Jehová itlajtoltemakauaj tlen Gran Bretaña kipeualtijtokej kichiua se ueyi kali Betel nechka Chelmsford, ipan altepetl Essex. Ipan ni yejyektsi tlali, itstokej miakej tlapialmej tlen kinmokuitlauiaj ika se tlanauatili tlen Reino Unido, tlen motokaxtia “ley de Vida Silvestre y del Campo de 1981”. ¿Tlake kichiuaj Jehová itlajtoltemakauaj uan kiampa kitlepanitasej nopa tlanauatili uan kinmokuitlauisej tlapialmej?

Ipan nopa tekitl Jehová itlajtoltemakauaj kichijkej pilkuakajontsitsij, uan nopaya momanauiskia nopa tlapiali tlen itoka lirón muscardino. Kiampa amo nemiskia nechka kampa tekitiskiaj, nojkia kinchiuilijkej kejuak se ojtli uejkapa kampa panoskiaj, uan kiampa amo kinkuitikisaskia se carro. Nojkia kichiuaj kampeka amo kuatsontekisej san kejueli. Kej nopa kuali kinmokuitlauiaj kampa itstokej nopa tlapialmej uan amo ma kinpolo tlen kikuasej.

Nojkia kinmanauiaj tlapialmej tlen mouauatatsaj kej: kouamej, topitsimej uan sekinok. Kinchiuilijkej kejuak ininchaj kampa momanauiskiaj ni tlapialtsitsij. Teipa se keskij tlakamej katli kinmokuitlauiaj tlapialmej kinuikakej sejkanok, uan kinkalakitoj kampa momanauiskiaj kema tlaseseya uan kintsajtsajkej kiampa amo tleno kinpanos. Jehová itlajtoltemakauaj ajachika ontlachiaj tlaj tlapialmej tlen mouauatatsaj amo monechkauiaj kampa kichijchiuaj nopa kali, pampa ueliskia kinpanos se tlenijki.

Nopaya nojkia itstokej tsotsomej, yeka kitlalijtokej tlauili tlen tlauiaj san kema panoj carros, kiampa nopa tsotsomej uelij patlanij uan kichiuaj tlen kinekij. Uan pampa inijuantij kitemouaj tlen kikuasej ipan kuatinij tlen nopaya onka, Jehová itlajtoltemakauaj kichiuaj kampeka amo tlauel kuatsontekisej. Yeka kitokasej miak kuauitl, kipano ome kilómetros. Uan maske kena kitsontektokej se keskij kuauitl, kinchiuilijtokej nopa tsotsomej pilkuakajontsitsij kampa uelis kochisej.

Jehová itlajtoltemakauaj nojkia kinmokuitlauiaj kuatinij tlen kipiaj tlauel miak xiuitl. Ipan ni kuatinij kichijtokej ininchaj miakej tlapialmej, kej tsotsomej uan totomej. Yeka kampa Jehová itlajtoltemakauaj kichijchiuaj nopa ueyi kali Betel, amo tekauaj ma nejnemikaj kampa chamani inineljuayo. Kej ni uan kej ya tikijtokej achtoui, Jehová itlajtoltemakauaj kinextiaj kitlepanitaj nopa tlanauatili tlen kichiua ma kimokuitlauikaj tlapialmej uan kuatinij ipan chelmsford.