Peuak niyouj kampa nikchikauaskia nonakayo. Satepan, niktapoj se gimnasio itech xolal San Leandro (California, Estados Unidos) uan nitekitik iniuan akin tamachtiayaj keniuj se kichikauas se inakayo, semej katka akin tatanik itech netatanilis míster América. Maski ijkon, nikchiuas maj nimoita ke nitelchikauak amo nechpaleuij, ta kisentokaya nikmachiliaya ke teisa nechpolouaya.

Semej akin kuali iuan nimouikaya itech gimnasio kimatia ke nejua niknekia nikajsikamatis Biblia uan nechiluij maj nitajto iuan se akin yejua kiixmatia. Mostika kualkan, se itaixpantijkauj Jiova ajsik nochan uan naui hora kinankilijtoya nonetajtaniluan ika Biblia. Nikiluij maj mokepa nejon tiotak, uan titajtojtoyaj hasta tajkoyouan. Kemej nikteluelitaya tein nikaktoya, niktajtanij ox ueliskia iuan niyas mostika uan ijkon nikitaskia keniuj kinnojnotsaya oksekin ika Biblia. Niktelmoujkaitak keniuj nejon itaixpantijkauj Jiova kinankiliaya netajtanilmej ika Biblia. Ijkuak, nikixtalij no ijkon nikchiuas.

Niknamakak gimnasio uan nitanojnotsato iuan nejin precursor, kemej kintokaytiaj itaixpantijkauan Jiova akin itech se metsti miak horas tanojnotsaj ika Biblia. Nimoauij itech metsti mayo xiuit 1948 itech Estadio Cow Palace ompa San Francisco (California). Se xiuit satepan no nimochiuak precursor.

Ijkon kemej panouaya nejon, nikintajtanij itaixpantijkauan Jiova maj kikalpanokan nomomaj. Yejua kinselij ika miak pakilis uan amo uejkauak no moauij. Ichankauan amo kinpaktij nejon, sayoj ke nomomaj amo kikauak Dios hasta keman momikilij; nejon panok seki xiujmej achtoya. Nion se tochankaujok mochiuak itaixpantijkauj Jiova.

Itech xiuit 1950 ninemito Grand Junction (Colorado), kampa nikixmatik Billie. Yejua yolik itech xiuit 1928 uan moskaltij keman semi amo onkaya tekit kampa kitaniskej tomin. Mojmostaj youak, imomaj, Minnie, kiixtajtoltiliaya Biblia ika se tauil tein xotaya ika queroseno. Keman kipiaya naui xiuit, Billie ueliaya taixtajtoltiaya uan kimatiaya kijtos ika itajtoluan miak tanojnotsmej tein moajsij itech Biblia. Tepitsin achto ke ajsiskia xiuit 1949, imomaj peuak momachtia Biblia iniuan itaixpantijkauan Jiova uan kiajsikamatik ke miktan amo katka kampa tetajyouiltiaj, ta kijtosneki kampa moseuijtokej mikemej (Eclesiastés 9:5, 10). Minnie uan inamik mochiujkej itaixpantijkauan Jiova.

Billie yaya itech se ueyi kaltamachtiloyan ompa Boston, sayoj ke itech xiuit 1949 keman kitamij nemachtil mokepak ichan uan peuak momachtia Biblia. Amo mochiuak tamachtijkej, ta okachi kuali kiixtalij kitekitilis Dios nochi inemilis. Moauij itech  xiuit 1950 itech se ueyi nechikol kampa mosentilijkej akin uejuejka kayomej tein kipiakej itaixpantijkauan Jiova itech Estadio Yankee ompa Nueva York. Tepitsin satepan timoixmatkej, timonamiktijkej uan peujkej tikchiuaj tekit tein ika motayekanaltia itekiyo Dios.

Yekinika tiajsikej Oregón. Tipeujkej itech xolal Eugene uan ompa miakej iniuan kuali timouikakej. Itech xiuit 1953 timokaltalitoj Grants Pass kampa titapaleuitoj itech se nechikol tein amo ueyi. Nejon xiuit techyoleujkej Galaad itech tamachtilis 23, se tamachtilis tein tapaleuia maj kipeualtikan tekit kemej misionero tein kitemakayaj itaixpantijkauan Jiova itech xolal South Lansing, tein moajsi kemej 400 kilómetros itech xolal Nueva York.

Itech metsti diciembre xiuit 1954, makuil metsti satepan keman tiktamijkej tamachtilis Galaad, Billie uan nejua titejkokej itech se avion tein tekitia ika ome motores uan yaya Brasil. Tiyajtoyajya se hora keman semej motores uejueliuik uan monekik titemoskej kampa motanotsa Bermudas. Oksepa monekik titemoskej Cuba, uan satepan keman tipatankej treinta y seis horas tein tikmachilijkej ke semi uejkauak, tiajsikej itech sucursal tein kipiaj itaixpantijkauan Jiova ompa Río de Janeiro (Brasil).

Tepitsin satepan, Billie, ome misioneras uan nejua tiyajkej Bauru (São Paulo) tiktapotoj se kali kampa nemiskiaj misioneros. Itech xolal nemiaj panoua 50,000 taltikpakneminij, uan sayoj tejuan tikatkaj tiitaixpantijkauan Jiova.

Peuak tiyouij kajkalpan, sayoj ke tiopixkat kitelixnamikia tekit tein tikchiuayaj: techtojtokaya uan kiniluiaya akin ompa nemiaj maj amo techkakikan. Maski ijkon, peuak titamachtiaj ika Biblia itech se kali kampa miakej nemiaj kemej kalyetouanij. Panok sayoj seki semanas uan kiixtalijkej mochiuaskej itaixpantijkauan Jiova uan satepan moauijkej. Ompa, oksekin no peujkej touan momachtiaj.

