Gálatas 5:1-26
5 Cristo techmakixtij para maj amo tietokanok imako iTanauatil Moisés. Yejua ika, ijkon xiksentokakan uan amo ximokauakanok maj kichiuakan ximoajsikan temako.
2 Xikitakan, nejua Pablo, namechiluia ke komo namotekij,* amo namechpaleuis tein Cristo kichiuak.
3 Oksepa nikiluia sejse takat ke komo moteki* moneki kitakamatis nochi itanauatil Moisés.
4 Namejuan, akin nankitemouaj maj Dios namechita ke nanyolmelaujkej porin nankitakamatij tanauatil, nankikaujkej Cristo. Nankiixtopeujkej itatiochiualis tein amo technamiki.
5 Sayoj ke tejuan, ika ichikaualis Dios, semi tikchixtokej* tiyeskij tiyolmelaujkej iixpan Dios porin titakuaujtamatij.
6 Porin, kemej tipouij iuan Cristo Jesús, amo tapaleuia se motekis* oso amo. Tein kemaj tapaleuia yejua komo se takuaujtamati uan se tetasojta.
7 Namejuan kuali namotalojtoyaj. ¿Akoni namechtsajtsakuilij para amo xiksentokakan xiktakamatikan tamachtilis tein melauak?
8 Akin namechnotstok amo yejua akin namechtajtolmakak ijkon xikchiuakan.
9 Tepitsin levadura kixokoltia nochi tixti.
10 Nitakuaujtamati ke namejuan, akin nanpouij iuan toTekotsin, amo taman nantanemiliskej. Sayoj ke, akin namechkuejmolojtok, kitatsakuiltiskej kemej kinamiki.
11 Nokniuan, komo niksentokaskia nitamachtijtinemiskia ke moneki se motekis,* yejuan amo nechtajyouiltiskiaj, uan amo akin nikualantiskia porin nitamachtia ke Cristo kimiktijkej itech kouit.*
12 Niknekiskia maj motamitekikan* nejon akin kitemouaj namechpojpoloskej.
13 Nokniuan, namejuan namechnotskej para amo ximoajsikan temako. Sayoj ke kemej amo namoajsijok temako, amo xiknemilikan ke uelis nankichiuaskej tein kinejneki namonakayo, ta ximotekitilikan kemej takeualmej se iuan okse porin namotasojtaj.
14 Porin nochi iTanauatil Moisés motamichiua ika nejin tanauatil: “Xiktasojta moknitsin kemej tejua timotasojta”.
15 Komo maski ijkon nankisentokaj namokejkejtsomaj uan namokuajkuaj, amokan namoualmiktijtij.
16 Yejua ika, namechiluia nejin: xiksentokakan ximoyekanakan ika ichikaualis Dios uan ijkon amo nankichiuaskej nion teyi tein kinejneki namonakayo.
17 Porin tein kinejneki se inakayo kiixnamiki ichikaualis Dios, uan ichikaualis Dios kiixnamiki tein kinejneki se inakayo. Kemej nejon ome taman moijixnamikij, namejuan amo nankichiuaj tein nankichiuasnekij.
18 Uan no, komo ichikaualis Dios namechixyekana, amo namoyekanajok ika tanauatil.
19 Moyekita tein kichiuaj akin moyekanaj ika tein kinejneki ininnakayo: keman auilnemij,* kichiuaj tein pitsotik, kichiuaj tein tetajyaltia uan amo ixpinauaj,*
20 kiueyichiuaj tein kiueyichiuaj nikan taltikpak, mokalakiaj itech naualot,* tetauelitstinemij, motajtolteuijtinemij, tenexikoluijtinemij, fiero kualanij, tateuisnekij, texexelouaj, kipeualtiaj yankuik taneltokalismej,
21 kinekij moaxkatiliskej tein oksekin kipiaj, tauanaj, eliuistitinemij itech iluimej, uan kichiuaj okseki taman kemej nejin. Namechnauatia, kemej achto namechnauatijkaya, ke akin kichiujtinemij nejin amo kalakiskej itech iTaixyekanalis Dios.
22 Sayoj ke, akin kinixyekana ichikaualis Dios: tetasojtaj, yolpakij, yolseujtokej, amo yolijsiuij, kualtakamej, yolkualmej, takuaujtamatij,
23 yolnejmachmej uan ueli motsakuiliaj. Amo onkak nion se tanauatil tein uelis kintakaualtis maj kichiuakan nejin.
24 Tein melauj, akin iaxkauan Cristo Jesús kemej yeskia kipilojkej itech kouit tein amo kuali tein semi kinejneki ininnakayo.
25 Komo ichikaualis Dios techixyekana, maj tiksentokakan tiktemokan maj techixyekana ichikaualis Dios.
26 Maj amo timoueyimatikan,* maj amo tiktemokan timotataniskej iniuan oksekin uan maj amo timonexikoluikan.*
Tajtolmelaualismej
^ Oso “namochiuiliaj circuncisión”. Xikonita circuncisión.
^ Oso “mochiuilia circuncisión”.
^ Oso “tikchatokej”.
^ Oso “se mochiuilis circuncisión”.
^ Oso “se mochiuilis circuncisión”.
^ Xikonita kouit kampa tetajyouiltiaj.
^ Oso “maj mocaparokan”. Ijkon amo ueliskiaj kitakamatiskej tanauatil tein yejuan kijtouayaj ke monekia se kitakamatis.
^ Tajtol griego, pornéia. Xikonita auilnemilis.
^ Tajtol griego, asélgueia. Xikonita akin kichiuaj tein tetajyaltia.
^ Oso “amo timoueyinekikan”.
^ Oso “amo tiknekikan timoaxkatiliskej tein teaxka”.
