1, 2. ¿Keniuj kinextij Pablo ke kitasojkamatia maj Dios kinextiliani ueyi teiknelilis?

KEMEJ tatitanil Pablo kinteltajyouiltijka itatojtokakauan Cristo, kuali kimatia ke amo kinamikia maj Dios kiikneliani. Yejua ika kijtoj ika nochi iyolo ke “ueyi teiknelilis de Dios amo nenkajtik” (xikonixtajtolti 1 Corintios 15:9, 10).

² Keman yaya momikilitiya, Pablo kijkuilouilij Timoteo: “Nikueyitasojkamachilia Totekotsin Jesucristo porin Yejuatsin nechmakak in chikaualis para notekiu. Uan Yejuatsin yek takuautamatik nouan ke nejua niuelis nikchiuas nijin tekit” (1 Tim. 1:12-14). ¿Katiyejua katka nejon tekit? Pablo kiniluij tayekananij itech nechikol tein moajsia Éfeso: “Amo teyi nikueyipoua uan nion no niktasojta nonemilis de nejua san. Ta, para nejua kachi kuali [...] ma niktamichiuas in tekit ten nechnauatilij ya Totekotsin Jesús. Porin Yejuatsin nechnauatilij ke ma nejua nitanojnotstinemi  ika in yankuik Tajtoltsin ten kualkui ne teiknelilis de Dios” (tejuan tiktalilijkej cursivas; Hech. 20:24).

3. ¿Toni tekit kiselij Pablo? (Xikonita taixkopin ipeujyan tamachtilis.)

³ ¿Toni nejon “yankuik Tajtoltsin” kiteixmatiltij Pablo? ¿Uan keyej nejon kinextiaya iueyi teiknelilis Jiova? Pablo kiniluij itatojtokakauan Cristo akin nemiaj Éfeso: “Namejuan kuali nankimatke ya ke Totajtsin Dios ika iteiknelilis nechtekimaktilij ya ke ma nitanojnotstinemi ika in Tajtoltsin de Dios ten kualkui ne nemakixtilis. Uan ma nitekititinemi [namouan]” (Efes. 3:1, 2). Jesús kinauatijka Pablo maj kinmatilti se tanauatil akin amo katkaj judíos. Nejon tanauatil kijtouaya ke yejuan no ueliskia kinyoleuaskej maj tekiuajtikan iuan Mesías (xikonixtajtolti Efesios 3:5-8). Pablo tanojnotsak ika yolpakilis uan techkauilij se kuali neskayot. Ijkon kinextij ke ueyi teiknelilis tein Dios kinextilij “amo nenkajtik”.

4, 5. ¿Keyej ueli tikijtouaj ke kuali tanauatilmej ika iTekiuajyo Dios no yejua “yankuik Tajtoltsin ten kualkui ne teiknelilis de Dios”?

⁴ Itech nejin itamian tonalmej, Jiova technauatiani maj tikteixmatiltikan iTekiuajyo. Uan moneki tikchiuaskej nejin tekit “tech nochi senmanauak” (Mat. 24:14). Kuali tanauatilmej ika iTekiuajyo Dios no yejua “yankuik Tajtoltsin ten kualkui ne teiknelilis de Dios”. ¿Keyej tikijtouaj nejin? Porin nochi tatiochiualismej tein kiualkuis iTekiuajyo Dios mochiuas porin Jiova technextilia ueyi teiknelilis (Efes. 1:3). Pablo kinextij ke kitasojkamatia iueyi teiknelilis Dios keman nochipa tanojnotsaya ika yolpakilis. ¿Tikchiujtokej kemej yejua? (Xikonixtajtolti Romanos 1:14-16.)

⁵ Itech tamachtilis tein achto tikitakej timomachtijkej ke iueyi teiknelilis Dios uelis techpaleuis maski titajtakouanij. Uan no tikitakej ke iueyi teiknelilis techualkuilia miak tatiochiualismej. Yejua ika moneki tikinmachtiskej oksekin keniuj Jiova kinextia inetasojtalis uan keniuj yejuan uelis kinpaleuis. ¿Keniuj uelis tikinpaleuiskej oksekin maj kinextikan ke kitasojkamatij iueyi teiknelilis Dios?

6, 7. ¿Keyej tikijtouaj ke keman tikmelauaj toni tatiochiualismej kiualkui imikilis Jesús se taman kemej tikteixmatiltiaj iueyi teiknelilis Dios?

