Génesis 6:1-22
6 Keman takamej uan siuamej peuak momiakiliaj itech nochi taltikpak uan peuak kinpiaj siuapipil,
2 ikoneuan toTajtsin Dios* peuak kiitaj ke nejon siuapipil katkaj tel kuakualtsitsin. Yejua ika peuak monajnamiktiaj iniuan nochin akin kinekkej.
3 Uan Jehová kijtoj: “Amo nikauas maj takat kisentoka nemi porin semi tajtakolchiua. Yejua ika nemis sayoj 120 xiujmej”.
4 Keman Dios kijtoj nejin, nemiajya uejueyi takamej* itech taltikpak. Nejon uejueyi takamej katkaj konemej tein ángeles* kinpiakej iniuan siuamej akin iniuan motekayaj. Itech nejon tonalmej, yejuan tel chikaujkej katkaj uan kintelixmatiaj.
5 Jehová kiitak ke akin nemiaj nikan taltikpak okachi kichiuayaj tein amo kuali, uan nochipa sayoj kiyolnemilijtinemiaj tein amo kuali.
6 Uan Jehová motayokoltij porin kichijchiuak takat nikan taltikpak, uan semi moyolkokoj.
7 Yejua ika Jehová kijtoj: “Nikinixpoloti nochin akin nikinchijchiuak uan nemij itech taltikpak. No nikinixpoloti tapialmej tein momatij kalijtik, tein moxoxolatsaj uan okuiltsitsin tein patanij ejekaixko. ¡Maj amo nikinchijchiuani!”.
8 Sayoj ke Noé kiyolpaktiaya Jehová.
9 Nikan ika motajtoua Noé.
Noé kichiuaya tein kuali yetok. Yejua katka yolchipauak, amo kemej oksekin akin ijkuak nemiaj. Kichiuaya tein toTajtsin Dios kineki.*
10 Satepan, Noé kinpiak eyi okichpipil: Sem, Cam uan Jafet.
11 Uan toTajtsin Dios kiitak ke itech taltikpak fiero tachiujtoya uan kampa yeski moteuiayaj.
12 Kemaj, Dios pantachiak nikan taltikpak uan fiero tachiujtoya. Nochin akin nemiaj itech taltikpak kichiuayaj tein tel amo kuali.
13 Uan Dios kiluij Noé: “Nikixtalijya nikixpolos nochi tein yoltok, porin itech taltikpak nochin semi tateuiaj. Yejua ika nikinixpoloti uan no niktamiti nochi tein onkak itech taltikpak.
14 Xikchijchiua se ueyi barco* ika kouit tein chokiloj. Xikchijchiuili cuartos uan xiktalili chapopote* taijtikkopa uan kalampakopa.
15 Ijkon xikchijchiua: moneki kipias 134 metros* de ueyak, 22 metros* de patauak uan 13 metros* de uejkapan.
16 Moneki kipias eyi piso. Uan hasta ajko moneki kipias se ventana para maj tatanesto. Nejin ventana moneki yetos ome cuarta* tani* de ikuapan.* Uan puerta tein tikchijchiuilis moneki yetos tanakastankopa.
17 ”Uan nikchiuas maj tetsaujkakioui para maj taapexoni* itech nochi taltikpak uan maj ixpoliui nochi tein yoltok uan mijyotia.* Nochi tein onkak itech taltikpak mikis.
18 Nimotenkaua mouan ke nimitsmakixtis. Moneki tikalakis itech barco iuan mookichpipiluan, mosiuatsin uan mosiuamouan.
19 No moneki tikinkalakis itech barco ojome de se taman tapial, se tapialueuet uan se tapial lamat para maj amo ixpoliuikan.
20 Mitsajsitiuij ojome de nochi tataman okuiltsitsin tein patanij, ojome de nochi tataman tapialmej tein momatij kalijtik uan ojome de nochi tataman tapialmej tein moxoxolatsaj, uan kalakiskej itech barco para tikinpaleuis maj yoltokan.
21 Uan moneki tiksentilis uan tikalakis nochi tataman takual para titakuas tejua uan tapialmej”.
22 Uan Noé kichiuak nochi tein Dios kinauatijka. Kichiuak ijkon kemej kiluijka.
Tajtolmelaualismej
^ Oso “ángeles”.
^ Oso “ikoneuan toTajtsin Dios”.
^ Itech hebreo, “Nentinemia iuan Dios”.
^ Oso “se arca”.
^ Oso “alquitrán”.
^ Itech hebreo, “300 molikmej”. Xikonita B14.
^ Itech hebreo, “50 molikmej”.
^ Itech hebreo, “30 molikmej”.
^ Itech hebreo, “se molik”.
^ Oso “atauj”, “tauakal”.
^ Nejin tajtolmej xa no kijtosneki ke tatapotoya porin tein ika kuatsaktoya barco chijchiujtoya para maj ojkan ijxika in at. Itech tajtol hebreo moijtoua tsóhar.
^ Oso “taatemi”.
^ Oso “ijsika”.
