Biblia ininka tajtoua miakej takamej uan siuamej, akin tataman kemej momachiliayaj. Komo timomachtiaj tein kinpanok, xa tikajsiskej aksa akin momachiliaya kemej tejuan.

Tinochin tiknekij maj oksekin kimatikan keniuj timomachiliaj, uan okachiok keman tikpiaj se kokolis itech totanemilil, xa keman tikleroskej tein sekin kipanokej tikitaskej ke yejuan momachiliayaj kemej tejuan. Nejin techpaleuis maj tikitakan ke amo sayoj tejuan ijkon timomachiliaj, keman semi timotekipachouaj uan tiknemiliaj ke amo teyi tichiuanimej.

• Biblia ininka tajtoua seki takamej, akin kimachiliayaj ke amo ueliajok ika tein kipanouayaj. Xa kemansa tikonijtouani: “Amo nitaxikouaok, nikuelitaskia maj amo kisentokaok nejin kuejmol”. Ijkon momachilijkej Moisés, Elías uan David (Números 11:14; 1 Reyes 19:4; Salmo 55:4).

• Biblia ika tajtoua Ana, se siuat akin semi tayokoxtoya porin amo uelia kinpiaya konemej, uan no, se siuat akin kitauelitaya semi kikejkelouaya (1 Samuel 1:6, 10).

• Biblia no ika tajtoua Job uan xa no tionmomachilis kemej yejua. Maski semi takuaujtamatia iuan Dios, yejua amo kuali momachiliaya uan kijtoj: “Niktauelita nonemilis uan amo nikneki niksentokas ninemisok” (Job 7:16).

Sayoj ke yejuan uelik kuali momachilijkej. Tejuan no uelis kuali timomachiliskej komo tikchiuaj kemej yejuan.