⁶ Axkan, miakej amo kinkuejmoloua inintanemilil keman tajtakouaj. Yejua ika amo kiajsikamatij keyej moneki kinpaleuis imikilis Jesús. Sayoj ke no, okachi momiakiliaj taltikpakneminij akin kiitaj ke ijkon kemej monejnemiltiaj amo kinualkuilia yolpakilis. Hasta keman tajtouaj iniuan itaixpantijkauan Jiova, sekin kiajsikamatij toni kijtosneki tajtakol, keniuj kinijtakoua uan toni moneki kichiuaskej tein kinpaleuis maj amo kinyekanaok tajtakol. Komo kipiaj kuali ininyolo, kitasojkamatij kimatiskej ke Dios kiualtitanik iKonetsin maj techijkuanili tajtakol uan mikilis. Uan no, kiajsikamatij ke Jiova kichiuak nejin porin techteltasojta uan technextilia iueyi teiknelilis (1 Juan 4:9, 10).

⁷ Maj tikitakan tein Pablo kijtoj keman ika tajtoj iKonetsin Jiova: “Ika ne imikilis de Cristo, Totajtsin Dios techtapojpoluij ya de nochi totajtakoluan”. Pablo no kijtoj ke nejin ueli mochiua porin Dios technextilia iueyi teiknelilis (Efes. 1:7). Inemilis Jesús tein kitemakak yejua tein okachi kinextia ke Dios techtasojta uan ke kitelneki  technextilis iueyi teiknelilis. Techyolseuia tikmatiskej ke komo titakuaujtamatij itech imikilis Jesús, Dios uelis techtapojpoluis totajtakoluan uan amo techkuejmolos totanemilil (Heb. 9:14). ¡Tel kuali tanauatilmej! ¿Melauj ke tiknekij tikinmatiltiskej nochin?

8. ¿Keyej taltikpakneminij moneki motokiskej iuan Dios?

⁸ Akin amo takuaujtamatij itech inemilis Jesús tein kitemakak, Dios kiita ke kiixnamikij yejuatsin. Yejua ika moneki tikinmatiltiskej ke uelis kuali mouikaskej iuan Dios. Tatitanil Juan kijkuiloj: “Nochi nekes ten takuautamatiske iuan ne Ikonetsin Dios, yejuan nojonkes kipiaske ne yek nemilis nachipa. Pero nochi ne naken amo kinekiske yek tatakamatiske iuan Ikonetsin Dios, yejuan nojonkes amo kipiaske ne yek nemilis. Ta, yejuan sayo kiseliske ne ueyi tatsakuiltilis ten Totajtsin Dios kinualtitanilis” (Juan 3:36). Techyolpaktia tikmatiskej ke inemilis Jesús tein kitemakak techpaleuia maj ueli timotokikan iuan Dios (xikonita kampa kijtoua “Tein okachi momelaua”). Pablo kimelauak ijkon: “Namejuan ne achtopa nankatkaj keme analtekokayome ten amo kixmatiaj Dios. Uan no nankixnamiktinemiaj Totajtsin Dios ika namotamachilis uan ika namoyalis, porin ijkuak nannentinemiaj tech in tajtakolnemilis. Uan Cristo kichiuak ma Dios moyoltalij namouan kuak [...] kimiktijke” (Col. 1:21, 22).

9, 10. 1) ¿Toni tekit Jesús kinmakak iikniuan taixpejpenalmej? 2) ¿Keniuj ‘okseki ichkamej’ kinpaleuiaj taixpejpenalmej?

⁹ Cristo kinnauatia taixpejpenalmej “ma [kiniluijtinemikan] in taltikpakuani ke Totajtsin Dios moyoltalij ya touan” (xikonita kampa kijtoua “Tein okachi momelaua”). Pablo kiniluij: “Axkan Totajtsin Dios amo semi techtechtia ok ne totajtakoluan porin Cristo kitamiixtauak ya. Ika ya nojon Dios techmaktilij in tekit ke ma tikintapouijtinemikan nochi in taltikpakuani ke Totajtsin Dios moyoltalij ya inuan nochi in taltikpakuani uan axkan uelis tiajsitiue iixpantsinko Yejuatsin. lka ya nojon titekitijtiuitse ika in chikaualis de tokaytsin de Cristo, porin tiitanojnotskauan de Cristo. Uan tejuan tamechtatautijtinemij keme yeskia Totajtsin Dios namechtatautijtos [...]: Xikselikan nijin tamachilis ke Totajtsin Dios moyoltalij ya namouan uan uelis ya ximotokikan iuantsin” (2 Cor. 5:18-20).

¹⁰ ‘Okseki ichkamej’ kiitaj ke se ueyi tatiochiualis kinpaleuiskej taixpejpenalmej itech nejin tekit (Juan 10:16). Cristo kintitani ‘okseki ichkamej’, uan yejuan akin okachi kinmatiltiaj taltikpakneminij tein yekmelauj tamachtia Biblia. Uan no kinpaleuiaj maj kuali mouikakan iuan Dios. Nejin se taman tein motelneki keman moteixmatiltia “yankuik Tajtoltsin ten kualkui ne teiknelilis de Dios”.

