Miakej ouij kinkisa kitasojtaskej Dios porin kinemiliaj ke amo akin ueli kimati akoni, amo toka motekipachoua oso ke hasta tetajyouiltia. Xikonita tein sekin kijtouanij:

• “Maski niktajtaniaya Dios maj nechpaleui, nikmachiliaya ke amo keman nechkakia. Niknemiliaya ke Dios amo teyi kimachiliaya.” (Marco, Italia.)

• “Niknekia niktekitilis Dios, sayoj ke nikitaya ke amo noka motekipachouaya. Nikitaya kemej se Dios tetajyouiltijkej akin sayoj kineki techtatsakuiltis. Niknemiliaya ke amo yolkuali katka.” (Rosa, Guatemala.)

• “Keman nisiuapilok katka, niknemiliaya ke Dios sayoj kitemouaya tonepololuan uan ika nejon techtatsakuiltiaya. Satepan peuak niknemilia ke amo tetasojta, kemej yeskia se tekiuaj akin kinixyekana taltikpakneminij sayoj ke amo ininka motekipachoua.” (Raimunda, Canadá.)

¿Uan tejuatsin toni tikonnemilia? ¿Amo keman uelis tiktasojtaskej Dios? Tel miak xiujmej, akin kineltokaj Cristo motajtanianij nejin. Itech xiujmej 500 hasta kemej 1500 itech totonaluan tel miakej amo motataujtiayaj iuan Dios. ¿Keyej? Porin kimouiliayaj. Momachtijkej Will Durant kijtoj ijkon: “¿Keniuj ueliskia se tajtakojkej kitataujtis se Dios akin amo tetasojta uan tamouilil?”.

¿Keyej taltikpakneminij kinemiliaj ke ijkon tamati Dios? ¿Toni yekmelauj tamachtia Biblia? ¿Okachi amo ouij techkisaskia tiktasojtaskej komo tikmatiskiaj keniuj yekmelauj tamati?