¿Uelis nechyolseuis Biblia?
Tein Biblia kijtoua
Kemaj (Romanos 15:4). Miakej kipanotokej uejueyi ouijkayomej uan amo kuali momachiliaj, uan tein kijtoua Biblia kinyolseuiani.
Itech nejin tamachtilis tikitaskej seki tajkuilolmej itech Biblia tein uelis mitsonpaleuiskej komo tikonpanotok semej nejin ouijkayomej:
Uejueyi ouijkayomej
Salmo 23:4: “Maski ninentinemis tepetsintan kampa semi tayouayan, amo nikmouilis maj nechpano tein amo kuali, porin tejua tietok nouan”.
Tein kijtosneki: Komo tikontataujtia Dios uan tikonixtajtoltia iTajtol, Biblia para maj mitsonixyekana, mitsonpaleuis xionmoyolchikaua keman tikonpias ouijkayomej.
Filipenses 4:13: “Nikpia chikaualis para nikixnamikis nochi porin Dios nechmaka chikaualis”.
Tein kijtosneki: Dios uelis mitsonmakas chikaualis tein mitsonpaleuis keman tikonpias tein yeski ouijkayot.
Momikilij aksa akin tikontasojtaya
Eclesiastés 9:10: “Amo onkak tekit nion teisa tein monemilia mochiuas nion taixmatilis nion tamatilis itech Miketekoch”.
Tein kijtosneki: Akin momikilijkejya amo teyi kimatijok, yejua ika amo tajyouiaj nion ueli techchiuiliaj tein amo kuali.
Hechos 24:15: “Dios kichiuas maj oksepa nemikan”.
Tein kijtosneki: Dios uelis kichiuas maj oksepa nemikan akin tikintasojtayaj.
Semi tionmotajtakoltia teisa tein tikonchiuak
Salmo 86:5: “Jehová, a tiyolkuali uan tikneki titetapojpoluis; semi ueyi netasojtalis tein amo tami tein tikinpialia nochin akin mitsnotsaj”.
Tein kijtosneki: Dios kintapojpoluia akin yekmelauj moyolpataj uan kiixtalijtokej amo oksepa kichiuaskej tein amo kuali tein kichiujkaj.
Salmo 103:12: “Uejka kitalij totajtakoluan, ijkon kemej ueuejka moajsij tonalkisayampa uan tonalkalakyampa”.
Tein kijtosneki: Keman Dios techtapojpoluia amo techelnamiktiaok totajtakoluan para kichiuas maj amo kuali timomachilikan oso para techtatsakuiltis. Tel uejka kintalia.
Tayokol
Salmo 31:7: “Tikitani notajyouilis; tikmati ke semi nimotekipachoua”.
Tein kijtosneki: Dios kimati nochi tein tikonijyouijtok. Yejuatsin kuali kiajsikamati keniuj tionmomachilia, maski oksekin amo.
Salmo 34:18: “Jehová iniuan yetok akin tajyouijtokej; kinmakixtia akin semi tayokoxtokej”.
Tein kijtosneki: Dios mitsoniluia ke yetos mouan keman tiontayokoxtos. Yejuatsin uelis mitsonmakas chikaualis tein mitsonpaleuis xikonxiko tayokol.
Kokolis oso kokoxkayot
Salmo 41:3: “Jehová kipaleuis keman uetstos porin mokokoua”.
Tein kijtosneki: Dios uelis mitsonpaleuis xiontaxiko komo semi tionmokokoua; mitsonpaleuis amo semi xionmotekipacho uan xiontaxiko, mitsonmakas chikaualis uan tamatilis para kuali tiontaixpejpenas.
Isaías 33:24: “Nion se taltikpaknenkej kijtos: ‘Nimokokoua’”.
Tein kijtosneki: Dios kijtoua ke ejkos tonal keman nochin paktoskej.
Netekipacholis
Salmo 94:19: “Keman semi nimotekipachouaya, tejua tinechyolseuiaya uan tikchiuaya maj kuali nimomachili”.
Tein kijtosneki: Komo tiktemouaj inepaleuil Dios keman semi timotekipachojtokej, yejuatsin techpaleuis maj tiyolseujtokan.
1 Pedro 5:7: “Xikauilikan nochi tein namechtekipachoua porin yejua kiyolmachilia tein namechpanotok”.
Tein kijtosneki: Dios semi kitekipachoua tein techpanoua, uan yejua ika kineki maj tikiluikan nochi tein techtekipachoua.
Neteuilis
Salmo 46:9: “Yejua kitamia neteuilismej noyampa taltikpak”.
Tein kijtosneki: Amo uejkaua, iTaixyekanalis Dios kitamis nochi neteuilismej.
Salmo 37:11, 29: “Akin yolnejmachmej ininaxkatis taltikpak uan yolpakiskej porin semi yolseujtoskej”. “Akin yolmelaujkej ininaxkatis taltikpak uan ompa nemiskej nochipaya”.
Tein kijtosneki: Akin yolkualmej yolseujkanemiskej nochipaya nikan taltikpak.
Mitsontekipachoua tein panos satepan
Jeremías 29:11: “Jehová kijtoua: ‘KuaIi nikmattok tein nikneki xikpiakan. Nikneki xiyolseujtokan uan maj amo namechpano nion teyi tein amo kuali. Nikneki xikchiakan tein kuali satepan’”.
Tein kijtosneki: Dios motenkaua iniuan itekitikauan ke kualtsin nemiskej satepan.
Apocalipsis 21:4: “Kinuachilis nochi ininixayo, uan amo akin momikilisok, nion tayokoyas nion chokas nion tajyouis. Tamikya nochi tein achto techtajyouiltiaya”.
Tein kijtosneki: Dios kijtoua ke kiixpolos nochi tein amo kuali tein mochiua noyampa taltikpak.
a Dios monotsa Jehová (Salmo 83:18). Xikonlero tamachtilis “¿Quién es Jehová?”
Xa no tikonuelitas
TANEJMACHTIJKEJ
¿Keniuj uelis mitsonpaleuis inetasojtalis Dios?
Biblia techpaleuia maj okachi titakuaujtamatikan ke mochiuas tein Dios motenkauak.
TEIN TIMOTAJTANIAJ DE BIBLIA
¿Toni nechpaleuis maj nikchia nikselis tein kuali?
Tein Biblia tamachtia uelis mitsonpaleuis okachi kuali xionnemi axkan uan xikonneltoka ke uelis tikonchias maj pano tein kuali satepan.
OKSEKI TAMACHTILISMEJ
Tein uelis techyolseuis keman momikilia akin tiktasojtaj
Keman momikilia se akin tiktasojtaj, tiknemiliaj ke amo akin kiajsikamati keniuj timomachiliaj. Sayoj ke Dios kemaj uan uelis techpaleuis.
SEKI TAMAN TEIN BIBLIA TAMACHTIA TEIN TAYEKANTOKEJ
¿Keyej Dios kikaua maj onka tajyouilis?
Itech Biblia tikajsij se tanankilil tein taixejekol uan techyolseuia.
