2 Corintios 8:1-24
8 Nokniuan, axkan tiknekij tamechmatiltiskej tein mochiujtok itech nechikolmej nikan Macedonia ika itatiochiualis Dios tein amo technamiki.
2 Keman kipanotoyaj se ueyi ouijkayot tein semi kintajyouiltij, kitemakakej tein kipiayaj ika miak pakilis maski semi pobres. Nejin kinextij ke semi kualtakamej.
3 Nejua ueli nikyekijtoua ke kitemakakej nochi tein uelkej, hasta okachiok.
4 Porin maski amo tikintajtanijkej, nejin tokniuan semi techtataujtijkej maj tikinkauakan maj kitemakakan tein kipiaj, uan ijkon no ueliskiaj kinpaleuiskej akin Dios moinxelouilij.*
5 Uan kichiujkej okachi ke tein tikchiayaj, porin achto mochikaujkej kitekitiliskej toTekotsin ika nochi ininyolo uan techpaleuijkej ijkon kemej Dios kineki.
6 Yejua ika tikyolchikaujkej Tito maj kitamisentili tein nankitemakaskiaj ika nochi namoyolo, porin ipa peujkaya kisentilia.
7 Nochi tein nankichiujtokej namejuan semi kuali. Semi nantakuaujtamatij, kualtsin nantanojnotsaj, nankiixmatij miak taman, semi namochikauaj itech nochi tein nankichiuaj uan yekmelauj nantetasojtaj kemej tejuan tamechtasojtaj. Yejua ika no xitemakakan tein nankipiaj ika nochi namoyolo.
8 Amo namechnauatijtok xitapaleuikan, ta nikneki xikitakan keniuj oksekin mochikauaj tapaleuiskej uan no nikneki nikitas ox yekmelauj nantetasojtaj.
9 Porin namejuan nankiixmatij itatiochiualis toTekotsin Jesucristo tein amo technamiki: maski amo teyi kipolouaya, namoka mochiuak pobre, nejon namechpaleuiskia maj amo teyi namechpolo.
10 Namechiluiti tein niknemilia. Nejin namechpaleuia, porin se xiuitya nankipeualtijkej nejin tekit; tein melauj, nankinextijkej ke nankinekiaj nankichiuaskej.
11 Yejua ika xiktamichiuakan tein nankipeualtijkej, uan xiktemakakan ijkon kemej nanueliskej. Ijkon nankinextiskej ke nankitemakaj ika nochi namoyolo.
12 Porin tein aksa* kitemaka ika nochi iyolo kiyolpaktia Dios, keman kitemaka tein kipia uan amo tein amo kipia.
13 Uan amo nikneki maj oksekin kitelpiakan uan namejuan maj amo namechajsi,
14 ta nikneki maj amo teyi namechpolo namejuan nion yejuan. Ijkon, ika tein axkan nankitelpiaj nankinpaleuiskej akin amo kinajsi, uan ika tein yejuan kitelpiaj no namechpaleuiskej itech tein amo namechajsi, uan ijkon namosenpaleuiskej.
15 Ijkon kemej ijkuiliujtok: “Akin kipiaya miak, amo kipiak okachi, uan akin amo semi kipiaya, amo teyi kipoloj”.
16 Tiktasojkamatiliaj Dios maj Tito namoka motekipacho kemej tejuan.
17 Yejua amo sayoj kichiuak tein tikiluijkej, ta no yekmelauj kinekik kichiuas, uan hasta kiixtalij namechkalpanotiuj.
18 Iuan tiktitanij tokniuj akin itech nochi nechikolmej kuali ika tajtouaj porin kiteixmatiltia kuali tanauatilmej.*
19 Uan amo sayoj nejon, ta tokniuan itech nechikolmej kiixtalijkej maj no touan youi, para techpaleuis maj tikxejxelokan tein ika miak pakilis nankitemakakej. Nejon tapaleuis maj moueyitali toTekotsin uan tiknextiskej ke yekmelauj tiknekij titapaleuiskej.
20 Ijkon amo akin uelis kijtos ke amo kuali tikuitokej tein nankitemakakej ika miak pakilis.
21 Porin ‘timochikauaj amo titakajkayauaskej itech nion teyi, amo sayoj iixpan Jehová,* ta no ininixpan oksekin’.
22 Uan no, iniuan tiktitanij okse tokniuj, akin miakpa kinextiani ke takuaujtamach uan tikitanij ke itech miak taman kuali tekiti. Sayoj ke axkan okachi yektekitis porin semi takuaujtamati namouan.
23 Komo aksa tajtani akoni Tito, xikmatikan ke yejua notekitikaikniuj akin no namechpaleuia. Uan no, komo aksa tajtani akonimej nejin tokniuan, xikmatikan ke tokniuan itech nechikolmej kintitankej* uan yejuan kiueyitaliaj Cristo.
24 Yejua ika xiknextikan ke nankintasojtaj uan xikinnextilikan tokniuan itech nochi nechikolmej keyej kuali namoka titajtouaj.
Tajtolmelaualismej
^ Oso “chipaujkej iixpan Dios”.
^ Oso “akin”, “akaj”.
^ Oso “tajtolmej”.
^ Tajtol griego, a·po′sto·los, “tatitanil”.
