Jesús kitetapouij se ixneskayot kampa ininka tajtoj se takat tominpixkej uan Lázaro akin amo yekmelauj nenkej (Lucas 16:19-31). Nejon takamej kinixnextijkej ome tataman taltikpakneminij: (1) taixyekananij judíos itech taneltokalis akin semi moueyimatiaj uan (2) taltikpakneminij yolyemankej akin ika nochi ininyolo kiselijkej itamachtilis Jesús.

Itech nejin tamachtilis tiknankiliskej nejin netajtanilmej:

•  ¿Toni kijtoj Jesús keman ininka tajtoj takat tominpixkej uan Lázaro?

•  ¿Yekmelauj panok tein kitetapouij Jesús?

•  ¿Kinextia tein kitetapouij Jesús ke yekmelauj tatatokej nochipaya akin amo yolkualmej?

•  ¿Toni kijtosneki tein kitetapouij Jesús?

 Itech Lucas capítulo 16, Jesús ininka tajtoua ome takamej akin senkis mopatak ininnemilis.

 ¿Toni kitetapouij Jesús? Se takat tominpixkej kipiaya miak taman tein ika moyolpaktiaya, uan ikaltenoj kikauayaj se takat pobre akin monotsaya Lázaro. Yejua kitelnekia kikuas tein panuetsia de imesa takat tominpixkej. Satepan Lázaro momikilij uan ángeles kiuikakej uan kitalijkej iuan Abrahán. Takat tominpixkej no momikilij uan kitokkej. Jesús kisentoka ininka tajtoua kemej yeskia yoltoyajok satepan ke momikilijkej. Takat tominpixkej semi tajyouijtoya itech tit, yejua ika kiluij Abrahán maj kititanini Lázaro para maj momajpilajakiani itech at uan maj kinenepiltaliliani tepitsin atsin. Abrahán kiluij ke amo, ke tein yejuan kipanokaj senkis mopataka uan ke kinxelouaya se ueyi ostok tein uejkatan tein amo akin uelia kipanauiaya.

 Amo. Nejin sayoj se ixneskayot tein Jesús kitetapouij porin kinekia kinmachtis teisa akin kikaktoyaj. Seki motelmachtianij kijtouaj ke amo yekmelauj panok. Kemej neskayot, itech Biblia de Lutero tein kisak itech xiuit 1912 kipia seki tajtolmej tein kijtouaj ke katka sayoj se tetapouilis. Uan Biblia de Jerusalén, tein católico, kijtoua itech se nota ke sayoj se tetapouilis tein amo mokixtij itech teisa tein mochiujkaya.

 ¿Kinekia tamachtis Jesús ke teisa panoua satepan ke se momikilia? ¿Kijtosnekia ke sekin tajyouiaj kampa nochipaya tatatokej uan ke Abrahán uan Lázaro yetoyaj iluikak? Amo, uan miak taman kinextia nejon.

 Kemej neskayot:

•   Komo takat tominpixkej yekmelauj tatatoskia, ¿melauj ke tit kiuatsaskia atsin tein Lázaro kipiaskia itech imajpil?

•   Uan maski amo uakiskia, ¿ueliskia moamikseuis takat tominpixkej ika tepitsin atsin komo yekmelauj tatatoskia?

•   Jesús senkis kijtojka ke ayamo akin yaya iluikak, yejua ika, ¿yekmelauj ueliskia yoltos Abrahán ompa iluikak? (Juan 3:13).

 Amo. Maski amo yekmelauj panok, sekin kijtouaj ke kiixnextia ke akin yolkualmej youij iluikak uan ke akin amo yolkualmej tatatokej nochipaya. a

 Sayoj ke ¿taixejekol nejon tein kijtouaj? Amo.

 Nejon tamachtilis amo mouika ika tein Biblia tamachtia kemej moajsij mikemej. Kemej neskayot, Biblia amo kijtoua ke nochin akin yolkualmej uan momikilijkejya yetokej ompa iluikak kampa semi yolpakij, nion ke akin amo yolkualmej nochipaya kintajyouiltijtokej itech tit, ta senkis kijtoua ke “akin yoltokej kimattokej ke momikiliskej, sayoj ke akin momikilijkejya amo teyi kimatijok” (Eclesiastés 9:5).

 Tein Jesús kitetapouij kinextia ke ininnemilis ome tataman taltikpakneminij senkis mopataskia.

 Miak taman kinextia ke takat tominpixkej kinixnextiaya taixyekananij judíos itech taneltokalis “akin kitayekanaltiayaj motomintiskej” (Lucas 16:14). Maski kikakiaj tein Jesús tamachtiaya, kiixtopeujkej. Nejon taixyekananij amo kinyekitayaj akin amo ueyichiuanimej katkaj (Juan 7:49).

 Lázaro kinixnextiaya taltikpakneminij akin amo ueyichiuanimej katkaj akin kiselijkaj itamachtilis Jesús. Taixyekananij itech taneltokalis tel amo kinyekitayaj nejon taltikpakneminij.

 Ininnemilis nejon ome tataman taltikpakneminij senkis mopatak.

•   Taixyekananij judíos itech taneltokalis kinemiliayaj ke kipiayaj itatiochiualis Dios, sayoj ke tein melauj, yejuatsin kinitaya kemej yeskia mikemej porin amo kiselijkej itamachtilis Jesús. Yejua ika Dios kinixtopeuak yejuan uan kemej kiueyichiuayaj. Tein melauj, tein Jesús uan itatojtokakauan kiteixmatiltiayaj tel amo kiuelkakiaj (Mateo 23:29, 30; Hechos 5:29-33).

•   Maski taixyekananij itech taneltokalis kinsenkaujkaj taltikpakneminij akin amo ueyichiuanimej katkaj, axkan nion teyi kintsakuiliayaok maj uelinij motokianij iuan Dios. Miakej kiselijkej itamachtilis Jesús uan nejon tamachtilis kintelpaleuij uan kichiuak maj ueliskiaj kipiaskiaj itatiochiualis Dios nochipaya (Juan 17:3).