Sayoj ke akin semi kikuij celular uelis kinpanos nejin:

• Kinouijmaka taleroskej kemej amo teyi kinkuejmolos.

• Kinouijmaka kichiuaskej sayoj se taman.

• Niman tasematij keman yetokej ininselti.

SE TALEROS

Sekin ijsiujka talerouaj uan amo tanemiliaj itech tein kilerojtokej.

Keman ijsiujka se taleroua niman se kiajsi tein se kineki se kimatis. Sayoj ke amo tapaleuia keman moneki tikajsikamatiskej teisa tein ouij.

XIKONNEMILI NEJIN: ¿Ouij mitsonkisa tikonleros teisa tein miak? ¿Keyej komo tionmochikaua mitsonpaleuis kuali xionmomachti? (PROVERBIOS 18:15).

MAJ AMO TEYI MITSONTAPOLOLTI

Miakej kinemilia ke uelis kichiuaskej ome taman: momachtijtoskej uan kintajkuilouiliskej akin kuali iniuan mouikaj itech inincelular. Sayoj ke amo kuali techkisas tein tikchiujtoskej komo amo titanemiliaj itech sayoj se taman.

Maski semi ouij maj amo teyi mitsontapololti uan xikonchiua sayoj se taman, amo nenkaj komo tionmochikaua. Se ichpoch akin monotsa Grace kijtoua: “Amo semi tionmopoloua nion tionmosioujtia. Nikitani ke semi kuali maj se kichiua sayoj se taman uan amo sepasaj miak taman”.

XIKONNEMILI NEJIN: Keman tikonchiujtok miak taman, ¿ouij mitsonkisa tikonelnamikis tein tionmomachtijtok? (PROVERBIOS 17:24).

KEMAN MOSELTI TIONYETOS

Sekin amo kiuelitaj ininselti yetoskej uan amo teyi kichiujtoskej. Yejua ika kikuij inincelular para kuali momachiliskej. Se siuat akin monotsa Olivia kijtoua: “Amo ueli nietok 15 minutos komo amo nikita nocelular, notablet oso nikxotaltia televisión. Porin nitasemati”.

Sayoj ke tinochin, tiyeski titelpochmej oso tiuejueykej, kemansa moneki tiyetoskej toselti para titanemiliskej itech tein timomachtijtokej. Nejin semi moneki para kuali timomachtiskej.

XIKONNEMILI NEJIN: ¿Tiontanemilia itech tein tionmomachtij keman tionyetok moselti? (1 TIMOTEO 4:15).

XIKONNEMILI KENIUJ TIKONKUI MOCELULAR

¿Keniuj mocelular uelis mitsonpaleuis kuali xionmomachti? ¿Keniuj mocelular uelis mitsontapololtis keman tionmomachtijtok?