Ipan julio, xiuitl 2013, 28 Jehová itlajtoltemakauaj tlen Brasil kistejkej tlen altepetl São Félix do Xingu uan asitoj kampa itstokej nopa cayapós uan yurunas. Monejki kiixkotonasej ueyatl Xingú, yeka kitekiuijkej se akali tlen kipia 15 metros iueueyaka. Nopa ueyatl, kipia 2,000 kilómetros iueueyaka, yaui ika norte uan asi ipan ueyatl Amazonas.

Ni kichijkej pampa kinekiyayaj kinpouilisej nopa kuali tlamachtili katli itstokej iteno nopa ueyatl. Kema panotoya eyi tonali, asitoj ipan pilaltepetsi Kokraimoro, uan nopaya kuali kinselijkej. Kema kinitakej, se siuatl ika miak pakilistli pejki kinnojnotsa ika tlajtoli señas. Katli kinyakanayaya kiniljuik nopa siuatl kinekiyaya kiijtos: “¡Xiualakaj! ¡Tijnekij tiinmechixmatisej!”.

Jehová itlajtoltemakauaj kinkamauijkej nochi maseualmej: sekij ika tlajtoli portugués uan sekij ika tlajtoli señas, uan nojkia kitekiuijkej nopa yejyejtsitsij tlaixkopinkayomej tlen kipia nopa amatlajkuiloli. Nopa maseualmej kiselijkej nopa amatlajkuiloli ika miak pakilistli. Tlauel kinpantik nopa pilamochtsi Xijtlakakili toTeotsij.

Gerson, se precursor especial (o katli senkistok tlatekipanoua) eua São Félix do Xingu. Ya kiijtoua tlen kichijki se tlakatl kema kiselik nopa amochtli Noamoch katli nechpouilia tlen kiijtoua Biblia: “Kema kiitak nopa amochtli, chikauak kiitskik ika ome imax, uan amo kinejki kikauas yon se tlalochtli”.

Ipan nopa pilaltepetsitsij, Jehová itlajtoltemakauaj kikajtejkej se 500 amochtli uan pilamochtsitsij, uan nopa maseualmej tlauel kintlaskamatilijkej. Ipan Kawatire, nopa maseualmej tlauel kinpaktik kimatisej ni Tlaltipaktli nechka mochiuas se Xochimili. Tonjaikwa, se cayapó, kiijtok: “Ipan Xochimili, nochi maseualmej itstosej kej tojuantij”.

Ipan São Félix do Xingu miakej maseualmej kimatkej tlen kichiuaskia Jehová itlajtoltemakauaj. Simone, se katli senkistok tlatekipanoua, kiijtok sekij kiijtouayayaj amo kinkauiliskiaj ma kalakikaj ipan nopa pilaltepetsitsij. Maske sekij kiampa moiljuiyayaj, Simone kiijtoua: “Kuali techselijkej, uan tikinnojnotskej nochi maseualmej”.