ISRAELITAS semi kinyolpaktiaya tatsotson. Biblia miakpa ininka tajtoua sekin akin tatsotsonayaj oso akin cantarouayaj. Miak amatajkuilolmej ijkuiliujtokej kemej nekuikatilmej. Salmos, Cantar de los Cantares uan Lamentaciones moijkuilojkej para se cantaros. Se amatajkuilol tein moijkuiloj ne uejkauj kijtoua ke Biblia kinextia ke israelitas nochi kichiuayaj ika tatsotson.

Tatsotson tein mojmostaj kikakiaj. Israelitas kinextiayaj keniuj momachiliayaj keman tatsotsonayaj uan cantarouayaj (Is. 30:29). Siuamej israelitas cantarouayaj, mijtotiayaj, kitsilinijtiayaj tambortsitsin uan semi yolpakiaj keman aksa kiixtaliayaj kemej tekiuaj, no ijkon kichiuayaj keman iluichiuayaj para kiueyichiuaskej Jehová uan keman tataniaj (Juec. 11:34; 1 Sam. 18:6, 7; 1 Rey. 1:​39, 40). Keman aksa momikiliaya, israelitas tayokol cantarouayaj porin moteltayokoltiayaj (2 Crón. 35:25). Se amatajkuilol kijtoua ke “hebreos semi kiuelitayaj kikakiskej tatsotson” (Cyclopedia, de McClintock y Strong).

Tekiuanij de Israel semi kiuelitayaj tatsotson. Tekiuaj Saúl kiuikak David kampa nemia para maj kitsotsonili arpa (1 Sam. 16:18, 23). Satepan, keman David mochiuak tekiuaj kichijchiuak seki taman tein ika tatsotsonaskiaj, kijkuiloj kualtsitsin nekuikatilmej uan kinixtalij sekin para maj tatsotsonakan itech itemplo Jehová (2 Crón. 7:6; Amós 6:5). Uan tekiuaj Salomón kinixtalij takamej uan siuamej para maj cantarokan ichan (Ecl. 2:8).

Israelitas kiueyichiuayaj Jehová ika tatsotson. Itech templo ompa Jerusalén moajsiaj naui mil akin tel kuali kitsotsonayaj címbalos, arpas, trompetas uan okseki taman tein chijchiujtoya ika kouit uan kitaliliayaj cuerdas (1 Crón. 23:5; 2 Crón. 5:12). Sayoj ke yetoyaj sekin akin no kiueyichiuayaj Jehová ika tatsotson. Miakej israelitas cantarojtiayaj keman yayaj Jerusalén para iluichiuaskej. Nejin nekuikatilmej monotsayaj Canciones de las Subidas (Sal. 120-134). Seki ininamaixuan judíos kijtouaj ke israelitas cantarouayaj Hallel a keman kichiuayaj Pascua.

Itekitikauan Jehová no semi kinyolpaktia tatsotson (Sant. 5:13). Ticantarouaj para tikueyichiuaskej Jehová (Efes. 5:19). Tatsotson no techpaleuiaj maj kuali timouikakan iniuan tokniuan uan techyolchikauaj kemaj tikpanotokej ouijkayomej (Hech. 16:25; Col. 3:16). No techpaleuiaj maj tiknextikan ke semi titakuaujtamatij iuan Jehová uan ke semi tiktasojtaj.