No ijkon, amo uejkaua tikpanoskej se ueyi tetsauit uan Jesús kijtoj ke yeskia se “ueyi tajyouilis” (Mateo 24:21). Maski panos nejon, uelis tiktemoskej timopaleuiskej. ¿Keniuj?

Jesucristo kijtoj itech se tepet: “Xiksentokakan xiktemokan achto iTekiuajyo Dios uan imelaujkayo” (Mateo 6:33, TNM). ¿Toni kijtosneki nejon?

Maj tiksentokakan tiktemokan achto iTekiuajyo Dios. Nejon kijtosneki ke moneki tiktayekanaltiskej iTekiuajyo Dios uan amo okseki taman (Mateo 6:25, 32, 33, TNM). ¿Keyej moneki ijkon tikchiuaskej? Porin tejuan amo ueli tikyektaliaj kuejmolmej tein onkak nikan taltikpak. Sayoj Dios ueli kichiua.

Maj tiksentokakan tiktemokan imelaujkayo Dios. Nejon kijtosneki ke moneki timochikauaskej tiktakamatiskej itanauatiluan Dios. ¿Keyej? Porin komo toselti tikixtaliaj toni kuali uan toni amo kuali, titajyouiskej (Proverbios 16:25). Sayoj ke, komo tiktakamatij Jiova, tikyolpaktiskej uan kuali tinemiskej (Isaías 48:17, 18).

¿Keyej Jesús kijtoj ke moneki tiktayekanaltiskej iTekiuajyo Dios uan imelaujkayo? Porin kijtoj ke sekin kichiuaskiaj okseki taman uan kinemiliskiaj ke kuali nemiskiaj komo kitaniskiaj miak tomin. No kijtoj ke oksekin semi kitemoskiaj tein ika moixpanoltiskej uan amo kitemoskiajok iTekiuajyo Dios porin  amo kipiaskiajok tiempo (Mateo 6:19-21, 25-32).

Sayoj ke, Jesús kijtoj ke akin kipaleuiskej iTekiuajyo Dios kipiaskej tein ika moixpanoltiskej axkan, uan satepan kiseliskej miak tatiochiualismej (Mateo 6:33, TNM).

Maski yekinika itatojtokakauan Jesús kitayekanaltijkej iTekiuajyo Dios uan imelaujkayo, amo kiitakej maj tamini tajyouilis. Sayoj ke, kemaj kitemojkej mopaleuiskej. ¿Keniuj?

Yejuan kitakamatkej itanauatiluan Dios uan nejon kinpaleuij maj amo kipianij kuejmolmej tein kipiayaj akin amo kitakamatiaj yejuatsin. Yejuan taxikojkej keman kipanokej ouijkayomej porin semi takuaujtamatkej ke iTekiuajyo Dios taixyekanas satepan. Uan Dios kinpaleuij maj taxikouanij porin kinmakak “ne chikaukauelilis” (2 Corintios 4:7-9).

Yekinika itatojtokakauan Jesús kitakamatkej uan kitemojkej iTekiuajyo Dios. Kiteixmatiltijkej kampa nemiaj tein kichiuaskia nejon Tekiuajyot (Colosenses 1:23). ¿Akonimej no ijkon kichiuaj axkan?

Itaixpantijkauan Jiova kimatij ke amo uejkaua iTekiuajyo Dios kiixpolos nochi tein amo kuali. Yejua ika mochikauaj kitakamatiskej tein Jesús kiniluij. Yejua kijtoj: “Motetapouis tein kuali tein kichiuas iTekiuajyo Dios uan ijkon nochin kikakiskej, uan ompa ejkos tamilis” (Mateo 24:14, TNM).

¿Toni tikonchiuas keman ika mitsonnojnotsaskej iTekiuajyo Dios? Timitsonyoleuaj xikonchiua kemej sekin akin nenkej ne uejkauj itech xolal Berea, tein moajsi Macedonia. Keman Pablo, se itatojtokakauj Jesús, kinixmatiltij tein kichiuaskia iTekiuajyo Dios, yejuan “kiyekneltokakke ika nochi nintanejnekilis den Tajtoltsin de Dios”, momachtijkej ika nejmachkayot porin kinekiaj kimatiskej ox katka melauak tein kiniluijka uan kitakamatkej tein momachtijkej (Hechos 17:11, 12).

Tejuatsin no uelis ijkon tikonchiuas. Komo tikontayekanaltia iTekiuajyo Dios uan imelaujkayo, semi mitsonpaleuis axkan, uan satepan kualtsin tionnemis nochipaya.