Akin amo moueyineki kinpoujkaita oksekin. Amo moueyimati uan amo no kichia maj kiitakan ke okachi ueyichiujkej, ta ininka motekipachoua oksekin uan kineki kichiuas tein kuali kemej yejuan.

Sekin kinemiliaj ke akin amo moueyineki amo yolchikauak. Sayoj ke, tein melauj, akin amo moueyineki kipaleuia maj kijto keman mopoloua uan kimati ke amo nochi ueli kichiua.

• Kipaleuis mokoneuj maj mouika iniuan oksekin. Itech se amatajkuilol moijtoua ke akin amo moueyinekij okachi amo ouij kinkisa kinnojnotsaskej oksekin uan iniuan mouikaskej (La epidemia del narcisismo).

• Kipaleuis mokoneuj keman ueyias. Komo mokoneuj amo moueyineki axkan, okachi amo ouij kikisas kiajsis tekit keman ueyias. Tapajtijkej Leonard Sax kijtoj ke komo se telpoch moueyineki uan kinemilia ke okachi ueli ke oksekin, xa amo kuali kiitaskej keman tajtanis tekit. Sayoj ke no kijtoj ke komo telpoch kuali kikaki tein kiluiaj keman tajtani tekit, xa okachi uelis kitakeuaskej. *

Xikonpaleui maj amo moueyimatikan.

BIBLIA KIJTOUA: “Takan se aksa kiyolmachilia ke semi ueyi chiuke maski amo melau teyi chiuke, ijkuakon yejua san moyolkajkayautok” (Gálatas 6:3).

• Xikonilui ke kemansa amo mochiua tein se kineki. Sekin kiniluiaj ininkoneuan: “Mochiuas nochi tein tiknekis, oso uelis tikchiuas nochi tein tikixtalis”. Maski nejon uelis kinyolchikauas, miakpa amo mochiua kemej kinemiliaj. Sayoj ke, mokoneuan xa okachi yolpakiskej komo kiixtaliaj kichiuaskej tein kemaj ueliskej uan mochikauaj kichiuaskej.

• Xikonilui keman kuali kichiuaj teisa. Mokoneuj peuas moueyinekis komo tikoniluia ke yejua okachi kuali kichiua teisa ke oksekin. Yejua ika, sayoj xikonilui tein kuali kichiuak.

• Xikonita maj amo kitelkuikan redes sociales. Miakej nochipa kikuij redes sociales uan ompa kinextiaj tein ueli kichiuaj oso tein kichiuanij. Nejon kichiua maj se moueyineki.

• Xikinilui maj niman tajtanikan maj kintapojpoluikan. Keman mokoneuj kichiuas se taman tein amo kuali, xikonnextili maj kijto ke mopoloj.

 Xikonnextili maj motasojkamatikan.

BIBLIA KIJTOUA: “Xiktasojkamachilijtiyakan Totajtsin Dios” (Colosenses 3:15).

• Tein Dios kichijchiuak. Konemej moneki kipatiuitaskej nochi tein onkak porin techpaleuia maj tiyoltokan, kemej ejekat, at uan takual. Ijkon, tikonnextilis maj kiyekpiakan uan maj kitasojkamatikan kualtsitsin taman tein Dios kichijchiuak.

• Maj kinpoujkaitakan oksekin. Xikonnextili mokoneuj maj amo kinnexikolui oksekin porin okachi kuali kichiuaj teisa, ta xikonnextili maj kiita keniuj uelis kichiuas kemej yejuan.

• Xikonmachti maj kinextikan ke motasojkamatij. Xikonmachti mokoneuan maj amo sayoj kijtokan ke motasojkamatij, ta no maj kinextikan. Nejon kinpaleuis maj amo moueyinekikan.

Xikonnextili ke motelneki maj kinpaleuikan oksekin.

BIBLIA KIJTOUA: “Xinentinemikan ika ne yolyemanalis. Uan [...] xikpouakan in oksekin tokniuan taneltokani ke yejuan kachi ueyi chiuanime uan [...] amo xiktemojtinemikan de keniu nanmopaleuijtinemiske namejuan san. Ta, kachi ok xiktemojtinemikan de keniu xikinpaleuijtiyakan oksekin” (Filipenses 2:3, 4).

• Xikonilui mokoneuan maj tapaleuikan kalijtik. Komo amo tikoniluia mokoneuj maj tapaleui kalijtik, kinemilis ke okachi tayekantok tein yejua kineki kichiuas. Xikonnextili ke yekinika moneki tapaleuis kalijtik uan satepan uelis mauiltis. No xikonnextili ke tein kichiuas semi kinpaleuis oksekin uan ke yejuan kitasojkamatiskej uan kuali kiitaskej.

• Xikonilui ke semi kuali maj kinpaleuikan oksekin. Komo mokoneuj kinpaleuia oksekin, kuali taixejekos keman ueyias. Yejua ika, xikonnextili akoni ueliskia kipaleuis uan keniuj uelis kichiuas. Keman kichiuas, xikonilui ke kuali tein kichiuak uan xikonyolchikaua.