¿NO MOCHIUAK se tetsauit kampa tionnemi? Komo ijkon, xa no tiontayokoyak, tionmotekipachoj, amo tikonmatia tein tikonchiuas uan xa hasta tikonkochitaya tein amo kuali. Miakej semi tayokoyaj uan kinekij mosenkauaskej.

Komo tikonpoloj nochi tein tikonpiaya, xa tikonmachilia ke amo tiontaxikouaok. Xa hasta tikonnemilijtok ke amo uelisok tionyolpakis. Sayoj ke, Biblia kimelaua ke kemaj uelisok tiyolpakiskej uan ke uelis tikchiaskej maj mochiua tein kuali satepan.

Eclesiastés 7:8 kijtoua ke okachi kuali keman tami teisa ke keman peua. Komo se tetsauit tauejueloj kampa tionnemi uan moneki tiontayektalis, xa tikonnemilis ke nenkaj yeski. Sayoj ke, komo amo tionyolijsiui uan tionmochikaua, okachi kuali tionyetos.

Biblia kijtoua ke ejkos tonal keman “amo mokakisok [...] chokalis nion tayokol” (Isaías 65:19). Nejon mochiuas keman iTekiuajyo Dios kichiuas maj nikan taltikpak takualtsinkan yeski (Salmo 37:11, 29). Ijkuak, amo keman mochiuaskejok tetsaujmej. Uan no, amo keman titayokoyaskejok nion tikelnamikiskejok tajyouilis. Dios, akin kipia nochi chikaualis, motenkaua: “Tein achto panok amo moelnamikisok, nion yetosok itech nanmoyolo” (Isaías 65:17).

Xikonnemili nejin: toTachijchiujkauj kichiuak nochi tein techpaleuis maj satepan kuali tinemikan porin kineki maj tikpiakan yolseuilis keman yejuatsin taixyekanas (Jeremías 29:11). ¿Melauj ke nejin mitsonpaleuia amo xionmosenkaua? Sally, akin achto ika titajtojkej, kijtoua: “Komo tikonnemilia ke kualtsin tinemiskej keman taixyekanas iTekiuajyo Dios, mitsonpaleuis xikonelkaua tein tikonpanok uan xiontaxiko”.

¿Toni no kichiuas iTekiuajyo Dios? Keman tikonmatis, tikonitas ke amo uejkaua amo mochiuaskejok tetsaujmej uan ke uelisok tionyolpakis maski tiontajyouiani. Hasta maj ejko nejon tonal, tein Biblia tayolmajxitia mitsonpaleuis xiontaxiko.