11, 12. ¿Keyej se kuali tanauatil keman taltikpakneminij kimatij ke uelis kitataujtiskej Jiova?

¹¹ Miakej kitataujtiaj Dios porin ijkon kuali momachiliaj. Sayoj ke tein melauj amo kineltokaj  maj Dios kinkaki. Moneki kimatiskej ke Jiova kemaj kikaki netataujtilmej. Itech se nekuikatil, David kiluij Jiova: “Tejua Akin tikaki netataujtil, mouan motokiskej nochi tataman taltikpakneminij. Nonepololuan nechtajyouiltiaj. Sayoj ke tejua tikixtsakua tonepololuan” (Sal. 65:2, 3).

¹² Jesús kiniluij imomachtijkauan: “Notajtsin Dios namechmaktilis nochi ten nankitajtaniliske ika in chikaualis de notokaytsin” (Juan 16:23). Ika nejin tajtolmej, Jesús kinekik kijtos ke uelis tiktajtaniskej Jiova tein yeski taman tein mouika ika itanejnekilis yejuatsin. Keman ika tajtoj Jiova, Juan kijkuiloj: “Tikpiaj ya se ueyi yoltakuautamatilis iuan Dios porin tikmatij ya ke komo tiktajtaniliaj Dios tensa ijkon keme yejua in itanejnekilis de Yejuatsin, ijkuakon Totajtsin Dios techkakilia” (1 Juan 5:14). Techyolpaktia tikinpaleuiskej taltikpakneminij maj kiajsikamatikan ke netataujtil amo sayoj se taman tein kichiua maj kuali momachilikan, ta se taman tein techpaleuia maj timotokikan “kampa Totajtsin Dios ichikaukauelilispan”, oso itrono (Heb. 4:16). Moneki tikinnextiliskej taltikpakneminij keniuj moneki motataujtiskej, akoni moneki kitataujtiskej uan toni uelis tajtaniskej. Ijkon tikinpaleuiskej maj kuali mouikakan iuan Jiova uan maj kipiakan yolseuilis keman tajyouiskej (Sal. 4:1; 145:18).

13, 14. 1) ¿Toni tatiochiualismej kiseliskej taixpejpenalmej satepan? 2) ¿Keniuj taixpejpenalmej kinpaleuiskej taltikpakneminij?

¹³ Jiova okachiok kinextis iueyi teiknelilis “tech ne tonalme ten ualaske ok”. ¿Keniuj? Yejuatsin kichiuas maj 144,000 akin taixyekanaskej iuan Cristo ompa iluikak kiselikan se ueyi tatiochiualis. ¿Katiyejua nejon tatiochiualis? Pablo kimelauak ijkon: “Dios tel ueyi techyoliknelij uan no semi techyoltasojtak. Uan maski tejuan tiyolmiktinemiaj de totalnamikilis ika totajtakoluan [...,] techsenmaktilij ya ne yankuikanemilis iuan Cristo kuak Yejuatsin kipankixtij Cristo yoltok intsalan in animajme. Ika ya nojon xikmatikan ke Totajtsin Dios namechmakixtij ya sayo ika ne iteiknelilis. [...] Uan no Totajtsin Dios techpoua ke techtalito iuan Cristo tech in lugares de eluiyaktsinko porin iuantsin tipoutinemij ya. Uan Totajtsin Dios kichiuak nochi nijin por tejuan para ijkon tech ne tonalme ten ualaske ok, ma tiktenextilijtinemikan de keniu Yejuatsin techueyitasojtak. Uan ma titenextijtinemiske de keniu Yejuatsin techyoliknelij porin tipoutinemij iuan Cristo” (Efes. 2:4-7).

¹⁴ Amo ueli tiknemiliaj nochi tein kuali tein Jiova kinmakas taixpejpenalmej keman taixyekanaskej iuan Cristo ompa iluikak (Luc. 22:28-30; Filip. 3:20, 21; 1 Juan 3:2). Jiova kinnextilis taixpejpenalmej nochi tein kuali tein kiualkui iueyi teiknelilis. Yejuan yeskij “in yankuik pueblo de Jerusalén” uan “tesiuajtanti ten monamiktiti” iuan Cristo (Apoc. 3:12; 17:14; 21:2, 9, 10). Yejuan sentekitiskej iuan Cristo “keman kinpajtiskej altepemej”. Nejin kijtosneki ke  kinpaleuiskej taltikpakneminij maj amo kipiakanok tajtakol nion maj momikilikanok (xikonixtajtolti Apocalipsis 22:1, 2, 17, TNM).

15, 16. ¿Keniuj itech yankuik taltikpak Jiova kinnextilis ‘okseki ichkamej’ ueyi teiknelilis?

