¿Tikonuelitaskia tionnemis nochipaya iniuan mochankauan kampa amo onkak kokolismej? ¿Tikonnekiskia maj se tonal tami tajyouilis, tekokojkayot uan mikilis? Nejon amo sayoj se tanejnekilis; Dios ijkon motenkaua uan kemaj mochiuas. Maj tikitakan keniuj mochiuas nejon tein motenkaua itech Apocalipsis (Revelación) 21:3-5 (xikonixtajtolti).

“Totajtsin kinelkaualtis de ninchokilisuan.” (Apocalipsis 21:4.) ¿Toni taman chokalis techelkaualtis oso kitamis Dios? Amo tein tichokaj ijkuak tiyolpakij nion kitamis toixayo tein ika moolinia toixtololo, ta tein tichokaj keman titayokoyaj. Dios amo sayoj kiajchiuas nejon chokalis, ta tekokojkayot uan tajyouilis tein techchoktia.

“Amo aken momikilis ok.” (Apocalipsis 21:4.) Tein okachi techchoktia yejua mikilis. Sayoj ke Jiova kinajchiuilis mikilis nochin akin tatakamatiskej. ¿Keniuj? Kitamis tajtakol tein techkauilij Adán porin yejua kichiua maj onka mikilis (Romanos 5:12). Jiova kikuis inemilis Jesús tein kitemakak uan ijkon kichiuas maj taltikpakneminij kiajsikan nemilis tein amo kipia tajtakol. * Ijkon, mikilis tein kemej yeskia se tel tetauelitakej, “amo teyi chikaualis kipia[s] ok” (1 Corintios 15:26). Nochin amo kipiaskej kokolis uan nemiskej nochipaya ijkon kemej Dios kineki.

“Amo aken yoltajyouis ok.” (Apocalipsis 21:4.) ¿Toni taman yoltajyouilis tamis? Yejua tein kimachiliaj keman kipiaj tekokojkayot, moyolkokouaj oso motekipachouaj tel miakej taltikpakneminij porin tajtakouanij uan kichiua maj amo kuali nemikan.

Kemaj tamis chokalis, mikilis uan tekokojkayot. Sayoj ke xa tionmotajtania: “¿Kani yeski? ¿Ne iluikak?”. Amo. Maj tikitakan keyej amo. Se taman, porin tein yejuatsin motenkaua peua ika tajtolmej, “Dios mokaltalikiu [...] [iniuan] in ipueblojkauan”, uan yejuan nemij nikan taltikpak (Apocalipsis 21:3). Uan okse taman, Dios motenkaua ke “amo aken momikilis ok”, tein kijtosneki ke yeski kampa achto onkaya mikilis sayoj ke amo onkakok. Ne iluikak amo keman onkani mikilis, sayoj ke nikan taltikpak kemaj, uan tel uejkaujya. Yejua ika moyekita ke okachi kuali nemilis tein Dios motenkaua kiualkuis mochiuas nikan taltikpak.

Jiova kineki maj titakuaujtamatikan ke mochiuas tein motenkaua. Satepan ke kijtoj tatiochiualismej tein kiualkuis, techyekiluia ijkon: “Xikitakan, Nejuatsin nikyankuikatalis nochi ten ongak”. Uan no kiyekijtoj: “Notajtoluan nochi kuika ten melau. Uan [...] uelis nantakuautamatiske” (Apocalipsis 21:5). Timitsonyoleuaj xikonita keniuj tejuatsin uan akin tikontasojta uelis nankiseliskej nejon tein Dios motenkaua kiualkuis tein semi kualtsin.