Seth * kijtoua: “Nonamik uan nejua tiksenpolojkej totekiuj. Ome xiuit tiixpanokej ika tomin tein techmakayaj tochankauan uan ika tekit tein kemansa tikajsiaj. Nejon kichiuak maj nonamik Priscilla moteltayokolti uan nejua nikmachiliaya ke amo nikualtiaya.

”¿Keniuj uelik tikixnamikkej nejon ouijkayot? Priscilla nochipa kielnamikia tein Jesús kijtoj itech Mateo 6:34, kampa kijtoua maj amo timotekipachokan ika tein panos mostika porin itech sejse tonal onkak tein techtekipachoua. Uan no, netataujtilmej tein kichiuaya ika nochi iyolo kimakayaj chikaualis tein kipaleuiaya maj kisentoka taxiko. Nejua nechyolseuij Salmo 55:22. Ijkon kemej kichiuak akin kijkuiloj Salmo, nikauilij Jiova notamamal uan nikmachilij inepaleuil. Maski axkan oksepa nikpia tekit, tinemij ika amo miak taman, porin tiktakamatij tein Jesús tayolmajxitij itech Mateo 6:20-22. Uan okachi kuali timouikaj kemej kalyetouanij uan no iuan Dios”.

Jonathan kijtoua: “Keman tanamakaloyan tein tikpiayaj kemej kalyetouanij poliuik, semi nimouik. Kemej tatasojtik, 20 xiujmej tein chikauak titekitikaj niman poliuik. Nonamik uan nejua peuak timotajtolteuiaj porin tomin amo techajsiaok. Nion uelia tikuiaj tarjeta de crédito porin timouiaj maj amo kipiaok tomin.

”Sayoj ke ika inepaleuil Biblia uan iespíritu Dios, uelik kuali titaixejekojkej. Peuak nikchiua tein yeski tekit maski amo ueyi uan tikixtalijkej amo tikouaskej tein amo monekia. Kemej tiitaixpantijkauan Jiova, tokniuan no techpaleuijkej ika miak taman. Uan techyolchikaujkej keman tikpanotoyaj nejon ouijkayot”.

Raquel kijtoua: “Keman nonamik nechkauak, semi nikualanik uan nimoyolkokoj. Peuak semi nimotayokoltia, sayoj ke nimotokij iuan Dios uan nechyolseuij. Mojmostaj niktataujtiaya uan yolseuilis tein kitemaka kipaleuij noyolo. Kemej yeskia yejuatsin kipajtij.

”ITajtol Dios, Biblia, nechpaleuij maj amo niyolkualantook. Yekmelauj ajsik itech noyolo tein kijtoj Pablo itech Romanos 12:21: ‘Amo ximokaua maj mitsxijxiko tein amo kuali, ta xiksentoka xikchiua tein kuali uan ijkon tikxijxikos tein amo kuali’.

”Se akin kuali iuan nimouika nechpaleuij maj nikita ke monekia nikelkauas nejon. Nechnextilij Eclesiastés 3:6 uan ika netasojtalis nechiluij ke kemansa moneki se kiajsikamatis ke teisa tamik. Nechouijmakak nikselis tayolmajxitilis, sayoj ke yekmelauj nechpaleuij. Axkan nikixtalijtok nikchiuas yankuik taman itech nonemilis”.

Elizabeth kijtoua: “Keman monemilis kemej namikuanij tami, moneki maj mitspaleuikan. Se siuat akin kuali iuan nimouika mojmostaj nechpaleuij. Nouan chokak, nechyolseuij uan kichiuak maj nikmachili ke nechtasojtayaj uan amo nechixtopeuayaj. Senkis nikmati ke itechkopa Jiova nechyolseuij”.

Luis, akin ika titajtojkej itech yekinika tamachtilis, kipia se ueyi kokolis itech iyolo tein ojpa ika momikilijtoyaya. Mojmostaj dieciséis horas moneki maj kipia oxígeno. Yejua kijtoua: “Nochipa nimotataujtia uan satepan ke nikchiua, nikmachilia ke Jiova nechchikaua ika iespíritu. Nimotataujtis nechpaleuia maj nitaxiko porin nitakuaujtamati iuan Dios uan senkis nikmati ke noka motekipachoua”.