Kalyetouanij akin moauijkej kipiayaj se ininchankauj akin taixyekanaya itech se ueyi kali tein semi moixmatia uan katka ininsenaxka miakej. Yejua techtakauilij keman timotenkaujkej ke tikchiuaskej se ueyi nechikol ompa. Keman tiopixkat kimatik, kitemoj kichiuas maj amo techtakauilianijok, sayoj ke taixyekankej mosentilij iniuan itekitikaikniuan uan kiniluij: “Komo amo nankintakauiliaj, nikaua nejin tekit”. Satepan, kemaj uelik mochiuak ueyi nechikol.

Se xiuit satepan, itech xiuit 1956, kemej cuarenta akin tipouiaj itech tonechikol tisenyajkej ika tren itech se ueyi nechikol ompa Santos (São Paulo). Keman timokepkej Bauru, nikajsik se amat kampa nechyoleujtoyaj maj nitakalpano itech nechikolmej kampa mosentiliaj itaixpantijkauan Jiova. Nikchiuak nejin tekit kemej veinticinco xiujmej uan nitakalpanojtinemik itech nochi ueyi altepet Brasil.

Itech nejon xiujmej semi ouij katka se yas kansaika uejka, porin monekia tiyaskej itech autobús, tren, carreta, bicicleta uan hasta tinejnemiskej. Semej yekinika xolalmej kampa titakalpanotoj yejua Jaú (São Paulo). Ompa se tiopixkat techixnamikik.

Techiluij: “¡Amo uelis nankinnojnotsaskej akin noaxkauan!”.

Uan tejuan tiknankilijkej: “Amo moaxkauan. Iaxkauan Dios”.

Tiktemojkej kampa tikinnextiliskej película tein kimelaua tekit tein kichiuaj itaixpantijkauan Jiova semanauak taltikpak tein itokay La Sociedad del Nuevo Mundo en acción, sayoj ke tiopixkat kinsentilij itatojtokakauan maj techteuitij. Keman tikmatkej, tikinnotskej policías. Keman ajsikej akin techteuisnekiaj,  kiitakej ke techyoualojtoyaj miakej policías uan kimaketstoyaj inintepos kampa ika yejuan ajsikej. Akin moajsiaj kalijtik kiteluelitakej película.

Amo sayoj ompa kiixnamikiaj tekit tein tikchiuayaj. Kemej neskayot, itech xolal Brusque, tein moajsia ompakauin Blumenau (Santa Catarina), tikinixmatkej ome siuamej akin kichiuayaj tekit kemej precursor. Yejuan tajtouayaj ika Biblia kampa kintelixnamikiaj, sayoj ke amo nenkaj taxikojkej. Axkan, cincuenta xiujmej satepan, ompa moajsij panoua sesenta nechikolmej, uan ompakauin no moajsi se kualtsin Kali kampa mochiua Uejueyi Nechikolmej itech xolal Itajaí.

Se taman tein okachi tikuelitayaj tikchiuaskej keman titakalpanouayaj itech nechikolmej yejua tikixyekanaskej uejueyi nechikolmej iniuan tokniuan. Itech xiujmej 1975 hasta 1977 nikixyekanak uejueyi nechikolmej tein mochiuaya itech ueyi Estadio Morumbi. Motanauatij kemej itech cien nechikolmej maj kintitanikan majtakti tokniuan akin tapaleuiskiaj maj mochipaua nochi estadio se youal achto ke mochiuaskia ueyi nechikol.

Nejon youal, seki mauiltianij ika futbol keman kisayaj itech estadio kikejkelijtojkej: “¡Xikinitakan ne siuatsitsin akin maktokej tein ika tachipauaskej!”. Sayoj ke, keman ajsik tajkoyouan nochi estadio senkis chipauak mokauak. Akin ompa taixyekanaya kijtoj: “¡Tejuan tiuejkauaskiaj se semana tikchiuaskej tein namejuan nankichiujkej itech sayoj seki hora!”.

Itech xiuit 1980 nopopaj momikilij; tepitsin satepan timokepkej Estados Unidos porin tikyekpiatoj nomomaj itech xolal Fremont (California). Youak tikchipauayaj uejueyi kalmej uan ika nejon timoixpanoltiayaj, ijkon tiksentokayaj tikchiuayaj tekit kemej precursor uan tikinpaleuiayaj akin tajtouayaj portugués. Satepan timokalpatakej kampa motatokaytia San Joaquín tein amo uejka yetoya. Ompa no tikintemouayaj akin tajtouayaj portugués itech nochi Sacramento hasta Bakersfield. Axkan itech xolal California moajsij kemej majtakti nechikolmej itech tajtol portugués.

Keman nomomaj momikilij, itech xiuit 1995, tiyajkej Florida tikyekpiatoj ipopaj Billie hasta keman momikilij. Imomaj momikilijkaya itech xiuit 1975. Itech xiuit 2000 timokalpatakej kampa semi tauaktok itech se xolal tein moajsi ompakauin Colorado. Ompa tikinnojnotsayaj ika Biblia maseualmej navajos uan utes. Nechtayokoltia nikijtos ke Billie momikilij itech metsti febrero xiuit 2014.

Panouaya sesenta y cinco xiujmej keman se itaixpantijkauj Jiova kinankilij ika Biblia netajtanilmej tein nikpiaya. ¡Semi niyolpaki porin nikakik uan nikitak ke tein kijtouaya katka melauak! Ika nejon, uelik nikixtalij niktekitilis Dios nochi nonemilis, uan semi nechualkuilij yolpakilis.