JSÚS kiuikayaya eyi xiuit uan tajko ika itamachtilis, uan kimatia ke amo uejkaua tamiskia inemilis nikan taltikpak. Judíos tayekananij itech taneltokalis kitemouayaj keniuj kimiktiskej, sayoj ke kinmouiliayaj taltikpakneminij maj momakepanij porin kiitayaj Jesús kemej se tanauatijkej. Ompa, Satanás kichiuak maj Judas kinekini kinamakas itamachtijkauj. Nejin katka semej 12 tatitanilmej. Tayekananij itech taneltokalis kimakakej 30 platajtomin.

Yaluatika youal keman Jesús kimiktiskiaj, monechikoj imiuan itatitaniluan uan kichiujkej Pascua. Satepan ke kiiluij Judas maj kisani, Cristo kipeualtij se yankuik talnamikilis tein motokaytia iTakualis toTekotsin. Kikuik sen takoton pan, kichiuak se netataujtil uan kinpanoltilij 11 itatitaniluan. Ompa kinmelauilij: “Nejin kijtosneki nonakayo tein namoka niktemakati. Xiksentokakan xikchiujtokan nejin uan ika xi­nechelnamikikan”. Satepan kipanoltij se copa ika vino uan kijtoj: “Nejin copa kijtosneki yankuik netenkaualis ika noesyo, tein namoka mimilauiti” (Lucas 22:​19, 20, NM  ).

Nejon youak, Jesús kinmachtij miak taman itatitaniluan. Kinmakak se yankuik tanauatil tein kiniluiaya maj motasojtakan ika nochi imin yolo, uan kijtoj: “Komo namejuan nanmoyoltasojtatinemij, nochi in taltikpakuanij kajsikamatiskej ke melauj nannomomachtijkauan” (Juan 13:​34, 35). Kiniluij maj amo moyolkokouanij ika tein mochiuaskia amo uejkaua, uan satepan ika nochi iyolo kitataujtij Dios maj kinpaleuiani yejuan. Ompa, ika nekuikatilmej kiueyichiujkej Dios uan yajkej itech xochital Getsemaní.

Ompa Jesús motankuaketsak uan kitataujtij Jiova ika nochi iyolo. Sayoj ke ajsikej soldados, tiopixkamej uan oksekinok tein kikitskitoj Jesús. Judas motokij kampa Jesús uan kikanpitsoj, uan ika nejon kinmatiltij takamej katiyejua katka Jesús. Yejuan kikitskijkej Cristo uan itatitaniluan cholojkej.

Jesús kijtoj imin ixpan okachi uejueyi tamelauanij judíos ke katka iKonetsin Dios. Yejuan kijtojkej ke nejon katka se ueyi tauij­uikaltilis oso tajtakol uan kinamikia maj kimiktikan. Ompa kiuikakej iixpan tekiuaj romano Poncio Pilato. Maski yejua kiitak ke Jesús amo teyi kichiujtoya tein amo kuali, kichiuak imin tanejnekilis taltikpakneminij tein tajtaniaj maj kimiktikan Jesús.

Jesús kiuikakej kampa motatokaytia Gólgota, uan ompa soldados romanos kipilojkej itech se kuouit. Maski kualtsin tonatoya, sepasaj senkis tatayouayantiak. Nejon tiotak keman Jesús momikilij, chikauak talolinik. Inakayo Jesús kipachojkej itech se tekoyok tein kichijchiujkaj tekesko, uan mostika tiopixkamej kitalilijkej se ueyi tet uan tanauatijkej maj tajpianij. ¿Ompa mokauaskia Jesús? Amo, ta ika ichikaualis Dios yaya mochiuati se taman tein okachi ueyi.

​(Motaksaltia itech Mateo capítulos 26 uan 27, Marcos capítulos 14 uan 15, Lucas capítulos 22 uan 23 uan Juan capítulos 12 a 19.)