsij (Santiago 4:4).

 Maske se akajya itstok ipan se religión, amo kiijtosneki kuali tlaneltoka. Biblia kiijtoua: “Intla se akajya kiijtoua kineltoka toTeko, pero axmomokuitlauia ika tlen kiijtoua; uan san tlen ueli kamati, uajka yajaya san moyolkajkayaua. Axtleno ipati itlaneltokilis” (Santiago 1:26).

 Biblia kiijtoua maseualmej katli tlaneltokaj, kiueyichiuaj toTeotsij kej ya kipaktia. Kimatij “onka san setsi toTeotsij itonal”, uan itonal toTeko kinpaleuia ma tlaueyichiuakaj sansejko ininuaya sekinok uan kej nopa kipiaj tlaseuilistli (Efesios 4:1-4).

 Tlen sekinok kiijtouaj: Nochi tlen yoltok tlaneltoka ipan toTeotsij.

 Tlen melauak: Nochi tlen toTeotsij kichijchijtok kiueyichiua (Salmo 145:10; Romanos 1:20). Maske kiampa, toTeotsij kichijki san maseualmej ma tlaneltokakaj. Tlapialmej amo uelij tlaneltokaj ipan toTeotsij uan san kichiuaj tlen inintlakayo kineki (2 Pedro 2:12). Biblia kiijtoua katli tlaneltoka amo moiljuia yon kichiua kej tlapialmej (Santiago 3:15; Judas 19).