Génesis 3:1-24
3 Kouat okachi motachiliaya ke nochin koujtajtapialmej tein Jehová Dios kinchijchiujka. Nejon kouat kitajtanij* siuat: “¿Yekmelauj Dios amo namechkaua xikuakan nion se koujtakilot tein onkak itech xochital?”.
2 Uan siuat kinankilij: “Uelis tikuaskej tein yeski koujtakilot tein onkak itech xochital.
3 Sayoj ke itakilo kouit tein yetok tatajko, Dios kijtoj: ‘Amo xikuakan uan nion xikmatokakan.* Komo nankikuaj namikiskej’”.
4 Uan kouat kiluij in siuat: “Amo, amo namikiskej,
5 ta Dios kimati ke itech tonal keman nankikuaskej, nanixtajtapouiskej uan nanyeskij kemej Dios porin nankiixmatiskej tein kuali uan tein amo kuali”.
6 Yejua ika, siuat kiitak ke itakilo nejon kouit kuali katka para se kikuas uan moitaya ke uelik. Tein melauj, kouit kualtsin moitaya. Uan siuat kitekik koujtakilot uan peuak kikua. Satepan, keman iuan yetoyaya itakauj, kimakak uan yejua no peuak kikua.
7 Uan ijkuak, kemej yeskia ixtajtapoujkej uan kiitakej ke amo takentoyaj. Yejua ika, kijilpijkej higojxiuit uan ika motakentijkej.
8 Satepan, tiotakpa keman kualtsin taejekaya, takat uan isiuatsin kikakkej ke Jehová Dios kinnotstoya keman yejua nentoya itech xochital. Uan motatitoj* kampa onkayaj koujmej porin amo kinekiaj maj Jehová Dios kinita.
9 Uan Jehová Dios miakpa kinotstoya in takat ijkuin: “¿Kani tietok?”.
10 Uan keman takat tekit tanankilij, kijtoj: “Nikakik keman tinechnotstoya, sayoj ke kemej amo nitakentoya, nimouik uan nimotatij”.*
11 Uan Dios kitajtanij: “¿Akoni mitsiluij ke amo titakentoya? ¿Tikuaj koujtakilot tein nimitsiluij amo xikua?”.
12 Takat kinankilij: “Siuat tein tinechmakak, yejua nechmakak koujtakilot uan nikuaj”.
13 Yejua ika Jehová Dios kiluij siuat: “¿Keyej tikchiuak nejon?”. Uan siuat kinankilij: “Kouat nechkajkayauak, yejua ika nikuaj”.
14 Uan Jehová Dios kiluij in kouat: “Kemej tikchiuak nejin, de nochin tapialmej tein momatij kalijtik uan nochin koujtajtapialmej, tejua mitspanos tein amo kuali. Timoxoxolatstinemis uan tikuajtinemis tal hasta ke timikis.
15 Uan nikchiuas ximotauelitakan tejua uan siuat uan maj motauelitakan mokoneuj* iuan ikoneuj* siuat. Yejua mitskuaxamanis uan tejua tikotskejtsomas”.
16 Uan Dios kiluij siuat: “Nikchiuas okachi xitajyoui keman tikokoxkayetos, uan mitskokos keman titayolitis. Tiktelnekis tietos iuan motakauj uan yejua mitsixyekanas kemej kinekis”.
17 Uan Dios kiluij Adán:* “Kemej tiktajtolkakik mosiuatsin uan tikuaj koujtakilot tein nimitsiluij ‘Amo xikua’, itech taltsin amo moyektachiuasok, uan nejon motajtakol. Monekis titeltekitis para uelis tikixualtis tein tikuas hasta ke timikis.
18 Itech tal ixuas uitsti uan yeski xiuijtik, uan monekis tikuas kilmej uan xiuit tein moskaltis.
19 Monekis titeltekitis hasta timitonis para uelis titakuas. Ijkon yeski hasta ke timikis uan timokepas tal porin ika nejon tichijchiujtok. Porin tichijchiujtok ika tal uan timokepas tal”.
20 Satepan, Adán kitokaytij isiuatsin, Eva,* porin yejua yeskia ininmomaj nochin akin yoliskiaj.
21 Uan Jehová Dios kinchijchiuilij Adán uan isiuatsin ueueyak tasal* para maj motalilikan. Kichijchiuak ika ininpankuetaxyo tapialmej.
22 Uan Jehová Dios kijtoj: “Axkan takat tamati kemej tejuan porin kiixmati tein kuali uan tein amo kuali. Yejua ika, amo uelis nikauas maj no kiteki uan maj kikua itakilo kouit tein kiixnextia inemilis uan maj nemi nochipaya”.
23 Uan Jehová Dios kikalankixtij den xochital tein kichijchiujka ompa Edén para maj tatoka itech tal tein ika chijchiujtoya.
24 Satepan ke kikalankixtij, kintalij seki querubines uan se machete tein ojkan tenej* tein xotatoya uan momamalakachojtoya. Kintalij kampa ika ualkisa tonaltsin itech xochital ompa Edén. Ijkon kitsakuak ojti para maj amo akin ajsi kampa yetoya kouit tein kiixnextia se inemilis.
Tajtolmelaualismej
^ Oso “kitajtoltij”.
^ Oso “nion xikitskikan”, “nion xikmachilikan”.
^ Oso “mocholtitoj”.
^ Oso “nimocholtij”.
^ Oso “mokoneuan”.
^ Oso “ikoneuan”.
^ Tokayit tein kijtosneki ‘takat’.
^ Tokayit tein kijtosneki ‘yoltokʼ.
^ Oso “tilmaj”.
^ Oso “espada”.
