Biblia uelis kuali techixyekanas
Komo tikixtaliaj tein kuali yetok sayoj ika tein tiknemiliaj oso ika tein oksekin kinemiliaj, amo uelis tikmatiskej ox tein tikixtaliskej tikchiuaskej yekmelauj techpaleuis. Biblia techiluia keyej panoua nejon, uan no techpaleuia maj tikmatikan toni kuali yetok uan toni amo uan ijkon maj tiyolpakikan.
MONEKI MAJ DIOS TECHIXYEKANA
Jehová a Dios techiluia itech Biblia ke moneki techpaleuis, porin amo techchijchiuak kemej toselti uelis timoixyekanaskej (Jeremías 10:23). Yejua ika itech Biblia techiluia tein techpaleuis maj kuali tikixtalikan tein tikchiuaskej. Dios semi techtasojta uan amo kineki maj timopolokan keman tikixtaliskej tikchiuaskej teisa porin nejon kichiua maj titajyouikan uan maj amo tiyolpakikan (Deuteronomio 5:29; 1 Juan 4:8). Yejuatsin techchijchiuak, semi tamatkej uan kuali techixmati, yejua ika tein techyolmajxitia yekmelauj uelis techpaleuis (Salmo 100:3; 104:24). Sayoj ke Dios amo techchikaujkauia para maj tikchiuakan tein tanauatia.
Jehová kinmakak Adán uan Eva, yekinika takat uan yekinika siuat, nochi tein monekia para maj yolpakikan (Génesis 1:28, 29; 2:8, 15). No kinnauatij seki taman tein amo ouij tein monekia kitakamatiskej. Sayoj ke kinkauak maj yejuan kiixpejpenanij ox kitakamatiskiaj oso amo (Génesis 2:9, 16, 17). Sayoj ke Adán uan Eva kiixtalijkej amo kitakamatiskej Jehová uan kichiujkej tein yejuan kinekkej (Génesis 3:6). ¿Uan toni panouani porin tejuan tikixtalianij tikchiuaskej tein tiknemiliaj ke kuali yetok? ¿Nochi kuali kisani? Amo. Ijkon kemej panouanij xiujmej tikitanij ke se kitapanauilis itanauatiluan Dios amo kichiuani maj tiyolseujkanemikan nion maj tiyolpakikan (Eclesiastés 8:9).
Maski seseko tikayomej, Biblia kuali techyolmajxitia para maj tikixtalikan tikchiuaskej tein kuali yetok (2 Timoteo 3:16, 17; xikonita recuadro “ Se amatajkuilol tein nochin uelis kinpaleuis”). Maj tikitakan keniuj Dios techixyekana ika tein kijtoua Biblia.
Xikonita keyej uelis tikneltokaskej ke Biblia yejua iTajtol Dios (1 Tesalonicenses 2:13). Itech jw.org xikonita video ¿Akoni itanemililuan tein ijkuiliujtok itech Biblia?
DIOS TECHIXYEKANA IKA TEIN KIJTOUA BIBLIA
Itech Biblia tikitaj keniuj Dios mouikani iniuan akin neminij itech taltikpak. Keman timomachtiaj Biblia tikmatij toni kijtoua Dios ke kuali yetok uan toni amo, oso tein yejuatsin kiita ke techpaleuis oso techijtakos (Salmo 19:7, 11). Uan ijkon tein ompa timomachtiskej nochipa techpaleuis uan ika uelis timoixyekanaskej mojmostaj.
Kemej tein techyolmajxitia Proverbios 13:20 kampa kijtoua: “Akin nentinemi iniuan akin tamatinij mochiuas tamatkej, sayoj ke akin mouika iniuan akin amo tamatij kipias ouijkayot”. Nejin tayolmajxitilis kisentoka techpaleuia axkan ijkon kemej tapaleuij ne uejkauj. Uan itech Biblia tikajsij okseki tayolmajxitilis tein no semi techpaleuiaj (xikonita recuadro “ Tein Biblia tayolmajxitia nochipa tapaleuia”).
Xa tionmotajtania: “¿Keniuj uelis nikmatis ox yekmelauj tapaleuia axkan tein Biblia tayolmajxitia?”. Itech okse tamachtilis tikitaskej tein sekin kinpanok.
a Jehová yejua itokay Dios (Salmo 83:18).