Petra, akin kipia panoua 80 xiujmej, kijtoua: “Nikneki nikchiuas miak taman..., sayoj ke amo niueli. Semi ouij nikitas keniuj tantiuj nochikaualis. Nitelsioui uan nochipa moneki nitayitos pajti. Miakpa nitanemilia itech tein Jesús kiluij iTajtsin: ‘Komo ijkon mopakilis, xinechonajchiuili nijin tajyouilis’. Sayoj ke Jiova amo kichiuak, ta okachi kuali kimakak chikaualis. Uan no ijkon kichiua nouan. Nimotataujtis mojmostaj kemej yeskia se pajti tein nechpaleuia, okachi kuali nimomachilia satepan ke nitajtoua iuan Dios” (Mateo 26:39).

 Julián, akin kiuika kemej treinta xiujmej kijyouijtok se ueyi kokolis tein moixmati kemej esclerosis múltiple, no ijkon tanemilia. Yejua kijtoua: “Nikpatani silla tein nikuia itech se ueyi kaltekitiloyan ika se silla de ruedas, sayoj ke axkan okachi kuali ninemi porin nikinpaleuia oksekin. Se kinpaleuis oksekin techyolseuia keman titajyouijtokej uan Jiova techyolchikaua ijkon kemej motenkaua kichiuas. Ijkon kemej Pablo, ueli nikijtoua ke ‘itech nochi taman nikpia chikaualis itechkopa akin nechmaka chikaualis’” (Filipenses 4:13, TNM).

Antonio kijtoua: “Keman nopopaj momikilij ijkuak kikuitikisak se carro, amo uelia nikneltokaya. Yejua amo kinamikia nejon, ta sayoj nejnentoya ompakauin. Sayoj ke amo teyi uelik nikchiuak. Achto ke momikiliskia, makuil tonal amo talnamikik. Keman niyetoya iuan nomomaj, nimochikauaya amo nichokas, sayoj ke noselti senkis nichokaya. Miakpa nimotajtaniaya: ‘¿Keyej? ¿Keyej?’.

”Keman nikpanotoya nejon ouijkayot, nochipa niktataujtij Jiova maj nechyolseuiani. Uan yolik niyolseujtiyajki. Nikelnamikik ke Biblia kimelaua ke ‘tonal uan tachiualis tein amo momattok’ kipanoua akin yeski. Uan kemej Dios amo tekajkayaua senkis nikneltoka ke oksepa nikitas nopopaj keman Dios oksepa kimakas nemilis” (Eclesiastés 9:11; Juan 11:25; Tito 1:2).

Robert, akin ika titajtojkej itech yekinika tamachtilis, no ijkon tanemilia: “Keman nonamik Maribel uan nejua timotataujtiayaj iuan Jiova, tiyolseuiaj ijkon kemej kijtoua Filipenses 4:6, 7. Nejon yolseuilis techpaleuij maj uelini tikiniluikan akin kitematiltiaj miak taman itech tepos ke tikneltokaj ke akin momikilijkejya oksepa nemiskej. Maski tikpolojkej tokonetsin keman mochiuak tein amo kuali ika avión, tikelnamikij miak taman tein tiksenchiujkej tein semi techyolpaktij. Uan okachi titanemiliaj itech nejon.

”Keman sekin akin no itaixpantijkauan Jiova techiluijkej ke techitakej itech televisión keniuj ika yolseuilis tikteixmatiltijtoyaj tein tikneltokaj, tikiniluijkej ke techpaleuijkej nochi netataujtilmej tein toka kichiujtoyaj. Yekmelauj nikneltoka ke Jiova techyolseuijtoya ika nochi tajtolmej tein techtitanilijkej itech tepos”.

Nochi tein kipanokej akin ininka titajtojkej kinextia ke Dios ueli kinyolseuia akin kiixnamikij tein yeski kuejmol oso ouijkayot. ¿No mitsonyolseuis tejuatsin? Kemaj. Maski tein yeski ouijkayot tikonpanotos, no uelis mitsonpaleuis xiontaxiko. * Yejua ika, xikontemo Jiova, “Dios akin iaxka nochi taman yolseuilis” (2 Corintios 1:3, TNM).