Romanos 13:1-14
13 Maj nochin kintakamatikan tekiuanij akin taixyekanaj, porin Dios kinmakatok tanauatil; sejse yetok porin Dios kintalij kampa yetokej.*
2 Yejua ika, komo tikixnamikij inintanauatil, tein melauj tikixnamiktokej Dios; akin kiixnamiki nejin tein Dios kiixtalij, kitatsakuiltiskej.
3 Akin kichiuaj tein kuali amo kinmouiliaj tekiuanij, sayoj ke akin kichiuaj tein amo kuali, kemaj kinmouiliaj. Yejua ika, ¿amo tikneki tikmouilijtos tekiuaj? Komo ijkon, xiksentoka xikchiua tein kuali uan yejua mitsueyitalis.
4 Yejua kitekitilijtok Dios uan uelis mitspaleuis. Sayoj ke komo tikchiujtok tein amo kuali, ximoui, porin tekiuaj kinamiki uan kipia tanauatil para tetatsakuiltis. Yejua kitekitilijtok Dios para kitatsakuiltis* akin kichiua tein amo kuali.
5 Yejua ika, moneki xitatakamatikan, uan amo sayoj para maj amo namechtatsakuiltikan, ta no para maj amo teyi namechyolkuejmolo.
6 Yejua ika namejuan no nankiixtauaj impuesto, porin tekiuanij kichiujtokej tekit tein Dios kinmaka uan nochipa tapaleuijtokej.
7 Xikmakakan sejse tein kinamiki nankimakaskej: akin tajtani impuesto, xikmakakan impuesto; akin tajtani xiktaxtauikan, xiktaxtauikan; akin tajtani xiktakamatikan, xiktakamatikan; akin tajtani xiktakachiuakan, xiktakachiuakan.*
8 Amo akin xiktauikilikan nion teyi, ta sayoj moneki ximotasojtakan se iuan okse; porin akin kitasojta iikniuj kichiujtok tein kijtoua tanauatil.
9 Porin nejin tanauatilmej: “Amo xiauilnemi, amo xitemikti, amo xitachteki, amo xiktelixnejneki tein teaxka”* uan okseki tanauatilmej tein onkas, tein melauj mochiuaj sayoj se tanauatil, uan yejua nejin: “Xiktasojta moknitsin kemej tejua timotasojta”.
10 Akin tetasojta amo kichiuilia iikniuj tein amo kuali. Akin kitasojta iikniuj kichiujtok tein kijtoua tanauatil.
11 No xikchiuakan nejin porin nankimatij itech toni tonalmej tinentokej. Nankimatij ke moneki nanijsaskejya.* Keman tipeujkej titaneltokaj tikmatiaj ke amo uejkaua Dios techmakixtiskia. Sayoj ke axkan okachi amo uejkauaok.
12 Tel youakya; uan amo uejkaua tanesitiya. Yejua ika, maj amo tikchiuakanok tein mochiua kampa tayouayan uan maj tikuikan tein mokui tonayan, nochi nejin yejua tein ika se tateuia tein Dios techmaka.
13 Maj tichipaujkanemikan* kemej yeskia tonayan; maj amo titeleliuistikan itech iluimej nion maj titauanakan, maj amo tiauilnemikan, maj amo tikchiuakan kemej akin kichiuaj tein tetajyaltia uan amo ixpinauaj,* nion maj timoteuikan nion maj timonenexikoluikan.
14 Okachi kuali, senkis xikchiuakan kemej kichiuak toTekotsin Jesucristo uan amo xiknenemilijtokan keniuj nankichiuaskej tein kinejneki namonakayo.
Tajtolmelaualismej
^ Oso “maj kipiakan tataman tanauatil”.
^ Oso “kinextilis iueyi kualanyo”.
^ Oso “xikpoujkaitakan”.
^ Oso “amo xixijxikuin”.
^ Oso “nantachiaskejya”, “nanixpetaniskejya”.
^ Itech griego, “Maj tinentinemikan”.
^ Tajtol griego, asélgueia. Xikonita akin kichiuaj tein tetajyaltia.