¹⁵ Efesios 2:7 kijtoua ke Dios kinextis iueyi teiknelilis “tech ne tonalme ten ualaske ok”. Ijkuak, nochin akin nemiskej nikan taltikpak kiitaskej nochi tein kuali tein kiualkui iueyi teiknelilis Dios (Luc. 18:29, 30). Se taman kemej Jiova okachi kinextis iueyi teiknelilis nikan taltikpak yejua keman kinajokuis akin momikilijkejya (Job 14:13-15; Juan 5:28, 29). ¿Akonimej oksepa nemiskej? Sekin yeskij itekitikauan Dios akin amo kikaujkej akin momikilijkej achto ke Cristo momikiliskia. No moajokuiskej ‘okseki ichkamej’ akin momikiliskej itech itamian tonalmej. Nochin yejuan oksepa nemiskej uan kisentokaskej kitekitiliskej Jiova.

¹⁶ Sayoj ke Dios no kinajokuis tel miak millones taltikpakneminij akin amo keman kiixmatkej. Juan kijkuiloj: “Nikinitak ijkatokke iixpantsinko Totajtsin Dios nochi nekes ten momikilijke ya, in ueyi chiuani uan nekes ten amo chiuanime. Uan no nikitak ke Dios kinualixtapoj in librojme kampa ixnesij in tachiualisme de nochi ten momikilijke ya. Uan no nikitak ke Dios kiualixtapoj okse libro kampa ijkuiliutok in tokayme de nochi nekes ten yolchipauke sen nachipa. Uan ijkon Totajtsin Dios kinixkomakak uan kintatsakuiltij sejse nochi nekes ten momikilijke ya, ijkon keme yejuan tachiutinenke [...]. Uan Dios kinmakak nemilis oksepa nochi nekes ten momikilijke tech at. Uan Dios kinmakak nemilis oksepa nochi nekes ten momikilijke ya [...] uan kinixkomakak uan  kintatsakuiltij ijkon keme yejuan tachiutinenke” (Apoc. 20:12, 13). Akin oksepa nemiskej uelis kiixmatiskej Jiova uan kikauaskej maj yejuatsin kinixyekana. Monekis kimatiskej keniuj kitakamatiskej tanauatilmej tein moajsij itech Biblia uan yankuik tanauatilmej tein tikseliskej itech “librojme”. Nejin yankuik tanauatilmej yeskij okse taman kemej Jiova kinextis iueyi teiknelilis.

17. ¿Toni moneki tikelnamikiskej keman titanojnotsaj?

¹⁷ Amo uejkaua ixpoliuis nochi tein amo kuali. Yejua ika axkan okachi moneki maj tikteixmatiltikan kuali tanauatilmej ika iTekiuajyo Dios (Mar. 13:10). Maj nochipa tikelnamikikan ke keman titanojnotsaj tiknekij tikueyitaliskej Jiova. ¿Keniuj tikueyitaliaj? Keman tikiniluiaj taltikpakneminij ke nochi tein kuali tein tikpiaskej itech Xochital yeski porin Jiova technextilia iueyi teiknelilis.

18, 19. ¿Keniuj uelis tikueyitaliskej iueyi teiknelilis Jiova?

¹⁸ Keman titanojnotsaj, uelis tikinmelauiliskej taltikpakneminij ke keman Cristo taixyekanas nikan taltikpak, taltikpakneminij kiseliskej nochi tatiochiualismej tein kiualkui inemilis Cristo tein kitemakak uan yolik kinijkuanilijtiyaskej tajtakol. Biblia kijtoua: “Se tonal Totajtsin Dios tech yankuikatalikiu nochi tejuan tiikoneuan [...]. Ijkuakon nochi ten Dios kichijchiuak, nochi yejua Dios kiajchiuakiu de ne ijtakauilis” (Rom. 8:21). Nejin sayoj uelis mochiuas porin Jiova technextilia iueyi teiknelilis.

¹⁹ Se tel ueyi tatiochiualis tikinmatiltiskej taltikpakneminij kualtsin netenkaualis tein moajsi itech Apocalipsis 21:4, 5. Ompa kijtoua toni kichiuas Dios amo uejkaua ininka taltikpakneminij: “Totajtsin kinelkaualtis de ninchokilisuan de nochi itaneltokakauan. Uan amo aken momikilis ok; uan amo aken mochoktis ok; uan amo aken motekipachos ok; uan amo aken yoltajyouis ok. Uan ijkon yeski porin nochi tajtamik ya de ne achtopa onkaya”. Uan Jiova, akin moajsi itech itrono, kijtoua: “Xikitakan, Nejuatsin nikyankuikatalis nochi ten ongak”. Uan no kijtoua: “Xikijkuilo nochi ten nimitsilijtok porin notajtoluan nochi kuika ten melau”. Maj tikteixmatiltikan nejin kuali tanauatilmej ika yolpakilis, uan ijkon tikueyitaliskej iueyi teiknelilis Jiova.