Ipan México uan ipan makuili altepemej tlen Centroamérica, se 290 maseualmej kitlajtolkuepaj amatlajkuiloli tlen kimoyauaj Jehová itlajtoltemakauaj ipan kipano 60 tlajtoli. ¿Kenke moneki kichiuasej ni tekitl? Pampa kema maseualmej kipouaj ni amatlajkuiloli ipan inintlajtol amo ouij kikuamachiliaj uan tlen kipouaj asi ipan ininyolo (1 Corintios 14:9).

Tijnekij kuali tijtlajtolkuepasej amatlajkuiloli, yeka sekij katli kitlajtolkuepaj amatlajkuiloli ipan altepetl México yajtokej ipan pilaltepetsitsij kampa kamanaltij inintlajtol. Nama, katli kitlajtolkuepaj amatlajkuiloli itstokej kampa kamanaltij nopa tlajtoli tlen kitlajtolkuepaj. Nopa kinpaleuia kuali ma kitlajtolkuepakaj amatlajkuiloli uan maseualmej katli kipouaj amo ouij ma kikuamachilikaj.

¿Tlake kiijtouaj katli kitlajtolkuepaj amatlajkuiloli pampa mochijtok ni tlamantli? Federico, katli kitlajtolkuepa amatlajkuiloli ika náhuatl de Guerrero, kiijtok: “Niitstoya matlaktli xiuitl ne altepetl México, uan san nijpantik se familia katli kamatiyaya notlajtol. Uan nama ipan pilaltepetsitsij tlen mokauaj nechka kampa titlajtolkuepaj amatlajkuiloli, nochi maseualmej kamatij nopa tlajtoli”.

Karin, katli kitlajtolkuepa amatlajkuiloli ika nopa tlajtoli bajo alemán, uan yajki ipan estado Chihuahua, kiijtoua: “Niitstos ininuaya menonitas nechpaleuijtok nikilnamiktos nopa tlajtoli. Tiitstokej uan titlajtolkuepaj amatlajkuiloli ipan se pilaltepetsi, uan kema titlachiaj kalteno tikinitaj maseualmej katli kinpaleuis tlen tijchiuaj”.

Neyfi, katli kitlajtolkuepa amatlajkuiloli ika tlajtoli maya uan nama itstok Mérida (México), kiijtoua: “Kema titlamachtiaj tlen Biblia ika tlajtoli maya, tikitaj tlake tlajtoli amo kuali kikuamachiliaj. Uajka, tijtemoliaj kenijkatsa nojua kuali tijtlajtolkuepasej nopa tlajtoli”.

¿Kenijkatsa kinpaleuia katli kipouaj amatlajkuiloli ipan inintlajtol? Ma tikitakaj se neskayotl. Elena, katli kamanalti tlapaneco, sejse semana yauiyaya tlanechikoli ika tlajtoli español, ni kichijki se 40 xiuitl. Maske mosentiliyaya amo kikuamachiliyaya tlen tlamachtiyayaj. Ya kiijtoua: “Niauiyaya tlanechikoli pampa nijmatiyaya nopaya monekiyaya niitstos”. Uan kema pejki momachtia Biblia ika amatlajkuiloli tlen kichijchijtoyaj ika tlajtoli tlapaneco nojua tlauel kiiknelik toTeotsij, kitemaktilik inemilis uan moatsonpoliuiltik ipan 2013. Elena kiijtoua: “Nijtlaskamatilia Jehová pampa kikajtok ma nijkuamachili tlen Biblia tlamachtia”.